1. Lyasi lyaalandilue ku kulonghaana kukata kwaakitikile mu 1935 lyaamukumiizie siani mulumendo umo?

MULUMENDO umo abanga wali na miaka 18 musita lwaabatiziiziwe mu muaka wa 1926. Baviazi bakue baali Basambi ba Bibilia nga vyali vyakuutua Bakasininkizia Bakue Yehova mu ozo musita. Baali ni baana batatu balalume ni baana babili banakazi, kabili baabasambiliziizie kumubombela Yehova Leeza ni kumupala Yesu Kristu. Nga vyaali vyakita Basambi bonse ba Bibilia mu ozo musita, ozo mulumendo wa kisinka ni weene waali walia mukate ni kumina divai ku Kyakulia kya Lyungulo Kyakue Mulopue. Inzi, kiswapilo kyakue palua musita uli waiza kyaalulwilue na lyasi lisiizi kulabika, lyaali lyalanda nangue “Libumba Likata.” Leelio lyasi lyaalandilue mu muaka wa 1935 na J. F. Rutherford ku kulonghaana kukata kwaakitikile mu muzi wa Washington, D.C., U.S.A. Ni kiki kyaasambiliile Basambi ba Bibilia ku kulonghaana kooko?

2. Ni kisinka ki kili kyasaansamusia kyaalondolwelue na Lupua Rutherford mu lyasi lyakue?

² Mu lyasi lyakue, Lupua Rutherford waalangiliile baalia bakaaluka “libumba likata” lilondolwelue mu lileembo lya Nfyulo 7:9. Kufikiila mu ozo musita, Basambi ba Bibilia baali batontonkania nangue libumba likata i kikundi kya bantu ba kuya ku muulu, inzi te ba kisinka saana nga Bakristu babiikilue mafuta. Lupua Rutherford waabombiizie Maleembo eevi kulondolola nangue, bantu bali mu libumba likata te basaakwilue eevi kwikala ku muulu, inzi beene ni mikooko inge * yakue Kristu yakapusuka  “lyemo likata” ni kwikala loonse pa kyalo. (Nfy. 7:14) Yesu waalaile nangue: ‘Ndi ni mikooko inge isili ya mu keeno kipata, inzi niyo nakaba kuileeta eevi iye yaunvua lizui lyane, kabili yakaalukasie kisepe kimo ni musuungi wakabasie umo.’ (Yoan. 10:16) Eezi mikooko inge, i Bakasininkizia Bakue Yehova ba kisinka bali ni kiswapilo kya kwikala loonse mu Paradiso pa kyalo. (Mat. 25:31-33, 46) Ale, kansi tumone kooku kumana kwa leenu kwa kisinka kya Bibilia vikwaaluluile buikazi bwa bantu bengi bakue Yehova, kubiika pamo ni olia lupua mulumendo.​—Malum. 97:11; Tus Maf. 4:18.

3-4. Ku kulonghaana kukata kwa mu 1935, bantu bengi baainikile ki palua kiswapilo kyabo, kabili juu ya ki?

³ Musita wa kusaansamusia wa kooko kulonghaana kukata, waafikile musita mulanzi lwaabepuziizie bakatuilizia eevi: “Eba, baalia bonse bali ni kiswapilo kya kwikala loonse pa kyalo kunti baimana?” Lupua umo abanga wali ku kulonghaana kooko waalandile nangue, bantu bakilile nusu ya bakatuilizia elufu makumi abili (20 000) eevi baali ku kulonghaana kooko, baaimeene. Kisia, Lupua Rutherford waapundile eevi: “Mone! Libumba likata!” Kupuako, bantu baali kooko baabuluile tupundu na makola. Babo baaimeene, baainikile nangue te baali basaakwilue eevi kwikala ku muulu. Baainikile nangue te baali babiikilue mafuta na mupasi wakue Leeza. Busiku bwa kulonghaana bwaakoonkelepo, Bakasininkizia mia munane ni makumi ana (840) ba leenu baabatiziiziwe, kabili bengi pakati kaabo baali ba mu mikooko inge.

