Japalí chótali echi michá marzo 2022, machínali echoná jw.org jepuná nawésali: “We ti kanila emi ruyea japi anijoli echi hermanos Japi Aʼlá Niseri japi sinéami congregaciones ma ku omérima napawía echi tarali 1 inárachi abril jonsa, a tamó nakíwisaká echi gobiernos japi nulá japoná ta piré”. ¡Sinéami tamujé testigo Jeobá we ti kaníliki leeria jena noticia! Nalí echi pandemia kecho suníe. a Jiti tibupo japi napawí, sinúrika nokisá riweili alí néea jarecho namuti. ¿Chúriká ti omériporiké kariwea echi Salones del Reino jiti okuá bamíali ati riweli napawía alí jipi ko checho ku napawíporiké?

 Echi hermanos ma jaré michá jonsa kariwea muchuwie jiti checho ku napawima echoná Salones del Reino.

 Japalí ma simírili bilé michá japalí ti ma ke napawili bamíali 2020, echi Departamento Mundial de Diseño alí Construcción echomí Warwick (Nueva York), chotásili inea japi chu ikimea echi Salones del Reino nirúachi COVID-19 alí piri newalema jiti checho ku napawima.

 Omáana Wichimóbachi echi hermanos newaleli jarecho sinúrika namuti. Mathew De Sanctis, japi nocha echoná Departamento Mundial de Diseño alí Construcción, aní: “Jaréana we jilírami ju jiti riwiboa japoná paníwipo sikala. Bilé salón ke olasa baʼwí, raliwá echi baʼwí o páliwa bilé omichi jonsa o bilé payéwichi mulipi”. Jaréanachó echi jáwami nulali japi nirúlima iká echoná Salones del Reino alí letreros jiti sinéami machimea piri nokimea jiti ke nayuma alí aʼlá biʼwama.

 ¿Piri nokali echi hermanos echi namuti jitra? Mathew aní japi wiká hermanos echoná salones nokali jaré namuti “ke jilírami, nalí we aʼláala alí ke me natéami”. Japi riká, echi hermanos japi piré echoná Papúa Nueva Guinea, nátili chúriká paníwima sikala ke jilika: néeli garrafones 20 litros bochíami japi ucheli bilé llave. Echi riká, jiti echi Salón del Reino olama japoná paníwima echi sikala, 40 dólares bi nateli. Ayénachó ralali simírikami 6,000 namuti japoná paníwima; jena ko ralirúami nili echomí Asia jiti julárami nima echoná Salones del Reino echomí África.

 Isini kaachi, jiti nirúlima iká echoná Salones del Reino, echi hermanos ralali ventiladores alí uchali echoná salones. Wiká congregaciones ralali usí jiti echi hermanos ke chapimea echi micrófonos. Ayénachó we iʼwérika nokali biʼwayá japoná sinéami chapí jiti ke nayuma echi virus jitra, japi riká irapia echi iyewi alí paniwia sikala. Jaré congregaciones uchali sensores japoná paniwi echi sikala jiti echi baʼwí binoy machínima. Echomí Chile ralayá echi namuti japi newaleli ibili salón, suwábili 1,400 dólares.

 Jiti echi Salones del Reino we aʼlá nima, echi hermanos we iʼwérika nóchili jiti echi winomí we aʼlá néerami nima. Japi riká, jaréana países echi hermanos iʼwírili nareli echi gobiernos jitra jiti natétima echi namuti japoná paníwima alí echi usí. Alí echi sucursales napawika nóchili jiti ralimea namuti japi newaléliwa jiti echi riká ke me suwábima winomí. Echi sucursales alí echi Departamento Mundial de Compras, sinibí raʼíchili echi ralinéwami yúa, echi riká ke me natéami ralayé alí we sapú nareli.

 Japi nokiwá echoná Salón del Reino jiti ke nayupo, isimí japi kilí nílima japi simía echoná napawíliwachi. Bilé hermana Perú bitéami Dulcine riwéami, aní japi we majaa nílili japalí machili japi checho ku napawima echoná Salón del Reino. Echi ko aní: “Ani olali COVID-19 japalí chótali echi pandemia, jiti la nijé ko natie japi ani simisáaká Salón del Reino, ani checho ku nayuma. Nalí japalí ni bakiki echoná salón, echi ancianos we aʼlá nokali jiti ke nayuma jarecho. Ayénachó niruli desinfectantes alí usí japoná uchama micrófonos. Ayénachó niruli jaré hermanos japi biʼwayé echi Salón del Reino kecho chotásiachi echi napawíliwami alí japalí suwena. Japi riká nokali, isili japi ni we kilí nílima”. b

 Echi namuti jilírami japi ikili echi hermana Sara, Zambia bitéami, we sinúrika nili. Echi ko aní: “Ma jaré michá simírili japalí mukuli nijé kunala COVID-19 jitra. We ni omonie natia japi chu nílima simiyá napawíliwachi ke echi yúa”. ¿Chu nili jipi ma simisaa echoná Salón del Reino? Echi ko aní: “Echi napawíliwami tamí néwariwéliti japi Jeobá sinibí tamí yúa atí jipi jubáami rawé. Matétarabá echi napawíliwami, nijé ko iʼwérili naré echi ancianos jitra alí jarecho hermanos”.

 Omáana Wichimóbachi echi hermanos alí hermanas we kanilia nili jiti ma checho ku napawí echoná Salones del Reino. Matétarabá jiti timí nijí winomí echoná donate.pr418.com. Echi jitra echi hermanos ko nili japi we aʼlá tibúliwa echoná Salones del Reino.