“Japalí ni taa ke, nijé rejimala sinibí tamí cha riká raʼíchili alí tamí wipisoli. Alí japalí ni niwiki, nijé wasila ayénachó tamí risoa olali. Echi alí echi kunala ko ke aʼlá nokali tamí yúa. Jiti la ni nátiki binoy miʼlimea” (Madhu, a India).

 Echi Organización Mundial de la Salud aní japi “omáana wichimóbachi a nirú umukí japi risoa olárami ju”. Ayénachó aní japi wiká risoa nili jiti wipisórami ju o jiti tábitami ju alí jarecho si namuti jitra.

 Ami nísaká bilé echi umukí, ami nátiré japi sinibí mi risoa olama. Ineka japi riká oliwá echi umukí we risoa nílitia, ami nátiré japi echi umukí ke natéami ju jarecho jitra. Nalí Onorúami ko, ¿achi natéami niraa iné?

 Echi Biblia aní: “[Onorúami ko] rijoi alí mukí niwali” (Génesis 1:27).

 Japi aniwáami ju: Onorúami niwali echi rijoi alí echi mukí, jiti la okuánika riwíwitami nísaré. Alí echi ko nakí japi echi kunala we galema echi upila japi riká binoy galé. Jiti la ke cha riká raʼíchisaré alí ke wipisáré, ke iʼwérili anésaré japi isísaré, nalí ke cho anésaré japi ke isima bilé namuti (Efesios 5:33; Colosenses 3:19). Onorúami nakí japi echi umukí we aʼlá pirélima alí japi ke risoa olárami nima.

 “Japalí ni taa ke, jaré nijé téemala tamí tábili. Alí japalí ni 17 bamibi echi patrón japi ni yúa nochie tamí aneki, japi ni ke echi yúa boʼisáaká, ma ke tamí riwema echi yúa nóchami. Japalí ni ma waʼlú nili, nijé kunala, nijé wénwala alí echi pagótami japi mulipi pireili echoná, tamí ineli japi riká ko ni ke natéami ka. Nalí miná ko ani machiki Jeobá, b japi niwali suwaba namuti. Ani bineki japi echi ko a riwiwi echi umukí, jiti la ni bichíwiki japi echi ko we tamí galé alí japi ni we natéami ju echi jitra” (María, Argentina).

 Echi Biblia aní: “A nirú bilé amigo japi rasíruka galé bilé rejimala yúa” (Proverbios 18:24).

 Japi aniwáami ju: Bilé japi ne bichíwali amigo ju o amiga ma, mi iʼwírima. Ruyé bilé japi mi bichiwi suwaba japi mi nili, ami nátiaká japi echi riká isiá mi iʼwírima.

 “20 bamíali ke ni bilé ruyeli japi tamí tábili. Ke ni kanilie alí ni we omona nilie. Nalí japalí ni bilé ruyeki japi ni ikili, echi ko we simárika tamí kipuki alí ma ni ku we kanilia níliki” (Elif, Turquía).

 Echi Biblia aní: “Ketasi ne wabé nílaga ʼnatasi karúmati jiti, mapujiti Riosi Binói ʼyemi mi kuʼwírama” (1 Pedro 5:7).

 Japi aniwáami ju: Japalí mi Onorúami yúa raʼicha, echi ko sinibí mi kipú (Salmo 55:22; 65:2). Echi ko we mi galé, jiti la mi iʼwírinali aʼlá inamia japi mujé we natéami ju.

 “Machiyá Jeobá tamí iʼwírili jiti ni ma ke risoa nílima echi namuti jitra japi tamí olali. Jipi ko ni omeri ruyea suwaba japi ni nili. Onorúami ko a ju bilé amigo japi we aʼlá inami japi ni nili” (Ana, Belice).

 Echi Biblia aní: “Aʼlá mi wachía isíami nima echi baʼlaguéchuli yúa alí echi japi risoa nili yúa jiti echi pagótami jenaʼí wichimóbachi piréami ma ke majárima” (Salmo 10:18).

 Japi aniwáami ju: Ma mulipi Jeobá ko suwábima echi namuti chati, ayénachó echi namuti japi risoa níliti echi umukí.

 “Machiyá japi Jeobá ko ma mulipi suwábima echi namuti japi risoa níliti echi umukí alí iwé, tamí kaníliti alí tamí iʼwiri we kilí nilia” (Roberta, México).

 Ami che machináliaká japi aní Biblia japi ikimea pe aminana, chúsiá mi bichíwisaré japi aní echoná alí chúriká echi testigo Jeobá iʼwiri jarecho néeka echi Biblia, taa jiti bilé testigo Jeobá simea mi binérisia.

 Descargari jena artículo alí imprimiri.