⁴ Kisia leelio lyasi, olia mulumendo utwazimbulanga ntaanzi ni bange bengi, baalekeele penka paalia kulia mukate ni kumina divai ku Kyakulia kya Lyungulo Kyakue Mulopue. Bengi baaiunvuile nga lupua umo waalandile eevi waikefiizie: “Kibukisio kya mu 1935, i kyaali musita wa kupeleezia unaliile mukate ni kumina divai. Naainikile nangue nsyali nasaakwilue na mupasi utakatiifu wakue Yehova eevi kwikala ku muulu; inzi, naainikile nangue naali ni kiswapilo kya kwikala pa kyalo ni kukwasia miilo ya kuwaamia kyalo kyaluke paradiso.” (Bar. 8:16, 17; 2 Bakor. 1:21, 22) Ntangia paapo, mpendua ya bantu bali mu libumba likata, ili mukukila kuvula kabili bali mukubomba pamo ni babiikilue mafuta basielepo. *

5. Yehova ali wabamona siani baalia baalekeele kulia mukate ni kumina divai ku Kibukisio?

⁵ Yehova ali wabamona siani baalia baalekeele kulia mukate ni kumina divai kisia muaka wa 1935? Ale, kine leenu Kasininkizia abatiziiziwe walia mukate ni kumina divai mu kisinka ku Kyakulia kya Lyungulo Kyakue Mulopue, ni kisia waiza kwinika nangue tabiikilue mafuta kakiine? (1 Bakor. 11:28) Bange bali balia mukate ni kumina divai, bali bakita evio juu ya kusimana buino kiswapilo kyabo. Inzi, kine baitabila mu kisinka nangue baali bakita evio mukusimana buino, balekela kulia mukate ni kumina divai, kabili batwalilila kumubombela Yehova bali ba kisinka, kakiine Yehova ali kubapenda pakati ka mikooko inge. Anzia kine te bali mukulia mukate ni kumina divai, bali batwalililasie kuya ku Kibukisio paantu bali basantila saana bintu byaabakitiile Yehova ni Yesu.

6. Yesu abalandile bamalaika bakite ki?

⁶ Paantu lyemo likata lyapalama saana, kutoosia bintu binge bilandilue mu Nfyulo katue ka 7 palua Bakristu babiikilue mafuta  ni libumba likata lya mikooko inge, kunti kwatukoselezia. Momo, Yesu wabaana bamalaika batwalilile kukwatilila myela ina ya buinooni. Te bapalile kulekelela ezio myela ipuupile pa kyalo mpaka Bakristu babiikilue mafuta babiikuenke kalangi, i kulanda, Yehova wafikiila kubamona nangue ni ba kisinka. (Nfy. 7:1-4) Juu ya kusiala baali ba kisinka, balupua babiikilue mafuta bakue Kristu, bapeelua kilambu kya kwaluka makolo ni bakoani pamo ni Yesu ku muulu. (Nfy. 20:6) Yehova, Yesu, ni bamalaika bakonvua buino saana kumona Bakristu 144 000 bapata kilambu kyabo kya ku muulu.

7. Nga vilandile lileembo lya Nfyulo 7:9, 10, ni baani baamwene Yoane, kabili baali bakita ki? (Mona foto ili ku ntendeko ya kazeeti.)

⁷ Kisia kulondolola palua babo ba makolo ni bakoani 144 000, Yoane wamona kintu kimo kya kupapia, “libumba likata” lya bantu bapusuka Armagedoni. Kupusana ni kikundi kya mambo, kikundi kya bubili kitanine kabili te kili na mpendua. (Soma Nfyulo 7:9, 10.) Babo bantu ba mu keekio kikundi, “Bavuele nkanzu yasue,” kabili keekio kilangiliile nangue ‘baakiilabukila [bo beene] ku bubi’ bwa mu kyalo kyakue Sataana kabili bakisiala bali bakisinka kuli Leeza ni kuli Kristu. (Yak. 1:27) Bali bapunda nangue bakipususiiwa juu ya beelia byaakitile Yehova pamo ni Yesu, Muana mukooko wakue. Kabili, bakwete misambo ya bunkindu mu minue yabo eevi kulangilila nangue bamwitabiile Yesu kuya wali Likolo asaakuilue na Yehova.​—Palania ni Yoane 12:12, 13.

