TWALILILA KUYA WAKENTELE!
2023: Mwaka wa Lyemo—Bibilia ili Yalandapo Syani?
Mu mwaka wa 2023, mwakikitika bintu bingi mwaya kyalo byakilangilila paswetele nangue, twikeele mu kipindi kelia kili kyakuutua na Bibilia “nsiku ya mpeleezio.” (2 Timoteo 3:1) Mona bintu bituli mukumona byenka belia byaalandile Bibilia ntanzi nangue byakakitika mu nsiku yetu.
Bibilia ni bintu bili mukukitika mu kyalo kyonse
Bului ni mpunda ya bului.—Mateo 24:6.
“Kusyunvuana kwa bungipaani kuli mukongezeka mu ma semu engi a kyalo.” a
Mona lyasi lilandile, “Naani Wakaba Kupusula Baraia?” ni lelia lilandile, “Nfalanga ili Mukubombiiwa mu Kyalo Kyonse juu ya ba Lukale Yapita Dola Trilioni Ibili.”
Ntensi mu nkeende ilekenkeene mwaya kyalo.—Marko 13:8.
“Ntangia sie ku ntendeko ya mwaka wa 2023, kwakiba kwali ntensi ikata sana 13 mwaya kyalo, ezi ni imo pakati ka mpendua ya pa muulu sana mu mwaka umo sie tangia lutwatendekele kusunga mpendua.” b
Mona lyasi lilandile, “Ntensi ili Yainoona Yapita mu Uturuki ni mu Siria.”
Bintu bya kutiinia.—Luka 21:11.
“Kipindi kya kuswela kwa kyalo kyonse tekisyapitile, lonu tuli mu musita uli mukufulumamo kyalo kyonse.”—Mpunda kufuma kuli António Guterres, kalemba mukulu wa Buumo bwa Ntundu. c
Soma lyasi lilandile, “Mu Kyalo Kyonse Likungulu lya mu 2023 Liswelele Sana.”
Kimina kya nzala.—Mateo 24:7.
“2023: Mwaka unge wa bwavia bukata ku baalia bali bakeba byakulia bya bantu ba mu lupua lwabo.” d
Soma lyasi lilandile, “Mu Kyalo Kyonse te Mukili Byakulia juu ya Vita ni Kwaluluka kwa Aali ya ewa.”
Nsita ikolele sana kuluisia.—2 Timoteo 3:1.
“Mwaya kyalo kyonse, muntu umo pa bantu munane ekeele wali ni bwavia bwa mu maano.” e
Soma lyasi lilandile, “Maavia a Kuvulunghana mu Maano a Bamisepuka Aongezeka.”
Ale mu mwaka wa 2024, kunti twaya twaswapiile ki?
Te kuli muntu ata umo amanine bwino belia byakaba kukitika mu mwaka wa 2024. Inzi, bintu bili mukukitika lonu mu kyalo bilangiliile nangue evi sie lenu Bukolo Bwakue Leeza ao buteeko bwa ku muulu bwakaba kwiza kufumiapo ma buteeko a bantu ni kupwisia bintu byonse bili byaleeta maavia ni kwema.—Danieli 2:44; Nfyulo 21:4.
Lutupembeleele ozo musita, kine twaiunvua kwema, tupalile kumulomba Leeza atukwasie. Bibilia ili yalanda evi:
Musita undi ni muenzo, ndi nakuswapila weewe.—Malumbo 56:3.
Tuli kulangilila syani nangue tumuswapiile Leeza? Twakukupa usambilile bingi palua bulayo buli mu Bibilia bwa musita uli mukwiza usikabamo maavia. Ezia kusambilila Bibilia pamo ni fwefue bila kulipa, evi umone namuna wewe pamo ni lupua lobe vimuli kuvinda kunonkelamo mu bulayo buli mu Bibilia.
a Bintu bya Panze, “Kyalo kya Vita: Ni Kiki Kilengiizie Kusyunvuana kwa Bungipaani Kuli Mukukitika mu Kyalo Kyonse?” Yakue Emma Beals ni Peter Salisbury, ya pa nsiku 30, Mwezi wa 10, 2023.
b Earthquake News, “Mwaka wa 2023: Mpendua ya Ntensi Ikata Itwaliliile Kulembua,” ya Mwezi wa 5, 2023.
c Buumo bwa Ntundu, “Kalemba Mukulu Wakitubula Bitente bya Mpunda Palua Aali ya ewa,” ya pa nsiku 27, Mwezi wa 7, 2023.
d Mupango wa mu Kyalo wa Byakulia, “Kupusa kwa Byakulia mu Kyalo Kyonse.”
e Kuteania kwa Bukose mu Kyalo, “Nsiku Nkulu ya Bukose bwa mu Maano mu Kyalo ya 2023,” nsiku 10, Mwezi wa 10, 2023.