Ke olayá nóchali we jilí nímiré mujé jitra alí mujé téemala jiti mi ke olama winomí japi jitra mi iyama mujé téemala japi newalé. Jiti mi machimea chúriká mi isima echi riká ikisaa, leeri echi busuréliami japi uchuwi echoná Biblia alí japi sinibí nikuuro.

•   Ruyé jarecho japi chumi nili.

   Japi aní echi Biblia: “Japi we aʼlá amigo ju ko, sinibí we aʼlá galé” (Proverbios 17:17).

   Ami ma ke olasa nóchali, mujé ko ami omona nílimiré o iyoa ma, jiti mi ke machí piri isima alí mi natámiré japi mi ke aʼlá isíami ju. Nalí, ami ruyésaká mujé téemala alí amigos japi mi chu nili, echi ko ami iʼwírimiré. Japi riká ami anémiré japi chúriká mi olama bilecho nóchali.

•   Ke me natá japi ikimea.

   Japi aní echi Biblia: “Ketasi wabé nílaga ʼnatasi jeanigá: ¿Churigá ikimea baʼalí rawé? Mapujiti baʼalínala rawé arigá nirúlama auché jaré wikabé echiyiri namuti mapu ʼyemi mi echirigá wabé nílaga ʼnatárama” (Mateo 6:34).

   Echi Biblia ko tamó ané japi bachá aʼlá natabo japi ta nokiboa (Proverbios 21:5). Nalí ayénachó tamó ané japi ke we natabo echi namuti japi ikiméaré, jiti isini kaachi ke ikí echi namuti japi tamujé we nata.

   Echi Biblia ayénachó nijí we aʼlá busuréliami jiti ta ke me olabo estrés. Ami che machináliaká leeri echi artículo jériwéami “Cómo controlar el estrés”.

•   Aʼlá natá chúriká mi néema echi winomí.

   Japi aní echi Biblia: “Sinibí galá kanila mapalini tarapé namuti níwa, achigórigá [...] mapalini wikabé simírami níwa” (Filipenses 4:12).

   Kanila biteli echi namuti jitra japi mi olá. A keʼré japi mi we aʼlá natásaré chúriká mi suwábima echi kuabi winomí japi mi olá. Alí kiti wikajá ripí echi namuti jitra japi mi ke newalé (Proverbios 22:7).

   Ami machináliaká jarecho namuti japi chúriká mi isima japalí mi ke olá nóchali, leeri echi artículo “Cómo vivir con menos”.

•   Aʼlá nátaka nee echi tiempo.

   Japi aní echi Biblia: “Sinibí ne galá ʼnátaga, ne galabé olasi [o néesi echi tiempo]” (Colosenses 4:5).

   Tákoré mi ke olá bilé nóchali japoná mi sinibí nocha, aʼlá natá japi mi isima ibili rawé. Ami echi riká isísakó suwaba jepuná mi iʼwírima jiti mi kilí nílima.

•   Nochá chuwé nóchali japi aʼlá ju.

   Japi aní echi Biblia: “Ami iʼwérika isísakó nocha wiká namuti mi narema” (Proverbios 14:23).

   Nochá pe chuwé nóchali tákoré ke ju japi riká mi nóchali chabé. Ayénachó nochá echoná nóchali tákoré ke me natéami ju o ke me wiká natétiliwa.

•   Kiti siwé.

   Japi aní echi Biblia: “Biʼá ichá echi talí, ma aʼlíwachi ayénachó ichá echi talí, jiti mi ke machí japi chu iyiri nalí we aʼlá nima” (Eclesiastés 11:6).

   Kiti riwé aa nóchali. Alí ané mujé téemala, amigos, japi mi yúa nóchali chabé alí japi mulipi piré, japi mi aa iyena bilé nóchali. Simí echi pagótami yúa japi aa nóchami, iné echi anuncios japi uchucha echi pagótami o ayénachó aa echoná internet. Nalí, ami newalásaré japi echi pagótami japi amí nóchami ke sapú mi bayema, jiti la mi wisabé niraa simisáré inesia.