Mwaya kyalo, bantu bengi baalia bali bailanda nangue bamukoonkele Yesu Kristu, bali baiingizia saana mu politike. Bantu bange bali baezia kulangilila kiketekelo kya diini yabo ao mafunde alandiile palua lwendo lwabo juu ya kukwasia politike ao byama bya politike. Kabili, bantu ba mu politike, bali babombia bintu bilandiile palua lwendo ni maavia a bantu eevi kulengia bantu ba ma diini babakwasie. Te kyeni kumona bantunguluzi ba ma diini bali mukukeba baaluke bakulu ba mu buteeko. Mu byalo binge, muntu olia ali waikuuta nangue ni “Mukristu”, kunti waya waikebela ni kifulo kya mana mu buteeko, mu kyalo ao mu diini.

 Weewe watontonkania siani? Eba, basambi bakue Yesu Kristu, bapalile kwiingizia mu politike? Kunti wapata kyasuko kupitila kutoosia mufuano wakue Yesu. Waalandile eevi: ‘Eevi vinamilangilila i vya kuti mukabe mwakita.’ (Yoane 13:15, Le Nouveau Testament en langue Kitaabua) Palua kwiingizia mu politike, Yesu waabiikile mufuano ki?

 Bila. Yesu taaiingiziizie mu politike ya mu kyalo.

 Yesu taakebele aaluke ni kifulo mu politike. Yesu waakeene kwitabila kwaluka kateeka wa mu buteeko bwa bantu musita Sataana Kibanda luaamupeele ma buteeko onse ali mu kyalo. (Mateo 4:8-10) a Musita umo eevi, bantu lubaamwenene nangue Yesu ali ni mibeele ili kulengia aye wali kateeka aweeme, baaeziizie kumupatikizia engile mu politike. Bibilia ili yalanda nangue, Yesu lwaamanine nangue baali bakeba kumutwama bamwalule likolo, waaifompuele kabili, ni kubutukila ku lupili kwa bunke. (Yoane 6:15) Yesu taakitile beelia bibanga byatonene bantu akite. Inzi, waakeene kwiingizia mu politike.

 Yesu taakwasiizieko bintu bya politike. Kwa mufuano, mu nsiku yakue Yesu, Bayuda baali baunvuile kipuki paantu baali balipisiiwa bitansi na buteeko bwa Roma, kabili baali bamwene kulipa bebio bitansi, kuya kyali kifunda kisili na mana. Musita bantu lubaaeziizie kumulengia Yesu akwasieko ku bobo bulondolozi, waakeene kwiingizia mu bulondolozi bwa kipolitike juu ya kumana kine kulipa ezio mpalata kwali kwaweeme ao abe. Waabalandile eevi: “Eya, kansi byakue kateeka, sonke kuli kateeka, ni byakue Leeza, peele Leeza.” (Marko 12:13-17, Le Nouveau Testament en langue Kitaabua) Waatwaliliile bila kuya wakwasiizie bintu bya politike. Inzi, waalangiliile nangue bitansi beelia bibanga byalangiliile Kaizari, beelia byaali byaloombelue na bakulu ba mu buteeko bwa Roma, bipalile kulipua. Mu wenka ozo musita, Yesu waalangiliile nangue muntu tapalile kunakila kila kintu kibamulanda na buteeko akite. Muntu taali wapalile kupeela buteeko keelia kipalilesie kupeelua Leeza, nga evelia kwipeela kuli weene ni kumupupa.​—Mateo 4:10; 22:37, 38.

 Yesu waakwasiizie kabili waasambiliziizie bantu palua Bukolo Bwakue Leeza, buteeko buli ku muulu. (Luka 4:43) Yesu waakeene kwiingizia mu politike ya kyalo paantu waali wamanine nangue buteeko bwa bantu tebuviinda kufikilizia mupaango wakue Leeza ku kyalo, ingasie Bukolo Bwakue Leeza bunke i bwakaviinda. (Mateo 6:10) Yesu waamanine nangue Bukolo Bwakue Leeza tebukabombia buteeko bwa bantu eevi kufikilizia kutona kwakue Leeza, inzi bukolo bwa bantu bwakapianua.​—Danieli 2:44.

 Bila. Basambi bakue Yesu baanakiile malaizio akue Yesu alandile nangue te bapalile kuya baali seemu ya kyalo. (Yoane 15:19) Baakoonkele mufuano wakue, kabili baatwaliliile kuya baitengele ni kyalo kya politike. (Yoane 17:16; 18:36) Te baaiingiziizie mu bintu bya politike. Inzi, baabombele miilo ibaalandilue kuli Yesu: Kusimikila ni kusambilizia palua Bukolo Bwakue Leeza.​—Mateo 28:18-20; Miilo ya Batumua 10:42.

 Kumunakila Leeza, i kyaali kintu kya mana saana mu buikazi bwa Bakristu ba mu miaka mia (100) ya ku ntendeko. Inzi, baali bamanine nangue bapalile kukindika buteeko bwa bantu. (Miilo ya Batumua 5:29; 1 Petro 2:13, 17) Baanakiile mizilo ni kusonka mpalata. (Baroma 13:1, 7) Anzia kine te baaiingiziie mu politike, baaitabiile kusuungua ni kukwasiiwa na buteeko bwa bantu.​—Miilo ya Batumua 25:10, 11; Bafilipi 1:7.

 Bibilia ili yalanda paswetele nangue, Yesu aosie basambi bakue, te baaiingiziizie mu politike. Eezi, i nsaambu ili yalengia Bakristu ao Bakasininkizia Bakue Yehova, batwalilile bila kuya bakwasiako ata kaniini ku lubali lolonse. Nga vyaakitile Bakristu ba mu miaka mia ya ku ntendeko, Bakasininkizia Bakue Yehova ni beene, bali bakoonka malaizio akue Yesu. Bali basimikila “eezi mpunda iweeme ya Bukolo.”​—Mateo 24:14, NWT.