Echi Biblia anili japi jipi rawé nirúlima nakówami, nawilí, nokomea echi kawí alí jarecho chati namuti (Lucas 21:10, 11). Echi bamíali de servicio 2022 a ata we aʼlá ineli japi na profecía a ikísimi. Japi riká, milloni pagótami risoa olárami nili echi nakówami jitra japi ikísimi echomí Ucrania. Alí ne sojí omáana Wichimóbachi piréami a bijí risoa nili jiti kulí sunili echi nawilí COVID-19. Ayénachó niruili wiká namuti japi risoa nílitili echi pagótami, japi riká terremotos echomí Haití alí waʼlú ukuli echoná Centroamérica, Filipinas alí sureste echomí África. ¿Chúriká iʼwírili echi testigo Jeobá echi japi risoa nílili?

 Echalí bamíali de servicio 2022, tamujé organizaciónwala iʼwírili echi pagótami japi risoa olárami nili 200 desastres jitra. Ati suwábili ne sojí 12 millones de dólares. b Ma inepo chúriká néeli echi winomí jiti iʼwírima echi pagótami japi risoa olárami nili okuá desastres naturales jitra.

 14 inárachi agosto 2021, niruili bilé waʼlú terremoto magnitud 7.2 echomí sur Haití. We omona nili jiti okuá hermanas alí bilé hermano suwili. Suwaba we risoa nílili alí we omona. Bilé testigo Stephane riwéami aní: “Wiká pagótami suwili echomí ciudad, okuá mechá suwaba tarali niruili wiká funerales”. Bilecho testigo, Éliézer riwéami, tamó ané: “Wiká testigos ma ke olayé kalí, ropa, zapatos alí jarecho namuti japi newaléliwa. Ayénachó, jiti aminabi nokéami nili echi kawí, wiká mechá wiká pagótami majaa pireili”.

 Jiti la, tamujé organización we sapú iʼwírili. Echi sucursal echomí Haití iyali tiendas de campaña, lonas, colchones, cargadores solares para teléfonos celulares alí rasíruka 53 toneladas koʼwáami jitra. Ayénachó atéwili alí che ku niwali aminá 100 kalí. Natétili aminá bilé millón de dólares jepuná nóchali jitra.

 Echi hermanos waʼlú matétara iyá jepuná iʼwírala jitra. Lorette ruyé: “Echi terremoto ko sébali najúnili tamujé kalila alí echi negocio. Ayénachó ke tasi ta olali koʼwáami. Nalí echi organización Jeobá níwala tamó kuʼíroli alí tamó iyali japi ta newaleli suwaba rawé”. Micheline newalá: “Nijé alí nijé okuá kúchuwala pireili bilé taa kalí japi ke jiwérami nili, jiti la ne sojí najunárami nili echi terremoto jitra. Ke ni machiyé piri ni isima, nijé ko bi omerie raʼichia Jeobá yúa, alí echi ko néeli binoy organizaciónwala jiti tamó iʼwírima. Matétarabá echi hermanos jiti jipi ko ma ti olá bilé kalí we semati alí we jiwérami. Jeobá ko tamí iyali wiká aʼláala namuti, jiti la sinibí rawé ani matétara iyánali”.

 Echi weli jáwami ineli echi nóchali japi ta nokali jiti nakúuripo. Bilé nuláami echomí LʼAsile, aní: “Ani emi matétara iyánali jiti timí we sapú jenaʼí sili iʼwiria. Alí ayénachó sinibí we riwiwi echi isélikami. Ani baʼori inea japi emi ko ke me natéami niraa iné echi winomí, nalí we natéami niraa iné echi pagótami. Newaré japi timí echi riká noká jiti we galéami ju”.

 24 inárachi enero 2022, echi tormenta tropical Ana nawali echomí Mozambique alí pe aminana echomí Malaui. Niruili waʼlú ukí alí jiwérali iká aminá 100 kilómetros por hora. Isili japi ke nirúlima luz, najúnali echi puentes alí butuwili omáana.

