Echi oméachi 20 inárachi noviembre 2022, echi Naciones Unidas sunili echi napawíliwachi japoná raʼíchili japi echi wichimoba cha ikísima (COP27). Tákoré sinéami katúwika nokali iyamia winomí echi países japoná aminabi cha ikísima, wiká ko aní japi jepuná ke kariwema japi ikísimi.

•   19 inárachi noviembre 2022, António Guterres, secretario general de las Naciones Unidas, jéanili: “Nijé a katúwili napabúa winomí jiti iʼwírima echi países japi aminabi ke cha ikimea”. Ayénachó jéanili: “Jepuná ko ke kariwema suwaba japi ikísimi [...]. Echi wichimoba aminabi cha ikísima”.

•   “Echi wichimoba aminabi cha ikísima” (Mary Robinson, japi chabé silíami nili echomí Irlanda alí japi chabé nóchili japi riká alta comisionada de las Naciones Unidas para los Derechos Humanos; 20 inárachi noviembre 2022).

 Echi remalí alí iwé nárika noká piri ikimea echi wichimoba. Nalí be, ¿echi países a omérima napawika nochia jiti echi wichimoba aminabi ke cha ikísima? ¿Piri aní echi Biblia?

 Echi Biblia aní japi tákoré echi países we jiwérika napawika nokimea, ke omérima kariwea suwaba japi ikísimi echi wichimoba. Inepo okuá namuti:

•   “Japi chikónami ju ke omero wachíami niya” (Eclesiastés 1:15).

   Japi aniwáami ju: Echi gobiernos ke aʼlá nulá jiti echi pagótami ke tasi omeri binoy nulaká nokayá (Jeremías 10:23). Tákoré echi países a jiwérika nokimea napawika nochia, ke omérima kariwea japi ikísimi echi wichimoba.

•   “Mapujiti echi auché jaré ke bichíyami pagótami chopi a aboni niráa galéami níima. Aboni ne wabé korúkami níima echi wenomí. [...] Ketasi ku wikáwama echi jaré aboni sayela” (2 Timoteo 3:2, 3).

   Japi aniwáami ju: Ma chabé jonsa, echi Biblia anili japi jipi rawé wiká pagótami ko aboi bi natama alí ke katúwika nokinálima iʼwiria jarecho.

 Echi gobiernos ke omeri kariwea japi ikísimi echi wichimoba. Onorúami ma wilali bilé silíami japi a omeri: Jesucristo ju. Echi jitra, echi Biblia jéaní:

•   “Echi gobierno asimea binoy sikálachi. Echi ko riwéami nima Echi Japi Aʼlá Busuré Iyá, Onorúami Jiwérami, Onó Sinibí Bitéami, Echi Silíami Nolá Japi Kilí Niraa Ju” (Isaías 9:6).

 Jesús ju echi Silíami japi Onorúami wilali ripá riwigachi (Mateo 6:10, TNM). Jesús ko omérami ju, ayénachó we machíami ju alí tibúnali echi wichimoba alí japi piré echoná (Salmo 72:12, 16). Japalí nulama jenaʼí Wichimóbachi, Jesús ko suwábima echi pagótami japi “suwábali jenaʼí wichimóbachi” (Apocalipsis 11:18; Isaías 35:1, 7).

 Ami che machináliaká chúriká Jesús kariwema japi cha ikísimi echi wichimoba, leeri echi artículo “¿Qué dice la Biblia sobre el cambio climático y nuestro futuro?”.