Omáana kawichí wiká países echi pagótami ke katúwika raʼicha echi política jitra. Bamíali 2022 echi centro de investigación Pew Research Center, nárili echi pagótami piri nata, “65% echi pagótami 19 países piréami anili japi echi pagótami we naʼáwika piré jiti ke katúwika raʼicha echi política jitra”.

 Japoná mi bité, ¿achi echi pagótami ke aʼlá katúwika raʼicha política jitra? ¿Chúsiá echi riká ju? ¿Achi echi riká nima sinibí? Nibí japi aní echi Biblia.

 Echi Biblia ko aní japi jipi ata piré “kuwachimi rawé”, ayénachó aní japi riká nima riweili echi pagótami alí japi ke katúwika raʼichama.

•   “Wabé waminánomí rawé siʼnéami mapu ikí galá bichíiko Riosi ne wabé risúu olárami níima. Mapujiti echi auché jaré ke bichíyami pagótami chopi a aboni niráa galéami níima. [...] Aboni ketasi ku wikáwama echi jaré aboni sayela” (2 Timoteo 3:1-3).

 Echi gobiernos ko ke omeri aʼlárika iʼwiria echi pagótami tákoré wiká we jiwérika noká jiti echi riká nima. A nirú pagótami japi ke chopi riká nata alí echi isimí japi ke omérima napawika nochia jiti akaréwima echi karú ikiwáami. Suwaba jepuná namuti néwariwéliti japi echi Biblia anili japi riká nima riweili a bichíwali ju.

•   “Echi pagótami risoa nili japalí echi rijoi silíami nisa” (Eclesiastés 8:9).

 Nalí echi Biblia aní chúriká akaréwima suwaba echi chati namuti: nirúlima bilé gobierno japoná echi japi nulama suwábima suwaba echi chati namuti japi risoa níliti echi pagótami.

 Echi Biblia raʼicha bilé silíami jitra japi we aʼláala nuláami ju, bilé silíami japi a omeri akarewia suwaba echi chati namuti, echi ko Jesuscrito ju. Echi ko wilárami ju japi riká walúala niraa, we jiwérami ju alí we inili isínilia japi sinéami pagótami omáana Wichimóbachi we kilí alí napawika pirélima.

•   “Echalí echi aʼláala pagótami wiká nima, alí sinéami kilí pirélima japalí chéami echi mechá ma ke ité” (Salmo 72:7).

•   “Sinéami pagótami nóchilima” (Salmo 72:11).

 Ke nirú bilecho we aʼlá nuláami japi riká Jesús jiti we natéami niraa iné echi pagótami alí iʼwírinali, nalí wabé echi japi risoa olárami ju.

•   “Echi ko iʼwírima echi japi risóati ju alí japi sinaka ta iʼwírili, alí ayénachó echi japi ke niráami ju alí sinéami echi japi ke olá jépuká iʼwírima. A nitimáami ju japi risóati ju, alí echi risóati ko kuʼírima. Echi ko iʼwírima japi we risoa oliwá” (Salmo 72:12-14).

 Aminabi aʼlá machí echi gobierno japi Onorúami wilali ripá alí japoná Jesús nulá, alí biné chúriká echi gobierno mi iʼwírima alí chúriká mi néwariwélitima japi mi nakí japi echi nulama.

•   Iné echi video ¿Piri ju echi Onorúami Gobiérnowala?

•   Leeri echi artículo “El Reino de Dios: un gobierno sin corrupción”.