9 inárachi octubre bamíali 2024, echi Fondo mundial para la Naturaleza osali bilé informe we natéami japi ikí echi namuti jákami echi namuti jitra japi noká echi pagótami. Echi informe aní japi “echalí 50 bamíali japi kulí simírili (1970 aminá 2020), jipi ko ma ke nirú 73% echi namuti jákami japi ikí niruili”. Alí ayénachó aní: “Japi ikimea malí bamíali simírisa tamó iʼwírima machiyá chúriká ti pirélipo jenaʼí Wichimóbachi pe aminana”.

 Wiká pagótami ke mayea nili japalí kipú jepuná namuti jitra. Alí sinéami ti echi riká inili jiti ta we kanili pirea jenaʼí Wichimóbachi alí we ti omona nili machiyá japi echi namuti jákami suwísimi. Echi riká ti inili jiti Onorúami tamó niwali jiti ta tibupo echi namuti jákami (Génesis 1:27, 28; Proverbios 12:10).

 Jiti la, ami nárika isíeré: “¿Ati omeri nokayá japi echi namuti jákami ma ke suwimea? ¿Piri aní echi Biblia?”.

 Tákoré ti we jiwérika noká, tamujé ko ke bilé namuti omeri nokayá jiti ma ke echi riká ikimea echi namuti jákami alí jena Wichimoba, nalí Onorúami bi ju japi omeri isiá japi ma ke echi riká ikimea. Echi Biblia aní echoná Apocalipsis 11:18 japi Onorúami ko suwábima sinéami japi cha olá jena Wichimoba. Jena versículo tamó ruyé okuá namuti:

1.  1. Onorúami ko ke riwema japi echi pagótami suwábima echi Wichimoba.

2.  2. Onorúami ma mulipi isima japi ma ke echi riká ikimea. ¿Chúsiá ti machí? Jiti jipi rawé echi pagótami aminabi nokísimi japi wabé wikabé namuti jákami suwimea, ke ko japi riká chabé.

 ¿Chúriká atéwima Onorúami jepuná namuti? Echi ko néema binoy Gobiérnowala nulamia omáana jenaʼí Wichimóbachi (Mateo 6:10). Jepuná Gobierno binérima echi pagótami nijéwami jiti we aʼlá tibuma echi namuti jákami (Isaías 11:9).