Bulondolozi buli mu Malanguluzi a Mizilo 22:25-27 te bwimaniine pa kusininkizia kilubo kya ozu mwalalume, paantu keekio kyaali kyamanikile nangue mwalalume ozo ali mbela ni kilubo. Ozu muzilo utontele pa kulangilila kusiba na kilubo kwa mwanakazi. Mona kutendekeele lyasi ni kulipwiliile.

Milongo ya ntaanzi yalanda palua mwalalume waaleele, “mu muzi,” na mwanakazi waali wasakilue. Lwaakitile evio waaingile mu kilubo kya bukende, paantu mwanakazi waali wasakilue, waali wamwenuesie nga opilue. Eba, ale mwanakazi? “Taasamuine mu muzi.” Kabenge waakitile evio, kakiine bange nga bamunvuile, kabili nga bamukwasiizie. Inzi taasamuine. Kansi waakwasiizie bukende, pakaako bonse babili baapinguilue kuya bali ni kilubo.​—Mal Miz. 22:23, 24.

Kisia, Muzilo ukoonkelepo walondoluele aali ibeleele: “Inzi, kine mwalalume wamusaanga mukaziana asakilue, ku makaba ni mwalalume wamupita maka ni kulala nakue, mwalalume waakilaala nakue apalile kufua weene bunke, kabili te mupalile kumukita kantu mukaziana. Mukaziana taakikita lizaambi lipalile kufuilapo. Eezi aali ipaleene ni musita mwalume lwamuilukila mwalalume mwinakue ni kumwipaya. Paantu waizile kumusaanga, ku makaba, mukaziana waali wasakilue, kabili mukaziana asakilue waapundile, inzi te kwaali muntu wa kwiza kumupususia.”​—Mal Miz. 22:25-27.

Mu eezi aali, mwanakazi waali wapeelua nsaambu. Juu ya ki? Paantu yaali yapingulua nangue “mwanakazi waasamuine, inzi te kwaali muntu wa kumupususia.” Kansi taakitile bukende. Inzi, mwalalume, waali ni kilubo kya kulaalana kwa maka kabili ni bukende, paantu ‘wamupitile maka mwanakazi ni kulaala nakue,’ mwanakazi waali wasakilue.

Pakaako, ata kine ozu muzilo waali walandila saana palua mwanakazi kusiba na kilubo, aali yalangiliile paswetele nangue mwalalume waali ni kilubo kya kulaalana kwa maka ni bukende. Kunti twaya twali ni kisininkizio nangue bazuuzi baali “batoosia mulandu bapoozeleko ni maano” ni kufumia bupinguzi bupateene ni lifunde lyaali lyabikilue na Leeza lyali lyamanikile paswetele kabili lyabuelulukilue lingi.​—Mal Miz. 13:14; 17:4; Kuf. 20:14.