Echi bamíali de servicio 2021, a we jilí nili echi nawilí COVID-19 jitra. Japi riká ruyeli echi artículo riwéami “Omáana wichimóbachi nijí iʼwírili japalí nirú echi pandemia”, ata suwábili millones de dólares b alí 950 Comités de Socorro nóchali iʼwírimia echi hermanos.

 Japalí niruili echi pandemia omáana kawichí, ayénachó niruili o ikili jarecho si namuti chati japi echi pagótami iyiri nili alí echi hermanos achó risoa ikili echi jitra. Jiti la echi Comité de Coordinadores japi nocha echi Japi Aʼlá Niseri yúa, nulali japi auché 8 millones de dólares néema jiti iʼwírima 200 jaréanami japoná risoa ikili. Ma inepo japi chúriká néeli echi winomí japi ta nijí okuánika japoná ikili namuti we jilírami.

 22 inárachi mayo bamíali 2021, echi volcán Nyiragongo, buyali echi lava anelíami, echomí República Democrática del Congo. Echi lava najúnali kalí, escuelas alí echi baʼwí japi jariweka manali. Wiká rawé echi volcán machí pa wilili napisó japi chati nili echoná ciudad Goma alí wisabé nokeli echi kawí. Wiká pagótami buyali echoná jonsa, alí wiká cientos de miles miná júmisili alí simíali echoná Ruanda.

 Ayénachó 5,000 testigo Jeobá nili japi machí awátami nili. Jaré ko ma ke olá japoná pirélima jiti najuli echi volcán jitra alí jaré ko chiwánili japalí ma ke mochili echoná. Echi comités de socorro japi nirú echomí Ruanda alí República Democrática del Congo napawika nóchili. Echi hermanos echoná sucursal echomí Congo (Kinshasa) tamó ruyé bilé echi comités jitra: “Kecho bijí machí awáachi, echi comité ma chotásili rojachia koʼwáami, baʼwí, wisoli alí chiní, tákoré echoná ciudad ma we cha riweili”. Bilé ciudad japoná simíali simírikami 2,000 hermanos, bilé comité de socorro jáwili tiendas de campaña alí rojánili cubrebocas, alí achó ruyeli japi riká nokimea jiti ke nachuma echi COVID-19 jitra alí echi cólera.

 Bikiá michá simírisa, echi hermanos ko ma rojáchili 6 toneladas echi arroz, alí 6 toneladas harina, simírikami 8,000 litros aceite japi néeliwa koʼwáami wásimia alí simírikami 8,000 litros baʼwí jitra. Jiti ke me wiká winomí suwábima, echi sucursal ko anili japi echoná ciudad ralimea koʼwáami jiti ke biléana jonsa tomea.

 Bilé hermana ko aní: “Ata we risoa nilie”. Echi volcán najúnali echi kalila japi kulíwami nili, nalí echi alí echi téemala nareli japi newaleli alí echi jiwérali echi Biblia jitra. Jipi ko echi hermana aní: “Matétarabá Jeobá, ata olá japi ta newalé. Alí ata iné japi Jeobá nikúurola jitra ke me jilí ju anachia echi namuti we jilírami japi ta ikí”.

 Echoná Venezuela ma wiká bamíali ju japalí jonsa ke me nirú winomí. Ke me nirú koʼwáami alí nirú wiká pagótami chati. Echi hermanos japi piré echoná, a we risoa nilia piré. Nalí, echi Jeobá organizaciónwala ke riwé iʼwiria.

 Echi bamíali de servicio japi ma simírili, ata suwábili simírikami bilé millón aminá nasipa dólares jitra, ralayá koʼwáami alí jabón, tóolimia echi hermanos japi wabé risóati ju. Echi hermanos echoná sucursal echomí Venezuela ruyé: “A we jilí ju toyá suwaba michá 130 toneladas koʼwáami, omáana echoná país japoná piré echi hermanos”. Jiti echi koʼwáami ke chokólima, echi hermanos ko ralá namuti japi ke chokóliami ju. Echi hermanos ayénachó aní: “Wiká koʼwáami japi ta too, ata ralá japalí wiká nirú jiti ke me natéami nima. Alí jiti oméripo toyá, ata nee namuti japi ke newaléliwa winomí”.

 Leonel ko we kanili nocha echoná Comité de Socorro echomí Venezuela. Echi ko aní: “Nochia echoná labores de socorro a we natéami ju nijé jitra jiti tamí kuʼiri jiti ni ku kanílima jiti nijé upila mukuli COVID-19 jitra. Jiti ni olá jena nóchali, ani sinibí namuti isiá iyena alí ani omeri iʼwiria echi hermanos japi newalé. Ani iné japi Jeobá ko sinibí isimí japi echi aní japi ke siné riwema japi binoy puéblowala ju”.

 Bilecho hermano japi chabé nóchili echoná comité de socorro, jériká aní: “Jipi ko nijé nili japi newaleli japi tamí iʼwírima. Ke ti bi nareli koʼwáami. Echi hermanos ayénachó tamí iʼwírili alí nijé upila jiti ta kilí nílipo, ayénachó tamó ku kanílitili alí tamó tibuli”.

 Jaré namuti chati chuwétali ikí. Nalí echi hermanos ko we sapuka olá alí rojacha echi namuti japi newaléliwa, matétarabá jiti emi nijí winomí japoná jéaní “Winomí jiti omáana piréami ruyérami nima echi raʼíchali kalabé”. Echoná donate.pr418.com a timí inepo chúriká timí nijibo winomí. Ata walú matétarabá emi iyá jiti timí nijí winomí.