Ma makoy bamíali ju japalí ta jonsa nee echi carritos. Jena carritos japi olá wiká oselí sinéami pagótami iné omáana kawichí. Japalí echi pagótami iné bilé carrito, ma machí jépuká ti ju. We semati ju alí ke jilí ju néeliwa. Bilé hermana Polonia bitéami, Asenata riwéami, anili: “We semati ju alí ke jilí ju tomea japomí ta tonali”.

 ¿Ami siné kaachi nárika isili chúriká niwáliwa echi carritos?

 Bamíali 2001, echi Japi Aʼlá Niseri aneli echi hermanos Francia piréami japi nawisama sinucho riká echi exhibidores jitra. Echi ko néeli maletas de ruedas alí carritos de compras jiti muchuwama echi oselí. Echi hermanos sucursal muchúwami anili chu iyiri nima echi carritos alí néeli wiká bamíali.

 Japi nokali echi hermanos echomí Francia we aʼlá nili. Jiti la, bamíali 2011 echi Japi Aʼlá Niseri anili japi néema carritos alí mesas echoná predicación pública echomí Nueva York (Estados Unidos). Echi precursores japi nawésili, anili japi we aʼlá nili alí ke me jilí nili anajúchina toyá. Nalí be, echi ko anili japi aʼlá nima japi wabé aʼlárika niwama. Echi carrito japi bachá niwali, madera jitra niwárami nili alí we jilí nili jimia alí tikinia escalones, jiti la ke me bitíami niwali. Alí ayénachó niwali waʼlú ruedas jiti ke me jilí nima towá. Ayénachó niwali bilé cajón jiti muchuwama oselí.

 Japi ikili echomí Nueva York we aʼlá nili. Jiti la bamíali 2012 echi Japi Aʼlá Niseri anili japi néema carritos omáana kawichí. Jiti la, tánili echi fabricantes japi niwama wiká we aʼlá carritos.

 Pe aminana, wabé aʼlárika niwali echi carritos. Bamíali 2015 a niwali bilé namuti japi jitra pólima jiti ke sampama. Bilé hermana Dina riwéami japi bité echomí Georgia, anili: “Echi oseli aʼlá tibútami ju jiti echi carrito olá japi jitra póolipo”. Bamíali 2017 chotásili néea carteles magnéticos jaré raʼicháliami niraa. Tomasz, bilé hermano Polonia bitéami, aní: “Iyea alí uchayá echi carteles we jilí nili. We nalí echi carteles magnéticos ke me jilí ju”. Bamíali 2019 jonsa, echi carritos sinucho riká namuti jitra niwárami nili jiti aminabi aʼláala nima.

 Bilepi fabricante niwá suwaba echi carritos alí miná ko nachuti omáana Wichimóbachi. Ibili carrito natijí 43 dólares, nalí ayénachó natétisaré echi envío alí jarecho si namuti. Jipi rawé chéami, ma nachútili simírikami 420,000 carritos echoná congregaciones omáana Wichimóbachi, alí suwíali simírikami 16 millones de dólares.

 Jiti aʼlá néerami nima echi winomí, ata ralá wiká carritos. Ayénachó echi hermanos echoná congregaciones omeri ralayá echi namuti jiti atéwima echi carritos, alí echi riká ke newalé ralayá kulíwami carritos.

 Echi hermanos we kanílika simía nawisasia néeka echi carritos. Martina, japi bitéami ju echoná Ghana, jéaní: “Japalí ti nawesa jari, ata muliwi echi pagótami jiti che binema Jeobá jitra. Nalí be, japalí ti nee echi carrito, echi pagótami ko ju japi tamujé yúa muliwi. Sinéami japi tamó iné a machí japi ta bineri echi Biblia jitra”.

 Biléanachó país echomí África, bilé rijoi mulíwili echi carrito alí tóoli jaré publicaciones japi riká echi raʼicha. Biléala tarali echi rijoi ku nolínili alí aneli echi hermanos: “Ma ni leériki suwaba echi oselí. Japi echoná aní we natéami ju. Ani simea nijé puéblowala jiti nijé téemala ayénachó leérima”. Echi téemala piré 500 kilómetros echoná jonsa. Japalí ma simírili okuá mechá, echi rijoi ku nolínili japoná wilili echi carrito, alí jéaneli: “Echoná nijé puéblowala ma sunili leeria suwaba echi oselí alí we galeli japi echoná aní. Echi ko testigo Jeobá nínali, nalí jaré náriwami olá. Japi riká, echi ko bineli japi baʼwichi butuwísaré suwaba ripokala japalí pakó. Nalí japoná echi piré ke nirú bakochi. ¿Jeka simásaré jiti omérima pakoa?”. Echi hermanos ko iʼwírili echi rijoi jiti raʼichama bilé precursor yúa japi echi riká cho raʼíchami nili.

 We aʼlá ju japi néeliwa echi carritos jiti “nawisárami níima ne suníami jenaʼí wichimóbachi” (Mateo 24:14). A niwáliwa na carritos jiti emi hermanos omáana Wichimóbachi piréami nijí winomí. Jaré emi nee donate.pr418.com nijimia winomí. Waʼlú matétarabá jiti timí we kanílika nijí winomí.