Sinibí ta we kanílika buwé alí ti ma we inili inénala echi videos japi nirú echoná JW Broadcasting. Nalí, wiká hermanos echomí África piréami ke omero inea néeka echi internet. ¿Chúsiá?

 Mapujiti echomí África ke me nirú internet. Alí japoná a nawá echi internet, ke me aʼlá ju alí we natijí. Japi riká echomí Madagascar bilé hermano circuito descargárili JW Broadcasting echoná cibercafé alí natétili 16 dólares. We rasíruka natéami ju echi internet japi ikí me echi pagótami bilé tarali. a

 Tákoré we jilí ju, wiká millones pagótami echomí África ke néeka internet a omero inea JW Broadcasting. ¿Chúriká omero echi riká nokayá?

 2017 jonsa, japi piré echomí África subsahariana a omero inea JW Broadcasting néeka bilé canal echoná televisión satélite niraa. Jena canal ke bujéliwa alí sinibí tarali omero inea 16 sinúrika raʼicháliami niraa.

 Jiti omérima inea echi videos echoná televisión satélite niraa, echi testigo Jeobá nateti bilé canal japi natijí 12,000 dólares sinibí mechá. Echi señal japi júula echi satélite, nawá 35 países echomí África subsahariana. Isini kaachi nateti bilecho canal, jiti la wiká pagótami omero inea echi asambleas regionales alí kipúa echi nawésali we natéami japi nijí bilé japi nawá central mundial ka jonsa echomí sucursal.

 Wiká pagótami japi ke testigo ju, ayénachó iné echi canal echoná televisión, nalí wiká hermanos ke omero ralayá echi namuti japi jitra inema. Jiti la, 3,670 Salones del Reino jáwali echi equipos jiti nawama echi señal japi júula echi satélite. Echi riká echi hermanos a omero inea JW Broadcasting echoná. Nalí echi Salón ma olásakó bilé televisión o proyector, suwaba echi equipos natijí 70 dólares. Ke echi riká nísakó, japi ikí natétimilé nima 530 dólares.

 Echi hermanos waʼlú matétara nijí jiti olá echi canal. Bilé anciano japi bité echomí Camerún aní: “Tamujé ko iné japi riká maná echoná desierto”. Odebode, bilé hermano japi Nigeria bité, aní: “Ati napawika iné echi canal bisiá niraa sinibí tarali. Nijé kúchuwala ko ma we inili japi sebama echi rawé jiti omérima inea echi canal. Ayénachó jarecho rawé si inénali”. Rose, ayénachó Nigeria bitéami, aní: “¡We ni kanili! Chabé ko we ni inei echi noticias, nalí jipi ko we ni kanili inea echi canal JW. Japalí ni inei echi noticias, we ni sapú iyoe alí ni nayúa nili. Nalí echi canal JW we aʼlá namuti machina alí ni kilí nili... We ni galé echi canal. Bilé namuti we aʼláala ju japi Jeobá tamó iyali”.

 Bilé superintendente japi atí Mozambique, aní japi echoná circuito wikaná Salones jáwali jaré equipos jiti omérima inea echi canal JW. Echi hermanos ko bilé hora kecho seachi echi reunión, si jiti omérima inea JW Broadcasting.

 Echoná asamblea internacional 2019 echomí Johannesburgo (Sudáfrica), néeli na canal jiti jaréanami kipuma jaré nawésali we natéami japi nijili echi japi Aʼlá Niseri. Sphumelele, japi nocha echoná Departamento Local de Broadcasting echomí sucursal Sudáfrica, aní: “Chabé ko ati nee echi internet, nalí ke aʼlá ke echi señal alí ti newalé echi datos. Nalí néeka echi canal satélite niraa, ke me natijí alí ke simí echi señal”.

 Matétarabá sinéami emi japi nijí donaciones, jiti wiká hermanos África piréami omero inea JW Broadcasting satélite niraa. Waʼlú matétarabá japi timí nijí echi winomí néeka donate.pr418.com.