24 de febrero biʼá 2022, Rusia ko júali sontarsi echomí Ucrania jiti risoa olama, tákoré wiká isélikami iʼwérili nokali jiti ke nirúlima guerra. Nalí, ¿piri ikimea omáana jenaʼí wichimóbachi jiti echi riká ikísimi? António Guterres, secretario general de las Naciones Unidas, anili japi aminabi a echi riká ikísisaká wiká pagótami we risoa nilia pirélima echomí Europa alí ayénachó omáana jenaʼí wichimóbachi.

•   Jesús ko anili japi jaréanami piréami we nakoma jaréanacho piréami sayérika, alí japi echi isélikami ayénachó we nakoma jarecho isélikami sayérika (Mateo 24:7). Leeri echi artículo “¿Cuál es la señal de ‘los últimos días’ o de ‘los tiempos finales’?” jiti mi machimea japi echi guerras japi nirú jipi rawé, isimí japi ikimea japi anili Jesús echoná Biblia.

•   Echi libro Apocalipsis ko aní japi echi guerra ko ju japi riká bilé pagótami japi asé echi kawé “mapu sitákami níili”, alí japi echi isimí japi “ke wesi jenaʼí wichimóbachi piréami waminabi kilí ologá pirélama” (Apocalipsis 6:4). Jiti mi che machimea, leeri echi artículo “¿Qué representan los jinetes del Apocalipsis?” alí ayénachó mi binema japi echi guerras japi nirú jipi, ikísimi japi riká aní echi profecía.

•   Echi libro de Daniel raʼicha “rey del norte” alí “rey del sur”jitra, alí ruyé japi echi okuánika anakupi sayérima (Daniel 11:25-45). Iné echi video Echi profecía japi aní Daniel 11, ¿chúriká ikísimi? jiti mi machimea chúsiá Rusia alí jarecho si machiwá japi riká rey del norte. a

•   Apocalipsis ayénachó aní japi suwaba echi isélikami yúa nakoma “echi suwaba omériami Walubela Riosi” (Apocalipsis 16:14, 16). Echi guerra ko ke nima japi riká ti ritiwá jipi, japi anakupi niraa nakoa. Leeri echi artículo “¿Qué es el Armagedón?” jiti mi machimea chu iyiri ju echi guerra japi nirúlima.

•   Echi Biblia ko aní japi Onorúami ko “suwábima echi weli nakówami omáana kawichí” (Salmo 46:9). Leeri echi artículo “La esperanza real de un mañana mejor” jiti mi che machimea piri namuti aʼlá isima Onorúami.

•   Jesús ko aneli echi discípulos japi tánima echi Onorúami Gobiérnowala (Mateo 6:9, 10). Echi gobierno ko ripá siyónachi asá nulama jenaʼí Wichimóbachi alí isima echi namuti japi Onorúami nakí, japi riká Onorúami ko nakí japi jenaʼí Wichimóbachi kilii wilimea. Iné echi video ¿Piri ju echi Onorúami Gobiérnowala? jiti mi machimea piri namuti isima echi Onorúami Gobiérnowala mi jitra.

 Echomí Ucrania a nirú aminá 129,000 testigos Jeobá. Echi alí suwaba testigos japi piré omáana wichimóbachi noká japi riká Jesús isili, alí neutrales ju. Jiti bela ke iʼwiri echi política alí ke cho simía echoná guerra (Juan 18:36). Omáana jenaʼí wichimóbachi echi testigos Jeobá nawesa echi “Galabé Riosi Raʼíchala”, alí bineri echi pagótami japi pe aminana ma ke nirúlima chati namuti japi riká echi guerra (Mateo 24:14). Jiti mi che machimea piri namuti aʼlá bineri echi Biblia japi ikimea pe aminana, taa jiti bilé testigo Jeobá simea mi binérisia.