Musita bantu lubali bazimbula mulandu “apokalipsi” ni kiki kili kyaiza mu maano obe? Paange uli watontonkania palua kusaanzua kukata kwa kyalo kyonse, paange kwa kufikiila kulovia bukose bonse buli pa kyalo. Bantu bange bazumiine nangue leenusie kyalo kyakaba kusaanzua na buavia bwa evio, asa musita ubali basoma mpunda nga eezi ili paapa pensina:

•   “Kunti kyakitika saana kukabe kwaluka vita ya nyukilia. Ezio vita, kunti yakitua na bufue, mu kusitukilasie ao juu ya kusyunvuana.”—Bulletin of the Atomic Scientists.

•   “Mu miaka likumi yakipita, kwaakikitika milula yaviizie isili na mpendua, kuzia kwa miitu, bipindi bileepele bya kusinoka kwa nvula, kuswetuluka kwa ma koraye ao marijani, lyuza likata, ni bibunda.”—National Geographic.

•   “Bizenga bya luzie mu Afrika byavula kabili bili mukwinoona saana bintu kuliko miaka ingi yakipita.”—The Associated Press.

 Eba, kyalo kyakaba kwinoonua mu apokalipsi ya kyalo kyonse? Bibilia ili yalanda siani?

 Ata. Mulandu Wakue Leeza, Bibilia, uli watusininkiziizia nangue kyalo kyakaba kyaliposie loonse. (Kasimika 1:4) Kuliko kwinoona kyalo kyonse kyaabumbile, Leeza wakaba “kwinoona baalia bali mukwinoona kyalo.”​—Nfyulo 11:18, NWT.

 Nga vilandile Bibilia, keekio “kyalo” kya kwinoonua, ni bantu bali bakaana kukoonka butunguluzi bwakue Leeza, ni kuya bakitasie beelia bibatonene. Nga evelia vyaakitile mu nsiku yakue Noa, Leeza wakaba kwinoona bantu bamusuulile weene.​—2 Petro 2:5; 3:7.

 1 Yoane 2:17 ili yalanda nangue kyalo kili mukupita pamo ni nkulu yakue. Leeli lileembo lilangiliile nangue Leeza wakaba kwinoona bantu watwaliliile kukita bintu bibiipile, inzi apana planete ao kyalo kiine.

 Bibilia te ilandile busiku bwine bwa kuiza mpela. (Mateo 24:36) Inzi, ilandile nangue mpela ili peepi saana. Bibilia yaalandile eevi:

•   Bintu nga evelia vita, nzala, maluele aviizie, ntensi byakakitika mu nkeende imo, kisia mu nkeende inge.​—Mateo 24:3, 7, 14; Luka 21:10, 11; Nfyulo 6:1-8.

•   Bantu bengi bakeetona saana. Kwa mufuano, bakatonesia nfalanga, bila batasia, kabili bila baitiinia.​—2 Timoteo 3:1-5.

 Bantu bengi betabiile nangue kutendekela mu muaka wa 1914, bintu bili mukukitika mu kyalo bipateene saana ni beelia byaalandile Bibilia lwa ntaanzi, kabili nangue mpela yapalama. Eevi upate mpunda ingi, mona maasi ali ni mutue ulandile eevi: “Kukitika kwa Bintu Kukoonkeene Kuli mu Bibilia Kulangiliile ki Palua Muaka wa 1914?” ni lyasi lilandile “Ni Biki bya Kumwenako ‘Nsiku ya Mpeleezio,’ ao ‘Nsita ya Mpela’?”

 Mulandu wiine wa Kigiriki upilibuile mulandu “apokalipsi” ulangiliile “kutupukula” ao “kufiikula.” Lingi ozo mulandu uli walangilila kufiikula mpunda yakiba yafyeme. Bibilia ni yeene ili yalanda palua ‘kufyulua [ao, apokalipsi] kwakue Mulopue Yesu,’ kumonekele musita Yesu lwalangililua kuya wali ni buviinde bwa kufumia bubiifi bonse pa kyalo ni kubalambula baalia bali bamupupa.​—2 Batesalonika 1:6, 7, NWT; 1 Petro 1:7, 13.

 Kitabu kya kupeleezia kya Bibilia kili kyakuutua A·po·kaʹly·psis, ao Nfyulo, paantu kili kyafiikula ao kulangilila bintu byakukitika musita uli mukuiza. (Nfyulo 1:1) Keekio kitabu kilimo mpunda iweeme kabili ya kiswapilo. (Nfyulo 1:3) Kili kyalangilila nangue Leeza wakaba kupuisia kubulua kwa nsaambu konse, ni kukita kyalo kyaluke paradiso. Mu ozo musita, bantu te bakaba kuya bakisua kabili, kwema aosie kufua.​—Nfyulo 21:3, 4.

 Eba, weewe kunti watona kumana bingi palua bobu bulayo buweeme saana bwa Bibilia? Bakasininkizia Bakue Yehova bali ni ntantiko ya kusambilila Bibilia pamo ni bange bila kuloombana nfalanga, kabili ezio ntantiko kunti yakukwasia. Wamona siani kine walondolola naabo palua kaako?