 Aminá 30,000 testigo Jeobá echomí Malaui alí Mozambique risoa ikili echi tormenta jitra. Charles, bilé hermano japi nóchali nikuuria, aní: “We ni omona nili. Japalí ni ineli echi risoa níliwami echi hermanos jitra, ani we omona nili ne sulachí jonsa”. Ayénachó echi tormenta suwábili echi koʼwáami alí echi ichiwáami si. Ayénachó wiká kalí najunárami nili. Alí we omona nili jiti echi upila bilé hermano níwala alí okuá tiwé ranala silika suwili japalí echi lancha japoná echi mochili banérili.

 Echi ukí we jiwérami nili. A la 1:00 a.m. echomí Nchalo, Malaui, echi téemala Sengeredo a kipuli we cha anéami: echi baʼwí mulipi séali aboi pirélachi jiti echi okuá bakochi bajoli. Echi hermano Sengeredo anili japi riwesa riweili aboi kalila. Echi ko we aʼlá nili jiti japalí kulí machínali echi bakochi ma simírili echoná bitichí alí ma imeli kalí. Echi téemala simíali echomí Salón del Reino japi 30 minutos nili, nalí okuá horas nokali seaya echoná. We samibali alí we risili, nalí we aʼlá séali echoná.

 Echi sucursales Malaui alí Mozambique we sapuka nátili chúriká iʼwírima. Echi ko tánili echi superintendentes de circuito alí echi ancianos japi inema piri newaleli echi hermanos alí japi iʼwérili iyama. A niwali wiká Comités de Socorro jiti iʼwírima echi hermanos. Jiti echi Comités de Socorro we jiwérika nóchili, echi hermanos nareli echi koʼwáami alí jarecho si namuti japi newaleli. Suwábili 33,000 dólares kuʼírimia echi hermanos alí simírikami 300,000 dólares suwábili jiti ku atéwima echi kalí alí checho ku niwayá kalí.

 Echi Comités de Socorro we aʼlá néeli echi winomí japi ta nijí, echi we natéami nili jiti jipi ko echi namuti we natijí. Japi riká, kulí kichao mechá japi simírili japalí jonsa chotásili nochia nikúurimia, echi harina sunú jitra niwárami, japi wabé néeli echi hermanos echomí Malaui, ma 70% aminá natijí chabé yúa. Ayénachó echi gasolina we natijí. Jiti we aʼlá néema echi winomí, echi hermanos ko raleli wiká koʼwáami japi echoná piréami ju. Echi riká ke me suwábili winomí.

 Suwaba jepuná nóchali we tamó kaníliti. Felisberto, japi bitéami ju Mozambique, anili: “Ke sineti ni ineli bilé organización japi riká jepuná. Tamó iyá echi namuti japi jitra ku atéwipo echi kalí alí tamó iyá echi transporte alí koʼwáami alí jarecho si namuti, ayénachó echi ko we galéami ju, japi riká anili Jesús echoná Juan 13:34, 35”. Bilé hermana Ester riwéami Malaui bitéami japi ke kunéami ju alí wikáwili binoy kalila, aní: “Ke ni machiyé piri ni isima jiti ni ke olayé echi winomí japi ni jitra ku niwama echi kalí. Jiti la, japalí echi hermanos niwali bilé kalí nijé níwala, japi riká ko ni ma paraíso atiká nilie”.

 Kecho kaachi echi Wichimóbachi we baʼóami, aminabi nirúlisima echi karú ikiwáami (Mateo 24:7, 8). Matétarabá echi winomí jitra japi timí nijí, ata we aʼlá machí japi echi hermanos a olama japi newalé. Echoná donate.pr418.com ami machimea chúriká mi nijima echi winomí. ¡Waʼlú matétarabá jiti timí we kanílika nijí echi winomí!