Mu myaka 30 yaakipita, bantu bengi bakiba bamwene nangue kunvwana kuli pakati ka byalo paleepale kwakiba kwaimeene sinta, kabili nangue kwakiba kwakila kuwama. Anzia evio, bintu bili mukukitika lonu bili mukwalulula azo mawazo.

•   “Bantu bonvuile mwenzo nangue vita ya Gaza yakaba kukumia ni byalo binge mu kazonga, nga evelia Israeli ni Hezbollah kutendeka kulwana ku mipaka ya Lebanoni.”​—Mpunda kufuma ku Reuters, ya pa nsiku 6, Mwezi wa 01, 2024.

•   “Bikundi bitungulwilue na Iran bili mukusaukila tuzonga paleepale, kabili mukusitukila sie Iran yakitendeka kabili kutengenezia ma bunduki a nyukilia. Kukila pa kako, lonu Urusi ni China bakyaluka ku lubali lumo ni Iran. Bebio byonse bili mukulengia bantu ba mu byalo bya kuzika koba beemoke.”—Mpunda ya The New York Times, ya pa nsiku 7, Mwezi wa 01, 2024.

•   “Vita ya Urusi itwaliliile kuleeta maavia akata mu Ukrainia.”​—Mpunda kufuma ku UN News, ya pa nsiku 11, Mwezi wa 01, 2024.

•   “Kongezeka kwa buvinde bwa nfalanga ni buviinde bwa ki vita bwa China, kongezeka kwa kwitona kwa ba raia ba mu Taiwan ni kukeepa kwa kunvuana ao burafiki pakati ka China ni Amerika kulengiizie aali ya kusyunvuana iye yaleengele sie kukitika.”​—Mpunda ya The Japan Times, ya pa nsiku 9, Mwezi wa 01, 2024.

 Eba, Bibilia ilandile ni kintu palua aali ya nzunge-nzunge ituli mukumona lonu mu kyalo? Ezi aali ya nzunge-nzunge yakaba kutungulula ku vita ya kyalo kyonse?

 Bibilia te yaalandile ntanzi palua vita iibeleele ituli mukumona lonu. Anzia evio, yaalandile ntanzi palua kusalanghana sana kwa vita mu nsiku yetu, kabili kuli mukuzeezia mutende mu kyalo.​—Nfyulo 6:4.

 Kitabu kya Danieli kyaalandile ntanzi nangue, mu nsita ya mpela ntundu ya mu kyalo ili ni maka yakatendeka kutintana ao kufuila kitebe. Koko kufuila bukulu kubiikile mukati kulangilila buvinde bukata bwa ki vita ni kuzeezia bunonsi bwingi ao nfalanga.​—Danieli 11:40, 42, 43.

 Bibilia ilangiliile nangue aali ya kyalo yakaba kukila kubiipa ntanzi ya kunti iwame. Yesu waalandile ntanzi nangue kwakaba lyemo likata lisinamonekepo ntangia kubumbua kwa kyalo. (Mateo 24:21) Lelio lyemo likata lyakaba kutungulula ku vita ili yakuutua Armagedoni, elia ilangiliilue kuya yali vita ya busiku bukata bwakue Leeza wa Maka Onse.​—Nfyulo 16:14, 16.

 Anzia evio, Armagedoni teikaba kwinona bantu, inzi yakaba kubapususia. Kupitila ezio vita, Leeza wakaba kwinona ma buteeko a bantu ali mukulengia bwinooni bwingi buli mukuleetua na vita. Evi umane namuna Armagedoni viyakaba kuleeta mutende wa lonse, soma maasi alandile:

•   “Armagedoni Ni Nini?”

•   “Armagedoni Ni Habari Njema!”