“¡19 bamíali buweli!”. ¿Piri buweli echi hermano? Echi Traducción del Nuevo Mundo de las Escrituras Griegas Cristianas japi riká binoy raʼicha, bengalí. Wiká pagótami ayénachó echi riká aní japalí naré echi Traducción del Nuevo Mundo japi riká aboi raʼicha. Nalí, ¿ami nárika isíiré chu ikí nóchali olá jiti niwárami nima echi Biblias?

 Bachá, echi Comité de Redacción alí echi japi Aʼlá Niseri aní jépuká si nakúurima traduciria. ¿Chu ikí bamíali newalé jiti traducírima echi Biblia? Nicholas Ahladis, japi nocha echoná Servicios de Traducción echomí Warwick (New York), aní: “Ati machisare jaré namuti, japi riká chu ikí hermanos a oméroma nochia, achi we jilí nima japi riká raʼicha o achi echi lectores machí chúriká pireili chabé. Ayénachó machisare japi echi raʼíchali japi raʼichawa echoná ke sinúrika raʼichawa biléanami. Isini kaachi echi hermanos, bilé o bikiá bamíali ma noká traduciria echi Escrituras Griegas Cristianas, alí naó bamíali o aminá traduciria suwaba echi Biblia. Echi Biblia japi traducíriwa señas niraa rasía wiká bamíali noká”.

 Traducíriwa echi Biblia a newalé jarecho hermanos japi si nochama. Jepuná hermanos japi ma ochérami ju, remalí, o jaréanami países piréami ma, nocha japalí aboi omero nakuuria leeria japi traducíriwa. We natéami ju japi aní echi hermanos jiti japi traducíriwa we aʼlá nima, ne bichíwali, alí jiti we aʼlá námima. Bilé hermano japi echomí Sudáfrica bitéami ju, alí japi bineri jarecho hermanos chúriká we aʼlá traducírima echi Biblia, aní: “Echi traductores ko machí japi we aʼlá nochásaré jiti Jeobá níwala ju, alí echi pagótami ju japi leérima echi Biblia”.

 Japalí ma sunisa traduciria, a imprimíriwa alí Biblias niwaliwa. Jiti echi riká niwama néeliwa máquinas japi newalé 10 namuti japi riká: papel, tinta, material para la cubierta, pegamento, revestimientos para la cubierta, película de plata, cintas, cabezadas, cartón para el lomo alí refuerzo. Echi bamíbali 2019 suwábali aminá 20 millones de dólares pe echi bi namuti ralayá. Echalí bamíali echi hermanos nóchali 300,000 horas, imprimiria alí júulia echi Biblias.

 ¿Chúsiá we nocháliwa alí we suwabi winomí niwayá echi Biblia? Joel Blue, japi nocha echoná Departamento Internacional de Impresión, aní: “Echi Biblia we natéami ju jiti Onorúami raʼicháala ju”. Ayénachó aní: “Ata nakí japi Walubéala anérami nima Jeobá alí japi ta bineri”.

 Ayénachó niwáliwa Biblia Traducción del Nuevo Mundo jiti echi pagótami japi ke ipú alí japi ke machili omérima binea. Japi riká, echi Traducción del Nuevo Mundo braille niraa a nirú 10 niraa raʼicháliami. Niwaliwa suwaba bilé Biblia braille niraa a nokiwá 8 horas niwayá, alí suwaba echi oselí napawika 2,3 metros ju (7,5 pies). Ayénachó niwaliwa Biblia echi pagótami jitra japi erta muchuwi, jiti echoná ko pe riwéliwa bi echi oselí japi papel jitra pólitami ju.

 Echi Traducción del Nuevo Mundo japi biné echi binéami a iʼwiri. Japi riká, echi hermanos japi napawí echoná congregación japoná raʼicháliwa kiluba, echomí La Tombe (República Democrática del Congo). Jepuná pueblo we miká ju 1,700 kilómetros (1,000 millas) echoná capital jonsa. Echoná echi hermanos olali pe bilepi bi Biblia kiluba niraa raʼicháliami alí ma we chabéwami nili. Japalí echi hermanos biné japi binérima echoná napawíliwachi, tanéwika nokayé jarecho hermanos yúa echi Biblia jiti bilepi bi olali. Nalí be, agosto bamíali 2018 jonsa, sinéami echi hermanos echoná congregación ma olali aboi níwala echi Traducción del Nuevo Mundo kiluba niraa raʼicháliami japi riká raʼicháliwa jipi rawé.

 Echi Traducción del Nuevo Mundo revisada alemán niraa, bilé hermana anili jepuná jitra: “Nijé ko ma ke jéaní japi ni leérima echi BibIia. Jipi ko ni jéaní: ‘¿Chu ni kabú che ikírima jiti ni leérima echi Biblia?’”. Bilé pagótami japi éritami nili osali: “Ani iyairi bilé Traducción del Nuevo Mundo, alí japi ni biné a tamí iʼwiri. Ke ni siné aʼlá inamie echi Onorúami raʼicháala, nalí japalí ni chotásiki leeria na traducción a ni we aʼlá inami. Ani we kanílisa nili che machiyá echi testigo Jeobá alí piri ni isísaré jiti ni echi riká cho isima”.

 Echi japi leeri Traducción del Nuevo Mundo echi ko matétara iyá echi winomí jitra japi nijí sinéami echi hermanos jiti omérima niwayá echi oselí. Wiká jepuná winomí a nijíliwa echoná página internet donate.pr418.com. Matétarabá jiti timí we kanílika nijí.