¡SINIBÍ SAYEKA MOCHIBO!
Wiká millones suwábili echoná guerra. Nalí, ¿achi winomí bi ju?
Wiká winomí ju japi ikí suwábili echoná guerra.
“Japi ikí suwábili nakoa echoná guerra ko ju wiká millones dólares niraa” (The Washington Post, 13 inárachi febrero 2024).
Nalí, ke winomí bi ju. Ayénachó ju jarecho namuti we jilírami. Ma inepo jaré namuti japi ikí echoná guerra echomí Ucrania.
Sontarsi. A mayewa japi ne sojí 500,000 sontarsi suwili o risoa nilia ripili japalí jonsa chotásili echi guerra.
Pagótami. Echi ONU, japi aniwáami ju Organización de las Naciones Unidas, aní japi simírikami 28,000 pagótami suwili o risoa nilia ripili. Nalí bilé rijoi japi nocha echoná ONU jéanili: “Echi guerra wiká pagótami risoa nílitili alí japi ikí winomí suwábili ne wikabé ju”. a
Jiti la, echi guerra alí jarecho nakówami isili japi wiká pagótami risoa nílima.
114 millones. Echi ikí pagótami júmisili echi guerra alí jarecho nakówami jitra omáana wichimóbachi septiembre chéami bamíali 2023.
783 millones. Echi ikí pagótami ju japi we lochea piré. “Echi nakówami isimí japi echi pagótami we lochea pirélima, jiti wikabé echi piré japoná nirú guerra alí nakówami” (Programa Mundial de Alimentos).
¿Achi siné kaachi ma ke nirúlima echi guerra? ¿Achi ta kilí piréliporé? ¿Achi echi winomí alí jarecho si namuti japi nirú jenaʼí wichimóbachi néerami nima jiti ke risoa nilia pirélima echi pagótami alí ke lochema? ¿Piri aní echi Biblia echi jitra?
Nirúlima riweili guerras
Echi Biblia anili japi nirúlima riweili echi guerras omáana wichimóbachi, alí anili japi echi ko ju japi riká bilé japi kawé aseka inari.
“Echalí auché bilé kawé machínali, echi mapu sitákami níili. Aʼlí echi mapu aseli echi kawé ʼyárami níili mapurigá wabé omériga olama, mapurigá ke wesi jenaʼí wichimóbachi piréami waminabi kilí ologá pirélama, chopi mapurigá aboni aʼnagupi nakówaga koʼwimea. Ayénachó échiko ʼyárami níili bilé wiʼlibé ripiyá” (Apocalipsis 6:4).
Miná ko, nirú jarecho okuá kawé japi bilé aniwáami ju japi echi pagótami lochea pirélima, alí biléala ko japi wiká pagótami suwimea echi nawilí alí jarecho si namuti jitra (Apocalipsis 6:5-8). Jiti mi che machimea piri aniwáami ju japi aní echoná Biblia alí chúsiá ta bichíwipo japi a ikísimi jipi rawé echi namuti, leeri echi artículo “¿Qué representan los jinetes del Apocalipsis?”.
Pe aminana kilí pirélipo
Ma mulipi echi namuti japi nirú echoná wichimóbachi ma ke néerami nima jiti nirúlima guerra. Nalí ke echi riká ikimea jiti echi pagótami akaréwima. Echi Biblia aní:
Onorúami ko “suwábima echi weli nakówami omáana kawichí” (Salmo 46:9).
Onorúami ko akaréwima suwaba echi chati namuti japi ikí echi guerra jitra. “Riosi galá ku kanílatama aboni, mapurigá ma ketasi oʼmóniga nalákama. Echalí jonsa echi pagótami ma ketasi suwimea, nibilé auché nalákama, nibilé auché risúu animea, nibilé auché okoma; mapujiti suwaba mapu ikí chabénala nirúaliko, ma suwaba simárali” (Apocalipsis 21:4).
Onorúami ko isima japi sinéami kilí pirélima. “Nijé puéblowala pirélima japoná kilí nima, echoná kalírili japoná ke majama alí japoná kilí isábima” (Isaías 32:18).
Japi riká aní echoná Biblia, echi guerras alí jarecho chati namuti japi nirú jipi rawé néwariwéliti japi ma mulipi kilí pirélipo.
¿Chúriká isima Onorúami jiti ta kilí pirélipo? Néeka echi binoy gobiérnowala japi ripá jonsa nulama (Mateo 6:10). Jiti mi che machimea piri ju echi gobierno alí chúriká iʼwírima, iné echi video ¿Piri ju echi Onorúami Gobiérnowala?
a Miroslav Jenca, subsecretario general de las Naciones Unidas para Europa, 6 inárachi diciembre 2023.