•   “Kyalo kya China kyaleeta mpunda kyalanda nangue onu muaka lyuza ‘lipitiliile’ kabili i lya butatu kuya kwali kipindi kya kipua kyakililepo kuliko kale.”​—The Guardian, nsiku 07 Muezi wa 09, 2022.

•   “Likungulu likata saana lili ku katunfi ka Afrika ku buala bwa kutula koba, lyakaba kutwalilila kuya lyalipo mpaka mu muaka wa busano.”​—UN News, nsiku 26 Muezi wa 08, 2022.

•   “Seemu ibili pa itatu ya kyalo kya Bulaya ilimo likungulu likata saana, kabili kimwenekele nangue leeli likungulu likilile kubiipa kuliko leelia lyakibako mu kipindi kya miaka mia isano (500).”​—BBC News, nsiku 23 Muezi wa 08, 2022.

 Bantu bengi basomene saana bali balanda nangue leeli likungulu lyakaba kutwalilila, kabili lyakaba kukila kubiipa kupita paapa. Eba, kunti twaswapila nangue musita uli waiza aali yakaba kuya yaweeme? Bibilia ili yalandapo siani?

 Bibilia yaalandile ntaanzi palua nsiku itulimo:

•   Kwakaba nzala mu fuasi imo kisia mu fuasi inge.​—Luka 21:11.

 Lingi, likungulu lili lyalengia kwaaluka nzala ikata. Leeli likungulu lyalengia kwaaluka nzala ikata, kwema ni nfua, lili mukufikilizia bukabika buli mu Bibilia.​—Nfyulo 6:6, 8.

 Bibilia ili yalanda nsaambu iine ilengiizie likungulu liye lyakilamo kubiipa. Ili yalanda eevi:

•   Muntu ali waenda tali ata na buviinde bwa kutungulula lutanfu lwakue.​—Yeremia 10:23.

 Ezio milandu, yalangilila nangue bantu te bali na buviinde bwa kutungulula ntanfu [yabo] ao kwitungulula bo beene. Lingi, bupinguzi bubali bakita buli bwalengia kwaaluka likungulu ni menda aalukasie a kukebelezia.

•   Bantu bengi basambiliile sayansi, bali mukulanda nangue bintu beelia bili mukuya byakita bantu, bili mukulengia mu kyalo mwaaluka lyuza ni leelio lyuza lili mukulengia kwaaluka likungulu likata mwaya kyalo.

•   Bintu beelia bili mukuya byakita bantu baalia bali bapupumina ni baalia bali babiika mizilo bila kutontonkania palua musita uli waiza, bili mukulengia misitu, ewa, ni bintu byaabumbilue byainooneka ni kulengia menda aalukasie a kukebelezia.

 Inzi, Bibilia ili yatupeela kiswapilo.

 Bibilia ili yalanda nangue Leeza wakaba kupuisia buavia bwa kukebelezia menda. Wakaba kupuisia siani?

1.  1. Leeza wakaba kwinoona baalia bonse bali bainoona kyalo. (Nfyulo 11:18) Leeza wakaba kufumiapo keelia kili mukulengia menda aaluke a kukebelezia, i kulanda, bantu babiipile, bantu baalia bali bapupumina, baalia kupitila bikitua byabo, mazingira ali mukuya ainooneka.​—2 Timoteo 3:1, 2.

2.  2. Ni bulongo bumiiziwe na lyuza bwakaaluka kiziba kya menda kyalimo matete. (Isaya 35:1, 6, 7) Leeza wakaba kuwaamia beelia bili mukwinoonua na likungulu, kabili keenu kyalo, wakaba kukyalula paradiso yatomene buino na menda.

3.  3. Uli waemena kyalo, ni kukilengia kiseeke mazabo engi kabili kinoonke saana. (Malumbo 65:9) Kupitila kupaalua na Leeza, kyalo kyakaba kuseeka mazabo engi, kyalimo ni menda engi aswetele a kukwasia bantu bonse.