Mu Muezi wa 07, 2022, bikitua bili byaleeta lubebue bya kwipayana na bunduki, byakikitika mu kyalo kyonse:

•   “Kwipaiwa kwa muntu wa politike amanikile saana mu kyalo kya Japani [Shinzo Abe, lwa kale abanga wali Premier Ministre] kwakilengia bantu ba mu kyalo kya Japani baunvua lubebue, kabili kwakipapia bantu mwaya kyalo. Kwakipapia saana bantu, paantu mu keekio kyalo temwizi kukitika saana bintu bya bungipaani kabili muli mizilo yasasiile palua kubombia mabunduki.”—Nsiku 10 Muezi wa 07, 2022, The Japan Times.

•   “Bantu ba mu kyalo kya Danemark bakyunvua lubebue musita muntu umo lwakipaya bantu batatu (3) na masaasi mu nsoko ikata, mu muzi wa Copenhague.”—Nsiku 04 Muezi wa 07, 2022, Reuters.

•   “Afrique du Sud: Kisia kikundi kya bantu batweme mabunduki kulasa masaasi mu bantu, mu muzi wa Soweto, bantu likumi na basano (15) bafua.”—Nsiku 10 Muezi wa 07, 2022, The Guardian.

•   “Mu Amerika, mu kipindi kya nsikunkulu ya pa nsiku 04 Muezi wa 07, ku mpela ya mulungu, bantu bakilile pa mia ibili ni makumi abili (220) baakilasua ni kufua. Baakilasua na bunduki.”—Nsiku 05 Muezi wa 07, 2022, CBS News.

 Eba, kunti twaswapila kakiine nangue bobu bungipaani bwakaba kupua? Bibilia ili yalandapo siani?

 Bibilia ili yalanda nangue, keenu kipindi kitwikelemo, ni “nsiku ya mpeleezio.” Kipindi kya kwalukamo bantu basasile, bakitilana bintu bila nkumbu kabili nga binama. (2 Timoteo 3:1, 3) Beebi bikitua bya bungipaani bili mukukitika, bili mukulengia bantu baye baikeele baunvuile mwenzo. (Luka 21:11) Inzi, Bibilia ilaile yalanda nangue, leenusie, bungipaani tebukabako kabili, ni bantu bakaba kwikala mu fuasi ya mutende, mu fuasi ya kwikalamo isuungilue, kabili mu fuasi iteekameene ya kutuuziizia. (Isaya 32:18) Ale bungipaani bwakaba kupua siani?

 Leeza, wakaba kwipaya bantu bonse babiipile ni kwinoona biluilo byonse.

•   Inzi babiifi beene, bakafumiiwa pa kyalo.​—Tuswalo ni Mafunde 2:22.

•   Leeza wakapuisia vita pa kyalo kyonse. Wationa buta ni kutionania mukuuki; wazizia bityakala bya balukale na mulilo.​—Malumbo 46:9.

 Leeza, wakaba kubasambilizia bantu kwikala mu mutende, kupitila kukita evio, wakaba kupuisia bikitua byonse bya bungipaani.

•   Tebikaleeta bubiifi ata bumo aosie buinooni ku lupili lwane loonse lutakatiifu. Paantu kakiine, kyalo kyakeezula na kumana kwakue Yehova nga menda vyali aizula mu lyezi.​—Isaya 11:9.

•   Atasie leenu, Leeza ali mukusambilizia bantu mu kyalo kyonse basuule bungipaani ni kulekela kubombia biluilo. Ali mu kubasambilizia batile bipanga byabo ni kwalula nkasu, ni mikuuki yabo kwalula bikwakua.​—Mika 4:3.

 Eevi umane bingi palua bulayo buli mu Bibilia bwa kyalo kisikabamo kunvua mwenzo, soma lyasi lilandile “Je, Inawezekana Kuishi Bila Woga?”

 Eevi umane bingi palua keelia kyakaba kuviinda kupuisia bungipaani loonse, soma lyasi lilandile “Hatimaye Amani Duniani!”