Sinibí bamíali echi testigo Jeobá alí wiká millones pagótami omáana wichimóbachi, napawí newalamia echi Jesús mukúala japi riká Jesús nulali (Lucas 22:19). Jepuná napawíliwami tamó iʼwiri machiyá chúsiá we natéami ju japi isili Jesús mukuyá sinéami pagótami jitra. Alí ayénachó echoná ruyéliwa chúriká tamó iʼwiri jipi japi Jesús isili alí chúriká tamó iʼwírima pe aminana (Juan 3:16).

 Tákoré mi simili o ke simili echi napawíliwami, ¿piri mi isísaré jiti echi Jesús mukúala mi iʼwírima? Jesús ko binérili japi ta nokisáré okuá namuti we natéami:

1.  1. Biné Onorúami jitra alí Jesús. Siné kaachi japalí Jesús raʼíchili binoy Onolá yúa, anili: “Jepuná ju echi sinibí bitéliwami: jiti mi a bijí machísipa mujé, echi bilepi Onorúami ne bichíwali, alí a bijí machí si Jesucristo, echi japi mujé júali” (Juan 17:3).

2.  2. Isí japi riká mi biné. Jesús ko anili japi we natéami ju nokayá japi echi binérili. Japi riká, echoná nawésali japi nijili ripá rabó, echi ko binérili japi we aʼlá ju japi ta kipupo alí nokiboa japi echi anili (Lucas 6:46-48). Ayénachó siné kaachi jériká anili: “Átamo galá machisáagá jeʼná jeyiri namuti, we kaníliami níibotamo, átamo ayénachó echirigá olásagá” (Juan 13:17).

 ¿Ami kanílisa nili aminabi binea Onorúami jitra alí Jesús? ¿Ami machinali chúriká mi isima japi Jesús binérili? Jenaʼí nirú jaré namuti japi mi iʼwírima.

 Mujé ko omeri binea japi aní echi Biblia tamujé yúa ke bujeka, jepuná ko ma iʼwírili wiká pagótami jiti aʼlá binema echi Biblia jitra alí nokimea japi riká biné echoná.

•   Bakí echoná página riwéami “Biné japi aní echi Biblia” jiti mi che machimea chúriká binériwa.

•   Iné echi video We mi aʼlá binema echi Biblia jiti mi inema chúriká mi isima binea echi testigo Jeobá yúa.

 Echi testigo Jeobá napawí osá niraa ibili tarali, japoná jériká machiwá Japoná biné echi testigo Jeobá. Echoná napawíliwachi ata biné echi Biblia jitra alí chúriká nokiboa japi riká ta biné echoná.

 Sinéami pagótami omero napawía echoná napawíliwachi; tákoré testigo Jeobá ju o ke. Jaréana mi a omeri napawía videoconferencia niraa o simiyá japoná napawíliwa.

•   Iné echi video ¿Chu nokiwá japoná napawíliwa? Jiti mi inema piri nokiwá echoná napawíliwachi.

•   Bakí echoná página riwéami “Japoná napawí echi testigo Jeobá” jiti mi machimea kumi napawí echi testigo Jeobá mulipi japoná mujé bité.

 Wiká oselí alí videos japi uchuwi jepuná página, mi iʼwírima aminabi binea echi namuti jitra japi Jesús binérili alí japi we natéami ju japi echi isili tamujé jitra.

 Japi riká, ami binénalaká chúsiá echi Jesús mukúala a omero iʼwiria wiká millones pagótami, leeri echi oselí riwéami “¿De qué manera nos salva Jesús?” alí “¿Por qué sufrió y murió Jesús?” o iné echi video japi rewé ¿Chúsiá mukuli Jesús?