Echi testigo Jeobá omáana Wichimóbachi piréami, inema echi napawíliwami japi bikiá rawé rojorá bamíali 2020, echalí cho inema julio alí agosto. Jiti echi riká nima, echi napawíliwami traducíritami nili 500 suwinárika niraa raʼicháliami. Chabé bamíali echi hermanos bilé bamíali nokayé niwayá echi nóchali. Nalí jiti nirú echi nawilí coronavirus, echi traductores ne nokí naó mechá bi nokali niwayá echi napawíliwami japi bikiá rawé rojorá bamíali 2020 “¡Sinibí ne wabé kanílasi!”.

 Echi hermanos japi nocha echoná Departamento mundial de Compras alí echi departamento de Servicios de Traducción echoná central mundial, napawika nóchili. Servicios de Traducción a machili japi echi equipos de traducción newalé micrófonos japi we aʼlá anéami ju alí jarecho namuti japi newalé. Echi Departamento Mundial de Compras ralali 1,000 micrófonos alí júali 200 biléana japoná newaléliwa.

 Jiti ke wikabé winomí suwábima, napabúrika ralali echi micrófonos alí echoná jonsa ko júali omáana Wichimóbachi. Jiti wikabé micrófonos ralali, ibili niraa nateli raliwá alí júuliwa 170 dólares. Echi riká 20% ke suwábili winomí.

 Echi Departamento Mundial de Compras ralali alí júali echalí mechá abril alí mayo bamíali 2020, tákoré we jilí nili jiti niruili echi nawilí coronavirus. Nalí be, echi mechá mayo, nokí suwaba echi oficinas remotas de traducción, sucursales alí jaréanami, ma olayé japi jitra grabárima.

 Echi hermano Jay Swinney iné japi noká echi hermanos japi nocha echoná Departamento Mundial de Compras, jéaní: “Japalí jonsa chotásili echi nóchali, echi departamentos de Betel alí echi japi ralinéami nili a katúwika nóchali sinéami ka. Pe echi Onorúami Jeobá bi jiwérala, omérili iʼwiria echi hermanos jiti olama japi newalé alí jiti ke me suwábima winomí”.

 Nicholas Ahladis, japi nocha echoná Servicios de Traducción, jéaní: “Echi traductores japi ke omero machí jaria echi ko we kanílika nareli japi jitra grabárima. Tákoré awénili muchuwi, a oméroli grabaria echi discursos, videos alí canciones aminá 500 niraa raʼicháliami”.

 Wiká hermanos nokali niwayá echi waʼlú napawíliwami bamíali 2020 “¡Sinibí ne wabé kanílasi!”, jiti sinéami echi hermanos inema. A omérili ralayá echi micrófonos matétarabá echi winomí jitra japi emi nijili echoná página internet donate.pr418.com.