8. Lileembo lya Nfyulo 7:11, 12 lyatubuila ki palua lupua lwakue Yehova lwa ku muulu?

⁸ Soma Nfyulo 7:11, 12. Musita baalia bali ku muulu lubaamwene libumba likata, baakitile ki? Yoane wamona lupua loonse lwa ku muulu lwakue Yehova lwali ni nsaansa, kabili lwamulumbania Leeza musita ulwamona babo ba mu libumba likata. Lupua lwa ku muulu lwakue Yehova, lwakasekelela kumona kufikiliziiwa kwa kimonua keekio musita libumba likata lulyakapusuka lyemo likata.

9. Kukoonkana ni lileembo lya Nfyulo 7:13-15, baalia bali mu libumba likata bali mukukita ki loonu?

⁹ Soma Nfyulo 7:13-15. Yoane walanda nangue bantu ba mu libumba likata ‘bafulile nkanzu yabo mu mulopa wa Muana mukooko [. . .] yaswetele.’ I kulanda nangue bali ni kampingu kaswetele, kabili nangue Yehova abasekeleele. (Is. 1:18) Beene ni Bakristu bepeele, babatiziiziwe, bali balangilila kiketekelo kikata mu ngeleelo yakue Yesu, kabili bali ni bukibuza pamo ni Yehova. (Yoan. 3:36; 1 Pet. 3:21) Keekio, i kilengele baye bapalile kwimana pa ntaanzi ya kitebe kya bukolo kyakue Leeza, eevi ‘kumubombela busiku ni koba’ mu musolo wa pa kyalo wa ekalu yakue ya kimupasi. Ni leenu bali ni mute saana mu miilo ya kusimikila Bukolo ni kukita basambi, paantu bamanine nangue Bukolo i kintu kya mana saana kuli beene.​—Mat. 6:33; 24:14; 28:19, 20.

10. Bantu ba mu libumba likata basininkiziizie ki, kabili bakamona bulayo ki bwafikiliziiwa?

¹⁰ Libumba likata lya baalia bapusuka lyemo likata, bali ni kisinka nangue Leeza wakatwalilila kubasuunga, paantu “Olia ekeele pa kitebe kya bukolo wakakunzulula liema lyakue pa muulu pabo” (NWT). Bulayo bwaali bwapembeele mikooko inge bukitike, kupuako yakabumona bwafikiliziiwa kakiine: “[Leeza] wakabakuusa mesonzi abo, kabili tekukaba lufu, tekukaba malilo, ao kuloosia ao kwema.”​—Nfy. 21:3, 4.

11-12. (a) Nga vikilangiliilue mu Nfyulo 7:16, 17, ni mpaalo ki ipembeele libumba likata? (b) Mikooko inge kunti yakita ki ku Kibukisio, kabili ni kiki kili kyakinkizia mikooko kukita evio?

¹¹ Soma Nfyulo 7:16, 17. Loonu, bamo pakati ka bantu bakue Yehova, bali mukwema na nzala paantu te bali na nfalanga itosiizie  eevi kusita byakulia bibakabiile, ao paantu bali mu maavia ali aleetua na bului. Bange bakakilue juu ya kiketekelo kyabo. Anzia evio, babo ba mu libumba likata bali ni nsaansa paantu bamanine nangue kisia kupusuka kwinoonua kwa keeno kyalo kibiipile, lyonse bakaba bali ni byakulia bingi bya kimubili ni bya kimupasi. Musita Yehova lwali wakaba kwinoona kyalo kyakue Sataana, wakaba kusininkizia nangue libumba likata lyakingililua kufuma ku kipuki kyakue kili nga “lyuza likata [lili lyazizia, NWT].” Kisia lyemo likata kupita, Yesu wakabatungulula ku “menda a bukose [bwa muyayaya]” baalia bakapusuka pa kyalo. Tontonkania kiswapilo kuwaama kili na libumba likata: Ma miliare a bantu bakaba bakosele, paange te bakafuapo ata limo!​—Yoan. 11:26.

