Echi música ko ju bilé chiliwéliami japi Jeobá nijí. Echi música ko isimí japi tamujé kanílipo alí ayénachó japi ta aʼlá nokinálipo. Echi riká ikí japalí ta kipú echi canciones echoná JW Broadcasting®. Alí ayénachó jepuná canciones tamó iʼwiri muliwia Jeobá.

 Echalí 2014 jonsa, a niwásili simírikami 70 canciones, alí bilé a olá simírikami 500 raʼicháliami. Ami nárimiré: “¿Chúriká niwáliwa echi canciones? ¿Alí jépuká niwá?”.

 Echi Comité de Enseñanza japi kuʼiro echi Japi Aʼlá Niseri, ané echi Equipo de Música de Servicios de Audio alí Video japi niwama echi canciones japi riká echoná JW Broadcasting alí jarecho si. Echoná Equipo de Música nocha 13 hermanos alí hermanas japi aní chúriká nima echi canción, niwá alí kariwé chúriká nima echi sonido alí jarecho si namuti. Echi Comité de Enseñanza ayénachó risensia iyali japi yúa nochama jaré hermanos japi we miká piréami ju, japi riká compositores, siméami alí wikaráami. Na hermanos ke niráami ju alí ke nakí japi jarecho we natéami niraa inema echi.

 ¿Chúriká niwáliwa echi canciones? Bachá, echi Comité de Enseñanza chapí chu iyiri textos Biblia jitra animea echi canción alí chúriká nakí japi echi hermanos nílima. Alí biché, echi Equipo de Música aní jépuká niwama echi música alí jépuká osimea echi letra. Miná ko grabáriwa jiti kipuma echi Comité de Enseñanza jiti anema achi aʼlá ju o chu iyiri nakulíwima. Pe aminana, echi Equipo de Música nakuliwa echi canción alí checho siné grabari. Echi canciones grabáritami ju echoná sucursales o japoná piré echi hermanos.

 Jiti niwama alí grabárima echi canciones, echi hermanos nee namuti japi aʼlá akérima echi canciones, programas jiti osimea echi música alí bibliotecas de audio. Ayénachó newalé japi jitra simema, mezcladoras de sonido, amplificadores, altavoces alí micrófonos. Ibili micrófono a natijí 100 alí aminá 1,000 dólares o rasírukami. Bamíali 2020 suwábili 116,000 dólares ralayá echi equipo jiti grabárima.

 ¿Chúriká noká jiti ke me suwábima echi winomí? Nikúurili tani echi hermanos japi miká piréami ju alí echi riká ke me newalé wiká hermanos japi niwama música echoná Betel. Alí ayénachó echi hermanos niwá echi música néeka echi computadora, echi riká ke newalé wiká siméami.

 ¡Echi hermanos a we kanili kipúa echi música! Japi riká Tara, japi bité echomí Alemania, jéaní: “Japalí ni siwea nili, ani kipú echi música alí ni kilí nili. Japalí ni kipú echi canción japi riká ni raʼicha, ani nili japi riká Jeobá tamí mutúa”. Dimitri, japi bité echomí Kazajistán, jéaní: “Ani we kanili kipúa echi canciones jiti ni a machí japi chopi riká aní japi Jeobá nata alí tamí iʼwiri natia japi Jeobá nakí”.

 Delia, japi bité echomí Sudáfrica, aní chu nili japalí kipú echi canciones: “Echi canciones we tamí iʼwiri. Japalí ni omona nili o japalí ni olá karú ikiwáami, sinibí a nirú bilé canción japi tamí iʼwiri. Japalí ni kipú echi canción, ani we ku kanilia nili”.

 Wiká hermanos ko olá bilé canción japi we baʼori. Lerato, japi ayénachó bité echomí Sudáfrica, jéaní: “Echi canciones Ma mulipi nima alí We mi kanílima, tamí iʼwiri natia japi nijé iyela a ku bitélima. Japalí ni kipú echi canciones, ani nata japi nijé iyela jeka mawá tamí mutumia”.

 A nirú bilé canción japi iʼwírili bilé tiwé japi bité echomí Sri Lanka. Echi ko jéaní: “Bilé maestra we tamí cha aneli jiti ni testigo Jeobá ju alí wiká kipuli japi tamí aneli. Ani we majaa níliki alí ke ni machiki piri ni anema. Japalí ni ku nawaki bitichí, nijé iyela tamí aneki japi ni kipuma echi canción Fuerte tú serás. Na canción tamí iʼwírili inamia japi we natéami ju japi ni we aʼlá binema alí ni ku ruyema. Baʼalínala ani ku raʼíchiki echi maestra yúa alí echi ko tamí kipuli alí we aʼlá inámili japi ni bichiwi. Ani waʼlú matétara iyá echi organización Jeobá níwala jiti niwá canciones japi tamó iʼwiri”.

 ¿Chu iyiri winomí jitra niwáliwa suwaba jepuná canciones? Echi winomí jitra japi timí nijí echoná página internet donate.pr418.com. Waʼlú matétarabá jiti timí we kanílika nijí.