Eba Kunti Kyakitika Bantu Bonse Baye Bali ni Buviinde Bumosie bwa Nfalanga?
Mu byalo paleepale bantu bali mukukita mandamano paantu bamwene nangue buviinde bwa kupata nfalanga te bupateene ku bantu bonse. Bobo buavia bwaakikila kukosa mu kipindi kya buluele bwa korona (COVID-19), paantu bwaakilengia bantu bazeezia nsaansa juu ya bipindi bya kukaaniiwa kufuma ku masesi, kupungukilua na bintu bikabiilue, matunzo kukola. Bebio bintu byaakilengia kupusana kwa buviinde kuli pakati ka bapabi ni banoonsi kukile kumoneka.
Eba, bobu buavia bwa kupata nfalanga buli mukuleeta maavia engi ku bantu bwakapua? Een. Bibilia ili yalondolola kintu kyakaba kukita Leeza eevi kupuisia maavia atuli mukupata.
Maavia a kupata nfalanga akapuisiiwa na Leeza
Buavia: Bantu tebanaviinde kupaanga vya kupata nfalanga mu nzila ya kukumania bintu bikabiile bantu bonse.
Kyakapuisia: Leeza wakaba kufumiapo buteeko bwa bantu ni kubiikapo buteeko bwakue muine, buli bwakuutua Bukolo Bwakue Leeza. Bobo Bukolo bwakaba kuteeka kubambila ku muulu mpaka mu kyalo kyonse.—Danieli 2:44; Mateo 6:10.
Mazabo: Paantu Bukolo Bwakue Leeza i bwakaba kuteeka kyalo kyonse, bintu byonse byakaba byakitua pa kyalo byakaba kuya byapuililikile. Bantu te bakaaluka bapabi kabili, ao kuya baema palua kupata bintu bya kubakwasia mu buikazi. (Malumbo 9:7-9, 18) Inzi, bakaba kuya basekelela bintu bibakaba kuya bapata mu miilo yabo, bakaba kuya bali ni buikazi butosiizie kabili bwa nsaansa mu lupua lwabo. Bibilia ilaile eevi: “Bakaba kukuula masesi ni kwikalamo, kabili bakaba kubyala mizabibu ni kulia mazabo akue. Te bakaba kukuula eevi muntu unge ekalemo, kabili te bakaba kubyala eevi bange balie.”—Isaya 65:21, 22, NWT.
Buavia: Bantu te baviinda kufyama aali ili yabaleetela lyemo ni kulengia bapusue na bintu bibakabiile mu buikazi bwabo.
Kyakapuisia: Kupitila Bukolo bwakue, Leeza wakaba kupuisia bintu byonse bili byalengia bantu baye baunvua muenzo ni kwisaanga bila basungilue.
Mazabo: Kupitila kwemenua na Leeza, bantu te bakaba kuya basaakaana ni bintu bya kubalengia beene ni lupua lwabo bazeezie bintu bibakabiile mu buikazi. Nga evelia, vita, kupusua byakulia, maluele tebikakitikapo kabili. (Malumbo 46:9; 72:16; Isaya 33:24) Leeza walanda eevi: “Bantu bane bakaba kwikala mu fuasi ya loonse ya mutende, mu fuasi ya kwikalamo isuungilue, kabili mu fuasi iteekameene ya kutuuziizia.”—Isaya 32:18, NWT.
Buavia: Lingi Bantu bali baliilua pa mitue na bantu bange betonenesie bo beene, kabili bali ni mibeele ya kutona kupata bingi.
Kyakapuisia: Bantu bakateekua na Bukolo Bwakue Leeza bakasambilila kubatona saana bange kuliko vibeetonene bo beene.—Mateo 22:37-39.
Mazabo: Musita Bukolo Bwakue Leeza lubwakaba kuya bwateeka, kila muntu wakaba kusambilila vya kupala ntono yakue Leeza, ntono isiizi kukebasie kwinoonsia iine. (1 Bakorinto 13:4, 5) Bibilia ili yalanda eevi: “Tebikaleeta bubiifi ata bumo aosie bwinooni ku lupili lwane loonse lutakatiifu paantu kakiine kyalo kyakeezula na kumana kwakue Yehova a nga menda vyali aizula mu lyezi.”—Isaya 11:9, NWT.
Bibilia ili yalanda nangue twikeele mu nsiku ya mpeleezio ya keenu kyalo, kabili nangue leenusie Leeza wakaba kufikilizia bulayo bwakue bwa kupuisia maavia a kupata nfalanga. b (Malumbo 12:5) Mukupembelela ozo musita ufike, mafunde a Bibilia kunti akukwasia kuluisia maavia a kupata nfalanga auli mukusaakaana nao loonu. Kwa mufuano, mona maasi ali ni mutue ulandile: “Vya Kwikala ni Bintu Biniini,” ni leelia lilandile “Malanga Ateekameene Palua Nfalanga.”
a Yehova i liina lyakue Leeza nga vilangiliile Bibilia.—Malumbo 83:18.
b Eevi umane juu ya ki tupalile kuiswapila Bibilia, mona lyasi lilandile: “Bibilia—Nsulo Iswapikikile ya Kisinka.”
