TWALILILA KUYA WAKENTELE!
2022: Muaka wa Lyemo ni Binvulunghania—Bibilia Ili Yalandapo Siani?
Vita, maavia a kupata nfalanga, masaanzo ali aleetua na maka a kyalo ali ainoona bintu, ezio i mpunda yakiba yavulile saana mu muaka wa 2022. Bibilia sie i ili ni buviinde bwa kulondolola kine bebio bintu bili na mana ki.
Eba, bintu byaakikitika mu muaka wa 2022, bilangiliile ki?
Bintu byaakikitika mu ozu muaka wapua, byakila kusininkizia nangue twikikeele mu kipindi kili kyakuutua na Bibilia nangue “nsiku ya mpeleezio.” (2 Timoteo 3:1, Le Nouveau Testament en langue Kitaabua) Keekio kipindi kyaatendekele mu muaka wa 1914. Ale mona bintu byaakikitika buleenu vibipateene ni beelia byaalandile Bibilia lwa ntaanzi nangue byakakitika:
Vita.—Mateo 24:6.
“2022, Muaka Wakilengia Maavia Ali Aleetua na Vita Abuela Kabili mu Bulaya.” a
Mona lyasi lilandile, “Ukrainia Yaingililua na Urusi.”
Kimina kya nzala.—Mateo 24:7.
“2022, Muaka wa Nzala Ikata.” b
Mona lyasi lilandile, “Vita Ili mu Ukrainia Yalengia Byakulia Bikeepe Saana mu Kyalo.”
Maluele.—Luka 21:11.
“Buluele bwa polio bwaakibuela kabili, buluele buli bwakuutua nangue variole du singe ni bwene bwaakikyuzia, kabili ni buluele bwa korona (COVID-19) butwaliliile kukyuzia saana. Keekio kyaakilangilila buino maluele ali aambukiziana viali asaangua aaviizie ni bantu vibali mukukwatika na azo maluele.” c
Mona lyasi lilandile, “Bantu Milioni 6 Baakifua na Korona.”
Bintu byakutiinia.—Luka 21:11.
“Lyuza, likungulu, miitu kuzia, ni bibunda bya menda. Kakiine kipua kya muaka wa 2022, kyakaba kuya kyalangulukua mu binvulunghania bikata saana bya aali ya ewa byaakikitika ni kwinoona bintu, kabili ni kulengia ma elufu a bantu afua, pamo ni mamilioni a bantu mwaya kyalo azeezia masesi abo.” d
Mona lyasi lilandile, “Kupiluka kwa Lyuza Mwaya Kyalo.”
Binvulunghania.—Luke 21:9.
“Paantu bantu baakifiitua saana juu ya maavia a kupata nfalanga, asa juu ya kupiluka saana kwa bei, kwakiba kwali bikundi bikata bya kupinga buteeko mu 2022.” e
Mona lyasi lilandile, “Bintu Byapiluka Saana Bei mu Kyalo.”
Ale ni biki byakaba kukitika mu ozu muaka watendeka?
Te kuli muntu ali kuviinda kulanda buino bintu byakaba kukitika mu muaka wa 2023. Inzi fwefue tumaninesie nangue, leenusie Bukolo Bwakue Leeza, ao buteeko bwa ku muulu, bwakaba kuiza kwalulula saana kyalo. (Danieli 2:44) Bobo buteeko, bwakaba kupuisia bintu byonse bili mukulengia bantu baye baema, kabili bobo buteeko bwakaba kusininkizia nangue kutona kwakue Leeza kuli mukukitika pa kyalo.—Mateo 6:9, 10.
Twakukinkizia ukoonke musoko wakue Yesu Kristu. Kisia, ikwinde ‘kutwalilila kuya wakentele’ eevi uye wamona bintu bili mukukitika mu kyalo vibili mukufikilizia bukabika bwa Bibilia. (Marko 13:37) Twakukupa umonane ni fwefue, eevi umane bintu bingi bilangiliile Bibilia viili kuviinda kukukwasia loonu, ni kumana viili kukupeela weewe pamo ni lupua lobe kiswapilo kya kisinka palua musita uweeme saana uli waiza.
a AP News, “2022, Muaka Wakilengia Maavia Ali Aleetua na Vita Abuela Kabili mu Bulaya,” mpunda yaakileetua na Jill Lawless, pa nsiku 08, Muezi wa 12, 2022.
b “Muaka wa Nzala Ikata,” mpunda ya Kabungue ka Buumo bwa Ntundu Palua Byakulia mu Kyalo.
c JAMA Health Forum, “Kwikala mu kipindi kya maluele ali asalanghana lubilo—Kubambila ku buluele bwa korona (COVID-19), mpaka ku buluele bwa variole du singe, buluele bwa polio ni maluele ange asimanikile,” mpunda yaakileetua na Lawrence O. Gostin, JD, pa nsiku 22, Muezi wa 09, 2022.
d Earth.Org, “Ni kiki kyakilengia kwaluke binvulunghania bikata bya aali ya ewa mu kipua kya muaka wa 2022?” mpunda yaakileetua na Martina Igini, pa nsiku 24, Muezi wa 10, 2022.
e Carnegie Endowment for International Peace, “Kipuki kyaakileetua na maavia a kupata nfalanga, kyaakilengia bantu bengi bakite mandamano mu kyalo a kupinga buteeko mu 2022,” mpunda yaakileetua na Thomas Carothers ni Benjamin Feldman, pa nsiku 08, Muezi wa 12, 2022.
Paange uli Kutona ni Eezi Mpunda
MASAMBILIZIO A BIBILIA A MUSINZI
Bukolo Bwakue Leeza Ni Kiki?
Mu miilo yakue ya kusimikila, Yesu wasambiliziizie saana palua Bukolo Bwakue Leeza kukila maasi aange oonse. Mu mamia a miaka iingi, basambi bakue bali mukupepa Bukolo boobo buize.
FWEFUE TULI BAANI?
Loomba Usambilile Bibilia
Saanga mafuunde kufuma mu Bibilia pa fuasi ni mu musita nga via uli kutona.
