Junio 2022, echi presidente del Grupo del Banco Mundial anili: “Echi economía mundial checho ikí namuti we jilírami”. Ayénachó anili: “Jipi ko we natijí echi namuti alí ayénachó ke tasi me nirú”.

 Ayénachó echi Fondo Monetario Internacional ko jéaní: “Echi combustible alí echi koʼwáami aminabi we natésimi, jepuná ko risoa níliti echi pagótami japi ke me winomíwami ju, japi piré echoná países japi we risóati ju”.

 Echi Biblia ko tamó iʼwiro jiti ta inámipo chúsiá ikí jepuná namuti we jilírami echi winomí jitra, piri ta nokisáré jiti anachabo alí piri ikimea pe aminana jepuná namuti jitra.

•   Echi Biblia ko aní japi jipi ati “waminánomí rawé [o jubá rawé]” piré (2 Timoteo 3:1).

•   Jesús ko anili japi ikimea “majajárami namuti” o japi namuti we chati ikimea jipi rawé (Lucas 21:11). Japalí echi namuti aminabi we natésimi, ati majaa nila. Echi pagótami ko nata chúriká pirélima pe aminana alí chúriká tibuma echi téemala.

•   Echi libro Apocalipsis anili japi jipi jubá rawé, wiká natema echi koʼwáami. “Nijeni námali bilé raʼíchami [...] jeanili: Bilé kilo turío bilé rawé nóchaga natétawami ju. Aʼlí bikiyá kilo sebara anilíwami rakala ayénachó bilé rawé nóchaga natétawami ju” (Apocalipsis 6:6).

 Jiti mi che machimea echi “waminánomí rawé” jitra alí echi profecía japi aní echi Apocalipsis, iné echi video “1914 jonsa we cha ikísimi” alí leeri echi artículo “¿Que representan los jinetes de Apocalipsis?”.

•   “Aboni niwaká kalí pirélima echoná; aboni ichaká koʼmea rakesa. Tasi niwama kalí jiti jarecho pirélima, tasi ichamea jiti jarecho koʼwáali nima” (Isaías 65:21, 22).

•   “Nirúlima wabé koʼwáami jenaʼí wichimóbachi, rabóayé kawírali ayénachó nirúlima koʼwáami” (Salmo 72:16).

•   “‘Echi pagótami jitra japi we risoa nila, alí japi we omona jiti we risóati ju, nijé ko wilísiká iʼwírimaʼ, jéaní Jeobá” (Salmo 12:5). a

 Echi Onorúami ko ma ke me ayó isima japi echi pagótami olama japi iyiri newalé, ke tasi pe biléana bi país piréami, nalí omáana Wichimóbachi piréami. Jiti mi machimea chúriká isima, leeri echi artículo “¿Es realista esperar un sistema económico justo?”.

 Nalí be, ayénachó jipi rawé, echi Biblia ko a nikuuro chumi riká isima japalí echi namuti we natijí. ¿Chúriká? Echoná ko a uchuwi busuré japoná aní chúriká aʼlá nátika néepo echi winomí (Proverbios 23:4, 5; Eclesiastés 7:12). Ami che we machináliaká, leeri echi artículos “Cuide su economía” alí “Como vivir con menos”.