Mu kyalo kyonse, bantu bengi batonene kwikala buikazi bwa kusitona kulia nama ni kusibombia kintu kyonse kifumine ku nama.

•   “Buikazi bwa evio buli bwalengia bantu batontonkanie nangue bapalile kutiina kukisia tunama ni kutiina kutubombia juu ya kyakulia, maubo ao kintu kinge kyokyonse mu buikazi bwabo.”​—Mpunda kufuma ku Vegan Society.

 Kukila pa kwemena nama, bantu bengi batonene kwikala buikazi bwa evio juu ya kwemena mazingira, bukose ao diini yabo ibaloombele kukita evio.

•   “Kwikala buikazi bwa kutiina kulia nama ni kusibombia kintu kyonse kifumine ku nama, te kutona sie kusaakula misango paleepale ya byakulia byupalile kulia ao ata, inzi ni namuna ya kumwenamo bintu, bupinguzi bupalile kukwatua na muntu ni kumonua kuya bwaweeme, kabili ni nzila ili kukwasia muntu akile kuwaamia kyalo.”​—Mpunda kufuma ku Britannica Academic.

 Eba, kwikala buikazi bwa evio i kwakaba kupuisia maavia ali mu kyalo? Bibilia ili yalandapo siani?

 Bibilia ilangiliile nangue, Kabumba weetu Yehova Leeza, a amwene bantu kuya baali ba pa muulu kuliko nama, kabili nangue bantu baapeelue buviinde pa banama. (Kutendeka 1:27, 28) Kukila pakaako, Leeza waabalandile bantu baye babombia nama kuya kyali kyakulia. (Kutendeka 9:3) Anzia evio, taaitabiziizie kubakitila banama mu nzila isipalile.​—Tuswalo ni Mafunde 12:10.

 Kukoonkana ni Bibilia, kulia nama ni bupinguzi bwa kila muntu. b Te kintu kitwasaakula kukita kili kulengia twaluke bantu ba mana pa menso akue Leeza. (1 Bakorinto 8:8) Kabili, te kuli muntu apalile kumupingula mwinakue juu ya beelia byakisaakula kulia.​—Baroma 14:3.

 Bibilia ili yalanda nangue nzila ya buikazi ituli twasaakula kwikala teiviinda kupuisia maavia ali mu kyalo. Paantu maavia engi ali mukuleetua na bintu bya politike, bantu ni kubula kwa nfalanga mu keenu kyalo, kabili te kuli muntu ali kuviinda kupuisia bebio bintu. Bibilia ili yalanda nangue:

•   Kintu kipeteeme tekiviinda kololua.​—Kasimika 1:15.

 Kabumba weetu wakaba kupuisia maavia atuli mukusaakaana nao. Bibilia ili yabombia bulanzi bwa kupalania eevi kulangilila beelia byakaba kukita.

•   Kabili namwene lyulu lya leenu ni kyalo kya leenu. Lyulu wa mambo ni kyalo kya mambo byaalobele, lyezi ni lyo lyaalobele.​—Nfyulo 21:1.

 Leeza wakafumiapo buteeko bwa bantu ao lyulu wa mambo, ni kubiikapo lyulu lya leenu i kulanda, Bukolo bwakue bwa ku muulu. Bukolo bwakue bwakafumiapo kyalo kya mambo i kulanda, bantu babiipile, kabili bwakateeka kyalo kya leenu ao baalia bali baitabila mukwitonena kutungululua na weene.

 Ni pensina butunguluzi bwa Bukolo Bwakue Leeza sie i pakasambilila bantu mu nzila ipuililikile vya kwikala mu mutende ni nama ni kukindika mazingira.​—Isaya 11:6-9.