Jena kuwachimi rawé “námabo wikanami nakónalawachi” (Mateo 24:6). Jiti la wiká hermanos risoa nílika piré, nalí be sinibí iʼwíritami ju. Ata kilí nílili kipúa Japi nawesa echi japi Aʼlá Niseri 2022 #3, japi echoná Europa del Este echi hermanos jiwérika noká iʼwiria echi hermanos japi risoa nílika piré echi nakówami jitra echomí Ucrania. ¿Chúriká noká iʼwiria tákoré nirú nakówami? ¿Chu nili echi hermanos japi iʼwíritami ju?

 24 inárachi febrero 2022 japalí kulí chotásili echi nakówami, echi Comité de Coordinadores risensia nijili jiti néema winomí iʼwírimia echi hermanos. Miná ko, echi sucursal echomí Ucrania chotásili ralayá japi newaléliwa alí echi 27 Comités de Socorro a nachútili.

 Echi hermanos japi nocha echoná central mundial de los testigos de Jeobá, chotásili natia chúriká omérima iʼwiria echi hermanos japi nocha echoná sucursal echomí Ucrania. Echi Comité de Coordinadores alí Publicación japi iʼwiri echi Japi Aʼlá Niseri, aneli echi Departamento Mundial de Compras japi napawika yúa nochama echi hermanos japi nocha echoná sucursales echomí Ucrania alí Polonia. Jaré hermanos echi departamentos de Compras, Envíos alí Asuntos Legales jepuná sucursales, ayénachó bilé hermano japi nocha echoná Comité de Sucursal echomí Ucrania alí jaré hermanos echi Departamento Mundial de Compras, sinibí rawé napawika nátili chúriká nochama.

 Jay Swinney, japi nocha echoná Departamento Mundial de Compras, jéaní: “Bachá ko ti machisáré piri namuti newalé echi hermanos, japi riká koʼwáami alí echi namuti japi newalé jiti biʼwíami nima alí japi chopi iyiri nima japi riká echi ko nee. Nalí ma machisaa japi newaléliwa, ayénachó we jilí nili machiyá chúriká julama echomí Ucrania”.

 9 inárachi marzo 2022, echi hermanos ma machili piri namuti julásaré. Jariweli cajas japoná muchúwali latas sapá alí rochí muchúwami, cereales, arroz, muní alí papel higiénico. Echalí echi hermanos nátili, jiti jepuná namuti rojorama bilé mechá, natétima 65 dólares ibili niraa pagótami. Jiti wiká miles hermanos newalémiré jepuná namuti, echi Comité de Coordinadores risensia nijili jiti néema wiká winomí júulimia jepuná namuti. Nalí, ¿chúriká nachútima jepuná namuti alí aʼlá tibuma jiti ke namú ikimea?

 Jiti machimea chúriká tomea echi namuti, 13 inárachi marzo okuá hermanos Polonia bitéami, tóoli jaré namuti sucursal Polonia jonsa aminá bilé almacén echoná Ucrania, mulipi echi ciudad de Leópolis (Lviv). Jaré rawé kecho bijí séachi japalí tomea echi namuti echomí Ucrania, echi hermanos japi nocha echoná sucursales echomí Ucrania alí Polonia, iʼwírili machiyá chúriká nokimea. Jepuná hermanos risensia tánili echi gobierno jiti omérima moʼiyá echoná Ucrania iʼwírimia echi japi newalé, ayénachó echi hermanos osali letras echoná trocas japi anili japi echoná torúami nili wiká namuti iʼwírimia jarecho. Echi hermanos Ucrania piréami, iʼwírili machiyá chu iyiri buwérili we sapuka nawama bilé almacén echoná Leópolis. Ke simírili 24 horas japalí echi hermanos nachútili echi namuti néeka echi Comités de Socorro alí echi okuá hermanos we aʼlá ku roʼili echoná Polonia. Suwaba jepuná namuti ikili jiti echi hermanos we aʼlá nátika nokali alí matétarabá echi Jeobá nikúurola.

