TWALILILA KUYA WAKENTELE!
Naani Wakaba Kupusula Baraia?—Bibilia ili Yalandapo Siani?
Mpunda kufuma ku Buumo bwa Ntundu yakilanda eevi:
Kutendekela pa nsiku 7 mpaka nsiku 23, Muezi wa 10, 2023, kusyunvuana kuli pakati ka Gaza ni Israeli kwakilengia bantu bakilile pa 6 400 baipaiwe ni 15 200 bakisike, ni bengi pakati kabo ni baraia. Kukila pakaako baraia bengi bakibutukila fuasi inge.
Ni kufikiila pa nsiku 24, Muezi wa 09, 2023, vita ili pakati ka Urusi ni Ukrainia, yaakipaya kale baraia 9 701 ni 17 748 bakisiiziwe mu Ukrainia.
Bibilia ibapeele kiswapilo ki baalia bali mukwemiiwa na vita?
Nsaambu ilengiizie kuye kwali kiswapilo
Bukabika buli mu Bibilia bwalanda nangue, Leeza wakapuisia vita pa kyalo kyonse. (Malumbo 46:9) Wakaba kubombia buteeko bwa ku muulu ao Bukolo, eevi kufumiapo ma buteeko onse a bantu. (Danieli 2:44) Bukolo Bwakue Leeza bwakaba kulengia bantu bakabe kwikala bateekameene.
Mona bintu byakaba kukitua na Yesu Kristu, Likolo wa Bukolo Bwakue Leeza:
Paantu wakaba kupususia mupabi olia ali walila eevi akwasiiwe pamo ni muntu wa pansi ni muntu onse asili na muntu wa kumukwasia. Wakamunvuila nkumbu muntu wa pansi ni mupabi, kabili wakapususia bukose bwa mupabi. Wakabapususia kufuma mu kutitikilua ni mu bungipaani.—Malumbo 72:12-14.
Kupitila Bukolo bwakue, Leeza wakaba kufumiapo kakiine bulanda ni lyemo lili lyaleetua na vita ni bungipaani.
Wakabakuusa mensozi onse kufuma mu menso abo, ni lufu telukabako kabili, kabili tekukaba malilo, ao sie kulila ao misa tebikabako kabili. Byakale byonse byakipita.—Nfyulo 21:4.
Eevi sie leenu, Bukolo Bwakue Leeza, bwakaba kwingilila pa kati ka bintu bili mukukitika mu kyalo. Bibilia yaalandile ntanzi palua vita ni mpunda ya vita ituli mukumona loonu. (Mateo 24:6) Beebi bintu ni bingeko, bilangiliile nangue twikeele mu nsiku ya mpeleezio ya buteeko bwa bantu.—2 Timoteo 3:1.