¹² Mikooko inge ili ni kiswapilo kya kupapia, kabili keekio kilengele iye yamutasia Yehova ni Yesu! Anzia kine Yehova taisaakuile eevi iye ikale ku muulu, aitonenesie nga evelia vyatonene Bakristu babiikilue mafuta. Beebi bikundi byonse bibili kunti byamutasia Leeza ni Kristu. Nzila imo ibali bakita evio, ni kusaangua ku Kyakulia kya Lyungulo Kyakue Mulopue.

13-14. Juu ya ki mikooko inge pamo ni baalia babiikilue mafuta basielepo, bapalile kuya ku Kibukisio kya lufu lwakue Yesu?

¹³ Mu miaka ya buleenu, mukulinguila, pa kila bantu elufu imo (1000) bali basaangua ku Kibukisio, muntu umosie i ali walia mukate ni kumina divai. I kulanda nangue, bilonghaano bingi mwaya kyalo tebiizi kusaangua na muntu ata umo ali walia mukate ni kumina divai. Keekio kilangiliile nangue bantu bengi bali basaangua ku Kibukisio, bali ni kiswapilo kya kwikala pa kyalo. Ale, juu ya ki bali basaangua ku Kyakulia kya Lyungulo Kyakue Mulopue? Bali bakitasie nga evelia vili vyakita bantu bali baya ku buinga bwakue kibuza wabo. Babo bantu bali baya ku buinga eevi kulangilila nangue babatonene kabili babakwasiizie baalia baupana. Enka evio, mikooko inge ili yaiza ku Kibukisio paantu itonene kulangilila ntono ni kulangilila nangue ili ku lubali lwakue Kristu ni baalia babiikilue mafuta. Kabili mikooko inge, ili yasaangua ku Kibukisio eevi kusantila palua ngeleelo yakue Yesu ili yalengia kiviindikane mikooko ezio ikeekale loonse pa kyalo.

 ¹⁴ Kintu kinge kya mana kili kyalengia mikooko inge iye ku Kibukisio, ni paantu ikebele kunakila malaizio akue Yesu. Musita Yesu lwaatendekeziizie Kyakulia kya Lyungulo Kyakue Mulopue, pamo ni batumua bakue, waabalandile eevi: “Kite eevi lyonse lumwananguluka.” (1 Bakor. 11:23-26) Pakaako, batwaliliile kusaangua ku Kyakulia kya Lyungulo Kyakue Mulopue pamo ni babiikilue mafuta bakili paano pa kyalo. Kabili, mikooko inge ili yakupa kila muntu asaangue ku Kibukisio pamo naayo.

15. Kunti twakita siani eevi tumutasie Leeza ni Kristu ku Kibukisio?

¹⁵ Ku Kibukisio, tuli twasaangua ni lisyuko lya kumutasia Leeza ni Kristu musita utuli twaimba ni kupepa lwa pamo. Lyasi lya kibukisio lyakaba kulandua onu muaka lilandile eevi: “Santila Palua Beelia Byakukitiile Leeza ni Kristu!” Leelio lyasi, lyakaba kutukwasia kukila kumusantila Yehova ni Kristu. Kansi, musita lwakaba lwapisiiwa mukate ni divai, fwe bakaba kusaanguako twakaba kulangulusiiwa mana ya bintu bebio, i kulanda nangue mubili ni milopa yakue Yesu. Twakaba kulanguluka nangue Yehova waaitabiziizie Muana wakue atufuile eevi tukapate bukose. (Mat. 20:28) Kubalua muntu amutonene Baba weetu wa ku muulu pamo ni Muana wakue, wakaba kutona kusaangua ku Kibukisio.

