Echalí michá enero 2021, echi Japi Aʼlá Niseri anili japi machínima bilecho libro binemia echi Biblia echi pagótami yúa, japi rewé We mi kanílika bitélima. a ¿Chu nílili kipúa japalí aniri echi anuncio? Matthew, japi piré echomí Canadá, aní japi chu nílili: “Ani aniki: ‘¿A bichíwali nima?’. Alí, japalí ni kipuki echi discurso alí ni ineki echi videos japi ruyé chúsiá niwáari echi libro alí chúriká néerami nili kecho nijía, aminabi ni we kaníliki. ¡Ani we kanílisa nilie ma inea alí ma ni néenilie!”.

 Jepuná publicación a olá kulíwami namuti japi riká binéripo, nalí ke echi bi ju echi kulíwami namuti japi niruli chabé ka jonsa. Ma mi inéliré jena libro, achi mi inéliré japi suwinárika niraa ju. ¿Ami machinali piri ju? Ma inepo chúriká niwárami ju echi libro We mi kanílika bitélima.

 Japi runáami ju echi papel. Niwamia echi libro We mi kanílika bitélima, a newaléliwa bilé papel japi we runáami ju mapujiti olá wiká iyóktami, a wikabé olá echi libro Piri binepo yúa. Ayénachó, echoná libro echi páginas ke me bochíwitami ju echi dibujos alí echi letras jitra. Jepuná okuá namuti a keʼré japi ke aʼlá nima, jiti japalí echi papel ke runáami ju, okuanáchina páginas machílima echi letras alí echi dibujos. Jiti ke echi riká ikimea, echi hermanos japi nocha echoná Departamento Internacional de Impresión echomí Wallkill (Nueva York), nokali jaré namuti néea naó papeles japi ta ma néeli chabé jiti inema chu iyiri aʼlá nima. Echi Comité de Redacción japi iʼwiri echi Japi Aʼlá Niseri, anili chu iyiri nima echi papel japi néerami nima, tákoré rasíruka natéami ju, jiti echi ko iʼwírima echi binéami aʼlá binea jiti ke machíliami ju echi letras alí dibujos japi kuwana uchuwi.

 Laminado aneliwa. Tákoré jarecho libros a rapáami ju echi poala, na oselí ke me rapáami ju jiti a we simá inema echi iyóktami alí ayénachó echi laminado kuʼíroma jiti echi libro ke me chiwama japalí ta nee. A bichíwali ju japi echi laminado ke rapáami a we rasíruka natéami ju, jiti la jaré sucursales napawika nóchali aa echi laminado ke rapáami japi ke me natéami ju.

 ¿Chúsiá néeli echi namuti japi we natéami ju? Bilé hermano japi nocha echoná Departamento Internacional de Impresión tamó ruyé: “Jiti jepuná libro a we néerami nima, echi riká niwáari jiti ke sapú chiwama”. Eduardo, japi nocha echomí Oficina de la Imprenta echoná sucursal echomí Brasil, jéaní: “We ti kanili japi echi organización niwali jena libro japi we semati ju echi namuti jitra japi ke sapú chiwama, echi riká ke wiká winomí suwábali”.

 Tamujé chotásili imprimiria echi libro We mi kanílika bitélima marzo 2021 COVID-19 kaachi, jiti la we jilí nili. Echoná Betel ke omérili bakiyá echi hermanos japi iʼwiri japi riká voluntarios, alí ayénachó ke omérili bayea jarecho hermanos japi nóchima japi riká betelitas. Jiti la, kuabi hermanos niruili echomí Betel, alí jaréana países echi isélikami nuleli echi hermanos japi érima echi imprentas.

 ¿Chúriká nokali? Japalí ma ku omérili imprimiria, echi betelitas japi nóchili jaréana departamentos iʼwírili jiti echi libros imprimíritami nima. Joel, japi nocha echoná Departamento Internacional de Impresión, jéaní: “Echi betelitas we kanílika tamó iʼwírili alí bineli chúriká nochásaré, jiti la ati omérili nokayá echi nóchali japi olali”.

 Ata omérili imprimiria wiká millones echi libros, tákoré ikili namuti jilírami alí imprimírimia echi libro We mi kanílika bitélima néerami nili wiká namuti, japi riká planchas de impresión, laminado, papel, tinta alí pegamento. Echi malí michá japi ta nokali imprimiria, ma suwíali 2.3 millones dólares néea echi iyiri namuti. Jiti ke me wiká suwábipo echi winomí, ati iʼwérili noká imprimiria echi libros bi japi newalema echi congregaciones.

 ¿Piri nata echi hermanos jena libro jitra? Bilé hermano Paul riwéami, japi Australia bitéami ju, jéaní: “We ni kanili bineria echi pagótami néeka jepuná libro. We tamí baʼori jiti we aʼlá ruyé, olá wiká preguntas, videos, imágenes, tablas alí japi isísaré echi binéami. We semati ju, nijé ko aminabi aʼlá binériami nínali néeka jena libro”.

 Bilé binéami japi bité echomí Estados Unidos jéaní: “We ni baʼori echi kulíwami libro. Echi imágenes tamí iʼwiri aʼlá inamia echi namuti we natéami. Alí echi videos tamí iʼwiri nijewia Jeobá ne sulachí jonsa alí isiá japi ni biné”. Jepuná binéami sinibí tarali simí napawíliwachi alí biné echi Biblia osá niraa suwaba tarali.

 A bijí ti newalé japi imprimíritami nima millones jepuná libro suwinárika raʼicháliami. Echi hermanos Japi Aʼlá Nisériami ju, risensia nijili jiti echi libro buyama 710 raʼicháliami, echi ko ju 340 simírikami raʼicháliami echi libro Piri binepo yúa.

 ¿Kumi jonsa machibú echi winomí japi newaléliwa? Echi winomí jitra japi nijí sinéami echi hermanos. Wiká jepuná winomí a nijíliwa echoná página internet donate.pr418.com. Matétarabá jiti timí we kanílika nijí, echi riká ti omeri niwayá kulíwami libros jiti echi pagótami binema echi Biblia jitra, machimea Jeobá alí sinibí kanílika pirélima (Salmo 22:26).