Loonu, kwizuzi sie mpunda palua bantu bali mukulanda bintu bya kusuulana, ao bantu bali mukukita bintu bya bungipaani juu ya kapatulula, bantu bali mukubasaukila benaabo juu ya kupusana sie kwa makabila ni vita.

•   “Loonu, ku bitente bya Enternete bya kubuilana mpunda, kuli maasi engi a kusuulana kuliko ntanzi alengiiziwe na kusyunvuana kuli pakati ka Israeli ni Gaza, pamo ni bantu bali mukusonsezia bungipaani ni kusuulana.”​—Mpunda kufuma ku The New York Times ya pa nsiku 15, Muezi wa 11, 2023.

•   “Kutendekela pa nsiku 7, Muezi wa 10, mukusitukila sie kwakyaluka maasi engi saana palua kusuulana pamo ni bungipaani bulengiiziwe na kapatulula kuliko ntanzi.”​—Mpunda kufuma kuli Dennis Francis, prezida wa Kabungue Kakata ka Buumo bwa Ntundu ya pa nsiku 3, Muezi wa 11, 2023.

 Maasi palua kusuulana, bungipaani ni vita te bya leenu. Anzia evio, Bibilia ili yalondoluela baalia baali balasa milandu ya bungipaani nga mivui, ni baalia baali bakoonkelela vita ni bungipaani musita waapitile. (Malumbo 64:3; 120:7; 140:1) Kakiine, Bibilia ili yatubuila nangue kusuulana kutuli mukumona loonu kuli ni mana ikata.

 Bibilia ili yatubuila nsaambu ibili ilengiizie kusuulana kuye kwaliko saana loonu.

1.  1. Bibilia yaalandile ntanzi musita olia ntono ya bantu bengi luyakakeepa. (Mateo 24:12) Kuliko kulangililana ntono, bantu bakaba kulangilila mibeele elia ili yalengia bantu basuulane.​—2 Timoteo 3:1-5.

2.  2. Kusuulana kukata kutuli mukumona loonu, kulengiiziwe na bukengezi ni bubiifi bwakue Sataana Kibanda. Bibilia ili yalanda nangue, kyalo kyonse kiteekelue na olia mubi.​—1 Yoane 5:19; Nfyulo 12:9, 12.

 Anzia evio, Bibilia ili yatubuila kabili nangue, evi sie leenu Leeza wakaba kufumiapo bintu byonse bili byalengia kusuulana. Kukila pakaako, wakafumiapo maavia onse ali aleetua na kusuulana. Bibilia ilaile evi:

•   Leeza wakabakuusa mensozi onse kufuma mu menso abo, ni lufu telukabako kabili, kabili tekukaba malilo, ao sie kulila ao misa tebikabako kabili. Byakale byonse byakipita.​—Nfyulo 21:4.