16. Bakristu babiikilue mafuta ni mikooko inge bapaleene mu nzila ki?

¹⁶ Mu nzila kampanda, baalia babiikilue mafuta ni mikooko inge bapaleenesie. Bebio bikundi byonse bibili ni bya mana kuli Yehova, kabili teezi kusaangua watonene kikundi kimo kukila kinge. Kulanda kisinka, waalipile mutengo umo sie, i kulanda, bukose bwakue Muana wakue mutonua, eevi kusita baalia babiikilue mafuta ni mikooko inge. Kupusana kuli pakati ka bebio bikundi bibili ni paantusie bili ni biswapilo byapuseene. Bebio bikundi byonse bibili bipalile kutwalilila kuya byali bya kisinka kuli Leeza ni Kristu. (Malum. 31:23) Kabili languluka nangue, kukoonkana ni vikabiile kila muntu, ibe ni Mukristu abiikilue mafuta ao mukooko unge, Yehova kunti wamupeela mupasi wakue utakatiifu.

17. Babiikilue mafuta basielepo bapembeele ki?

¹⁷ Bakristu babiikilue mafuta tebeezi kuvyalua bali ni kiswapilo kya kwikala ku muulu. Leeza i ali wabapeela keekio kiswapilo. Bali batontonkania ni kupepa palua kiswapilo kyabo, kabili bali ni nkulu ya kupokelela kilambu kyabo ku muulu. Tebeezi kusaangua bamanine kine mibili yabo ya kimupasi yakaba yali siani. (Baf. 3:20, 21; 1 Yoan. 3:2) Anzia evio, bapembeele musita ubakamumona Yehova, Yesu, bamalaika, ni bange babiikilue mafuta. Bapembeele  kwa nkulu kupata bifulo mu Bukolo bwa ku muulu pamo ni bange babiikilue mafuta.

18. Mikooko inge ipembeele ki?

¹⁸ Mikooko inge ipembeele kwa nkulu kiswapilo kya kwikala loonse pa kyalo. Ezio ni nkulu ili yasaangua na bantu bonse. (Kas. 3:11) Bapembeele kwa nkulu busiku bubakakwasia kwalula kyalo kyonse kuba paradiso. Bapembeele kwa nkulu busiku bubakaviinda kukuula masesi abo, kubyala ma busitani, ni kukuzia baana babo bali ni bukose bwapuililikile. (Is. 65:21-23) Bapembeele kwa nkulu kwendela nkeende inge ya mu kyalo ni kumona mpili, miitu, ni ma lyezi​—ni kusambilila bintu bingi palua bibumbua bingi byakue Yehova. Kukila pa byonse, bali basinsimuka na makola kumana nangue bukibuza bwabo pamo ni Yehova bwakakila kukosa ni kukila kwaluka bwa peepi.

19. Kila umo weetu ali ni nkeende ya kukita ki ku Kibukisio, kabili Kibukisio kya onu muaka kyakaba kukitika pa nsiku inga?

¹⁹ Yehova apeele kila mubombi wakue epeele, kiswapilo kiweeme saana palua musita uli waiza. (Yer. 29:11) Kibukisio kya lufu lwakue Kristu kili kyatupeela kila umo weetu nkeende ya kumutasia Leeza ni Kristu palua beelia bibaatukitiile eevi tukabe kupata bukose busili na mpela. Kakiine Kibukisio ni nkeende ya mana saana ili yabapeela Bakristu ba kisinka fuasi ya kusaakaana pamo. Onu muaka, kyakaba kukitua Ya Sita, pa nsiku 27, Muezi wa 03, 2021, kisia koba kuzimina. Bengi, bekeele mu nkeende mubali basaangua ni buntungua bwa kukita kooku kulonghaana kukindeeme. Bange bakaba kulonghaana anzia kukanzua. Bange bakaba kukita Kibukisio bali mu buloko. Paantu Yehova, Yesu, bamalaika, ni Bakristu babiikilue mafuta batuntumwinue bakaba bakenteleele, kansi kila kilonghaano, kikundi, ni muntu umo-umo basekelele kukita Kibukisio!