 Japi nokali echi hermanos we aʼlá nili, nalí pe bilé tonelada bi tóoli echi namuti jitra iʼwírili iyasia echi hermanos (1 tonelada estadounidense). A bijí tosá riweili 200 toneladas (220 toneladas estadounidenses). ¿Chúriká we sapuka tóolima jepuná namuti alí nachútima?

 Japalí leérili echoná jw.org japi echi hermanos we risoa nílili, wiká pagótami omáana piréami a iʼwírinali. Japi we miká piré echoná Ucrania jonsa, echi ko iyali winomí jiti machili japi we aʼlá néerami nima echi winomí. Jarecho ko japi a mulipi piré echoná Ucrania, ayénachó iʼwírili sinucho niraa. Jepuná ju jaré ejemplos.

 Echomí Polonia wiká hermanos iʼwírili akarewia echi cajas, alí wiká kuuchi ayénachó niwali iyóktami. Bartosz Kościelniak, japi nocha echoná Departamento de Compras echi sucursal echomí Polonia, jéaní: “Salmo 110:3 aní japi echi Jeobá puéblowala animea japi a nochánali Jeobá jitra. Ani wisabé leérili jepuná, nalí be ke ni sineti ineli japi echi pagótami sinéami ka napawika nokimea iʼwiria”.

 Bilé hermano tanéwili jaré camiones alí ayénachó natétili echi gasolina jiti torúami nima echi namuti. Echi ko jéaní: “Echi riká ni néwariwéliti japi ni we galé echi hermanos alí Jeobá. Ani we kanili japalí ni echi riká isili”. 7,700 litros echi ikí roérami gasolina alí wiká hermanos iʼwírili melia echi camiones ne nokí 48,000 kilómetros.

 Matétarabá echi hermanos we galéami japi iʼwírili echi 28 inárachi marzo, ma torúami nili 100 toneladas (110 toneladas estadounidenses) koʼwáami jitra, namuti jiti biʼwíami nima alí ayénachó suwaba japi ówami nili japi newaléliwa. Ke me suwíali echi winomí jiti wiká hermanos nijili echi namuti japi newaleli. Echi testigos Jeobá ma júali echomí Ucrania simírikami 190 toneladas (209 toneladas estadounidenses) echi namuti jitra japi newaléliwa. ¿Chu nili echi hermanos japi nareli echi namuti?

 Japalí sili echi namuti japi newaleli echomí Leópolis, echi Comités de Socorro echoná Ucrania nachútali echi namuti. Wiká echi namuti torúami nili jaréanami ciudades 1,300 kilómetros Leópolis jonsa. Tákoré echi hermanos we aʼlá nátika nokali, nalí a we wilí nokali. a

 Markus Reinhardt, japi nocha echoná Comité de Sucursal echomí Ucrania, jéaní: “Japi riká ikí echoná Ucrania, echi hermanos a iné japi Jeobá we galéami ju alí we natéami ju aʼlá nijéwilia japi nulá echi organización kecho ikíachi namuti jilírami. Japi riká, sinéami tamujé tamó aneri japi napabupo echi koʼwáami alí baʼwí japi ta newalé japoná ti piré jiti rojorama wilibé tarali. Bilé anciano japi riwéami ju Anton alí simí bilé congregación echoná Kiev, jéaní: ‘Ati matétara iyá echi organización jiti tamó aneli piri ta nokiboa a echi riká ikisáaká. Tamó iʼwírili olayá koʼwáami, baʼwí alí bilé radio jiti ta ke suwiboa’. We aʼlá ju japi echi hermanos we aʼlá nijéwili echi organización; echi riká echi sucursal a ikírili iʼwiria echi hermanos”.

