“Wiká japi leeri na oselí a machiyéeré pagótami japi busukachi ju”. Echi riká anili The Watch Tower (La Torre del Vigía) 1 inárachi junio 1912. Echi oselí ayénachó anili japi a nirú publicaciones japi ke natijí, jiti echi busukachi omérima olayá. Alí anili japi echi publicaciones imprimíritami ju néeka echi wiká kuuchi apólami japi buyákami ju, jiti echi busukachi a omérima leeria. Wiká busukachi ko we natéami niraa iné machiyá japi pe aminánami a nirúlima wiká namuti we aʼláala.

 Japalí osairu echi raʼíchali, echi testigo Jeobá ma niwayé publicaciones Biblia jitra néeka wiká kuuchi apólami japi buyákami ju braille riwéami, tákoré kecho niruili echi sistema de braille estándar inglés niraa. Jipi rawé ati bijí niwásimi echi publicaciones jiti leérima echi busukachi. ¡Ati niwásimi 50 simírikami raʼicháliami! ¿Chúriká niwáliwa?

 Bachá ko, echi oserúami niwáliwa braille niraa. Michael Millen, japi nocha echoná Servicios de Procesamiento de texto echoná Patterson (Nueva York), jéaní: “Chabé ko ti a néeli jarecho programas jiti ta osiboa echi braille niraa, nalí be ke aʼlá nili néesa jarecho raʼicháliami jitra. Jipi ko ti nee echi programa riwéami Watchtower Translation System, jiti ta oméripo osayá braille niraa nokí suwaba raʼicháliami. Ani mayé japi ke nirú bilecho programa japi riká echi”.

 Echi publicaciones braille niraa ayénachó ruyé japi uchuwi echoná dibujos. Japi riká echi dibujo japi chukú echoná libro We mi kanílika bitélima, braille niraa ko jériká ruyé: “Bilé rijoi inaro echoná buwechi japi we romía boʼí alí japoná nirú sewá alí echi kawí”. Bilé hermano busukachi Jamshed riwéami japi siervo ministerial ju alí precursor, jéanili: “Nijé ko we natéami niraa iné japi ruyé japi uchuwi echoná dibujos”.

 Ma sunisa osayá braille niraa raʼicháliami, júula echomí sucursal japoná imprimíritami nima. Echi ko nee bilé oselí japi we jiwérami ju alí ke sapú chiwá japalí niwásiwa echi wiká kuuchi apólami japi buyákami ju, ayénachó japi ke sapú ku kachúami ju wisabé niraa néesiwa. Pe aminana ko, napawika uchucha echi páginas alí ma uché echi resorte japi riká bilé cuaderno. Alí miná ko, ma júula echoná congregaciones jarecho publicaciones yúa o júula echi yúa japi ke nipaká tóoli namuti echi japi busukachi ju, a nirúlisaká servicio de correo japi echi riká isimí. Echi hermanos japi busukachi ju a we sapú newalésaká echi publicaciones jiti binema echoná napawíliwachi, echi Sucursal ko sapú júula echi publicaciones.

 Jiti niwama echi publicaciones braille niraa, newalé wiká horas alí wiká winomí. Echi imprenta japi wilí echomí Wallkill (Nueva York), okuá Biblias niwayá braille niraa rojorá japi kilí isimí niwayá 50,000 Biblias. Pe bilepi Biblia braille grado 2 inglés niraa, olá 25 libros. a Echi namuti japi newalé niwamia bilé Biblia braille niraa, 123 simírikami rasía natijí japi ikí newalé niwamia bilé Biblia. Echi japi jitra póliwa bilé Biblia japi olá 25 libros, natijí 150 dólares.

 ¿Chu nili echi hermanos japi iʼwiri niwayá na publicaciones? Nadia, japi nocha echoná sucursal japi wilí echomí Sudáfrica, jéaní: “A we jilí ju japi riká piré echi hermanos japi busukachi ju alí japi ke aʼlá machili, jiti la we ni kanili iʼwiria. Ani we aʼlá machí japi Jeobá we galé echi hermanos”.

 Bilé busukachi ke machisaa leeria braille niraa, ¿piri isísaré? Chabé bamíali a machínali bilé oselí riwéami Aprenda a leer braille. Jena oselí letras uchúwami ju alí ayénachó uchuwi letras braille niraa. Alí niwárami ju jiti okuaka néema, japi busukachi ju alí japi a machíliami ju. Na oselí ayénachó a olá bilé regleta en positivo anilíwami alí bilé punzón braille. Echi pagótami japi biné braille a omero néea jena okuá namuti jiti osimea braille niraa. Echi riká a we aʼlá binema leeria braille niraa alí echi makúsuwala jitra machimea chu iyiri ju echi wiká kuuchi apólami japi buyákami ju.

 ¿Chúriká iʼwiri echi publicaciones braille niraa japi busukachi ju? Ma ti inepo piri ikili Ernst, japi bité echomí Haití. Echi ko simili echi napawíliwachi, nalí be, tasi olali echi oselí japi jitra binema braille niraa. Jiti la, we iʼwérili isié newalamia suwaba echi namuti japi bineli jiti a omérima iyayá echi comentarios. Ernst jéaní: “Jipi ko, ma ke echi riká ju. Ani omero ayawia kini siká iyamia bilé comentario japalí ni nakí alí ni we kanili jenaʼí congregación. Sinéami ta anárika naré japi ta jitra binepo”.

 Jan, japi anciano ju echomí Austria, ayénachó busukachi ju alí echi ko bineri echi binelíwami Echi Nawésami alí Napawika binepo echi Biblia. Echi ko ruyé: “Echi publicaciones braille niraa we aʼlá bineri. Echi páginas a olá números, ke me jilí ju aamia echi notas alí ayénachó we aʼlá ruyé japi riká uchuwi echi dibujos”.

 Echoná Corea del Sur bité bilé hermana Seon-ok riwéami. Echi ko busukachi ju alí ayénachó nakasochi ju, nalí jipi ko ma omero binoy leeria echi publicaciones braille niraa. Echi ko jéaní: “A we jilí ju leeria jarecho publicaciones braille niraa jiti echi kuuchi apólami ke suwaba uchuwi, echi oselí ke runáami ju alí echi líneas ke wachíami ju. Nalí be, ke me jilí ju leeria echi publicaciones japi niwá echi testigo Jeobá, jiti echi oselí we runáami ju alí echi kuuchi apólami we kayáami ju. Chabé ko ni a bineli echi oselí japi ruyé japi aní echi Biblia japalí bilé hermano tamí iʼwírili, nalí jipi ko ni a omero binea nijé binoy. Ani we kanili binea japi ta binepo echoná napawíliwami jiti ni a omeri nijía echi comentarios. Nijé leeri suwaba echi oselí braille niraa. ¡Ke ni riwé leeria echi oselí!”.

 Echi oselí braille niraa alí jarecho si, jériká aní: “Na oselí ko ke ralinéwami ju jiti nijíliwa omáana Wichimóbachi jiti raʼicha japi aní echi Biblia. Jaré ko nijí echi winomí naresa echi oselí”. Matétarabá echi winomí jitra japi timí nijí echoná página internet donate.pr418.com, japi timí noká iʼwiri jiti ta olabo suwaba echi oselí jiti ta binepo Onorúami jitra alí ayénachó iʼwiri echi busukachi. ¡Waʼlú matétarabá!