TWALILILA KUYA WAKENTELE!
Eba, Masindano a Kikombe kya Kyalo mu Musaapo wa Kabumbu Kunti Akwatania Bantu Kakiine?—Bibilia Ili Yalandapo Siani?
Mu kulingilila, bantu bilioni isano eevi baswapiilue kukoonka Masindano a Kikombe kya Kyalo a FIFA, kubambila pa nsiku 20, Muezi wa 11, mpaka pa nsiku 18, Muezi wa 12, 2022. Bantu bengi bamwene nangue ezio misaapo ya evio, ili ni buviinde bwa kufikilizia bintu bingi bikilile ni pa kukwatania bantu musita ubamweneneene misaapo ezio.
“Misaapo ili ni buviinde bwa kwalulula kyalo. Ili ni buviinde bwa kuleeta maka. Ili ni buviinde bwa kukwatania bantu mu nzila iibeleele saana.”—Nelson Mandela, kateeka wa kale wa mu Afrique du Sud.
“Musaapo wa kabumbu . . . uli wakwatania bantu paantu uli wabalengia baaluke ni kiswapilo, nsaansa, basekelele, baye bali ni ntono kabili bali ni kintu kya kubakwatania.”—Gianni Infantino, mukulu emaniine FIFA. a
Eba, Masindano a Kikombe kya Kyalo ao misaapo inge kunti byafikilizia bebio bintu? Kuli ni busiku bwakakwataniiwa bantu ni kwikala mu mutende?
Eba, masindano a kikombe kya kyalo kunti akwatania bantu?
Masindano a Kikombe kya Kyalo a onu muaka, alengia bantu batontonkanie bintu bingi bikilile pa musaapo wa kabumbu. Ezio misaapo yalengia bantu batendeke kulondoluela palua buikazi bwa bantu ni bintu bya politike kubiika mukati ni nsaambu ya bantu, bukapatulula, ni palua bantu kuya bapuseene mu buviinde bwa nfalanga.
Anzia evio, bantu bengi bamwene nangue kukitika kwa misaapo ya kyalo kyonse, nga evelia Masindano a Kikombe mu Kyalo, kuli kwakwasia bantu besaansamusie. Anzia evio, atasie kine bantu bali basaangua baitonene saana, ezio misaapo teiviinda kuleeta buumo bwa loonse. Inzi lingi, ili yaleeta aali ya kukasanika, kabili ni mibeele elia yaalandile Bibilia nangue yakalangilila kipindi kya nsiku ya mpeleezio.—2 Timoteo 3:1-5.
Kiswapilo kya kisinka palua kukwataniiwa kwa bantu
Bibilia ilondoluele kiswapilo kya kisinka palua kukwataniiwa kwa bantu mu kyalo kyonse. Ilaile nangue bantu bonse pa kyalo bakakwataniiwa mu buteeko bwa ku muulu buli bwakuutua nangue Bukolo Bwakue Leeza.—Luka 4:43; Mateo 6:10.
Yesu Kristu, Likolo wa bobo Bukolo, wakasininkizia nangue kwakaba mutende mu kyalo kyonse. Biblia ili yalanda eevi:
“Wa nsaambu wakaba kuvumba, ni mutende wakaba kuvula.”—Malumbo 72:7, NWT.
Wakaba kubapususia bapabi baalia bali balilila kukwasiiwa . . . Wakaba kubapususia kufuma mu kutitikilua ni mu bungipaani.—Malumbo 72:12, 14.
Atasie loonu, masambilizio akue Yesu akwatania kale ma milioni a bantu mu byalo 239. Bakisambilila kulekela kusuulana. Kine ukebele kumana bingi soma maasi ali ni mutue ulandile, “Mambo ya Kufanya Juu ya Kuachana na Chuki.”
a Fédération Internationale de Football Association, the international governing body for association football (soccer).