 ¿Chu nílili echi hermanos japalí iʼwíritami nili? Míkola alí Zinaida, japi piré echomí Járkov, jéaní: “Ati we simá nílili japi echi hermanos nátili tamujé jitra. Waʼlú matétarabá echi koʼwáami jitra alí echi ówami. Suwaba jepuná néwariwéliti japi Jeobá ju japi echi riká isimí”. Valentina, japi ayénachó bité echomí Járkov, jéaní: “Japalí chotásili echi nakówami, a we jilí nirali ralayá echi koʼwáami jiti wiká pagótami simibie ralisia, alí ke me sinibí niruili echi namuti japi ta newalé. Nalí Jeobá ko we aʼlá machili japi ikísimi. Jiti la, echi ko isili japi echi hermanos tamó iyama echi namuti japi ta newaleli. Japalí ikí namuti we jilírami a nátiliré japi ma ke ku kariwema, nalí be Jeobá alí echi organizaciónwala mi iʼwírima. A we simá ju japalí ti iʼwíriliwa japalí ta newalé”.

 Evguen, Irina alí Mikita, japi júmisili Mariúpol jonsa, aní: “Ati emi waʼlú matétarabá iyá jiti timí we aʼlá alí we simárika tamó tibú alí tamujé téemala. Jiti ta nareli echi namuti japalí ti newaleli. Ne kulí ko, ati nátili japi echi cajas olá koʼwáami bi, nalí echi ko tamó néwariwélitili japi ta we galéliwa”.

 Echi Jeobá iʼwírala jitra, ati omérili toyá echi namuti japi newalé echi hermanos, tákoré nirú nakówami. Ayénachó echi winomí japi timí nijí echoná donate.pr418.com, we tamó iʼwiri. ¡Waʼlú matétarabá sinéami jiti timí we kanílika nijí!

We ti sapú noká iʼwiria alí aʼlá tibuka

1. 24 inárachi febrero 2022: Echi Comité de Coordinadores risensia iyá echi sucursal japi wilí echomí Ucrania jiti néema echi winomí iʼwírimia echi hermanos.

2. 24 inárachi febrero aminá 8 inárachi marzo 2022: Echi sucursal japi wilí echomí Ucrania, ralá echi namuti japi newaléliwa alí chotasi rojachia, néeka echi Comités de Socorro. Echi sucursal ayénachó ma aʼlá machí chúriká isima narea echi namuti japi Polonia ka jonsa sii.

3. 9 inárachi marzo 2022: Echi Comité de Coordinadores risensia iyá jiti Ucrania narema echi namuti japi juáliwa echoná.

4. 10 aminá 12 inárachi marzo 2022: Raʼicha chúriká nokimea toyá echi koʼwáami alí jarecho si namuti echoná Polonia jonsa aminá Leópolis (Ucrania).

5. 13 inárachi marzo 2022: Ma simía toyá echi koʼwáami alí jarecho si namuti echoná Polonia jonsa aminá Leópolis.

6. 14 aminá 16 inárachi marzo 2022: Echomí Polonia, echi hermanos japi nocha echoná Departamento Local de Diseño alí Construcción, napawí biléana Salón de Asambleas japi mulipi ju echoná ciudad Poznań, cájachi muchuwamia echi koʼwáami alí jarecho si namuti.

7. 17 inárachi marzo 2022: Ma simírisa naó rawé japalí torúami nili echi bachá namuti, checho chotasi toyá 13 toneladas (14 toneladas estadounidenses) echi namuti jitra japi newaléliwa echomí Ucrania.

8. 21 aminá 27 inárachi marzo 2022: Echoná Polonia aminá wiká namuti muchuwáliwa echoná cájachi alí juáliwa echomí Ucrania. Alí bilé rawé kaachi ko ma nijili echi koʼwáami alí jarecho si namuti echomí japoná aminabi newaléliwa.

9. 28 inárachi marzo 2022: Japalí jonsa risensia iyáari jiti Ucrania narema echi namuti, echi ko ma nareli 100 toneladas (110 toneladas estadounidenses) echi koʼwáami jitra, ówami alí jarecho si namuti.

 Jipi chéami, echi testigo Jeobá ati júali echomí Ucrania 190 toneladas (209 toneladas estadounidenses) echi namuti jitra japi newaléliwa.