1. ¿Chúsiá binepo echi ángeles jitra?

JEOBÁ ko nakí japi mi machimea jepi ju echi kúchuwala, echi ángeles ju. Echi Biblia aní japi “Onorúami kúchuwala ju” (Job 38:7). ¿Chu nokáami ju echi ángeles? ¿Chúriká tibuli echi pagótami chabé piréami? Jipi ru, ¿a tibúiré? (Iné jubá chukúami nota 8).

2. a) ¿Jépuká niwali echi ángeles? b) ¿Chu ikí ángeles niwaari?

² Ami machimea jepi isili niwayá echi ángeles. Colosenses 1:16 echoná aní japi Jeobá ma niwasa Jesús, echoná jonsa ko niwali “ne suwaba namuti mapu ikí nirú echoʼná ripá riwigachi, ayénachó ne suwaba namuti mapu ikí nirú jenaʼí wichimóbachi”. Echi riká machí japi ayénachó echi ángeles niwárami ju. ¿Chu ikí ángeles niwaari? Echi Biblia ko aní japi millones ju echi ángeles (Salmo 103:20; Apocalipsis 5:11).

3. ¿Chu nili echi ángeles inea echi Wichimoba baʼóami?

³ Echi Biblia ko aní japi Jeobá bachá niwali echi ángeles; echoná jonsa ko niwali echi Wichimóbachi. ¿Chu nílalé echi ángeles ne kulí inea echi Wichimoba baʼóami? Echi libro de Job aní, japi echi ángeles napawika sinéami we kanili jiti japi riká téemala niraa noká nijewia Jeobá bi (Job 38:4-7).

4. ¿Chúriká newaré japi echi ángeles galé echi pagótami?

⁴ Echi ángeles a machinali japi ikí echi pagótami; ayénachó chúriká pirélima jenaʼí Wichimóbachi (Proverbios 8:30, 31; 1 Pedro 1:11, 12, TNM). Japalí echi Adán alí Eva ke nijéwili Jeobá, echi ángeles ko we aʼmónili ke nijéwami  nílachi. Jipi ko simérika we aʼmoni jiti ritiwá we cha nokáachi echi pagótami, ke ma nijéwami kaachi. We kanili echi ángeles japalí ma ke che chati nokáachi echi pagótami jiti ku Jeobá nijewi (Lucas 15:10). Echi ángeles ayénachó machinali chu nilia pirea japi Jeobá nijewi. Echi ko júuli echi ángeles jiti tibuma echi pagótami nijéwami chopi (Hebreos 1:7, 14). Inepo chúriká tibula Jeobá japi a nijéwami ju.

5. ¿Chúriká tibuli echi ángeles chabé piréami japi aʼlá nijéwami nili Onorúami?

 ⁵ Jeobá ko okuá ángeles júali jiti iʼwírima Lot, echi upila alí malala si, jiti machí buyama echoná Sodoma alí Gomorra jonsa jiti ke si suwimea (Génesis 19:15, 16). Wiká bamíali simárili, japalí echi Daniel rilé jochi pátami nili japoná uchuli echi mawiyaka; tasi namú ikili jiti Onorúami júali echi ángel jiti tibuma, jiti ke ikima echi mawiyaka (Daniel 6:22). Pedro ayénachó iʼwíritami nili japalí cárcel asali, Jeobá júali bilé ángel jiti iʼwírima ku sutacha (Hechos 12:6-11). Ayénachó tibuli echi ángeles Jesús japalí jenaʼí Wichimóbachi iyénili. Japalí pakótami nili Jesús, ayénachó echi ángeles “we galá kuʼwírali” (Marcos 1:13). Kecho mukúachi Jesús, bilé ángel ayénachó iʼwérili iyali jiti anachama (Lucas 22:43).

6. a) ¿Chúriká mi machí japi echi ángeles a tibú echi pagótami? b) ¿Chu iyiri preguntas uchuwi japi mi machimea?

⁶ Jipi rawé echi pagótami ma ke machiná ritiwá echi ángeles. Jeobá a bijí júuli echi ángeles jiti tibuma echi pagótami japi a nijéwami ju. Echi Biblia aní japi “Jeobá bilé ángel júuli jiti tibuma echi japi a nijéwami ju ko” (Salmo 34:7). ¿Chúsiá ti nakí japi bilé ángel tamó tibuma? Jiti a nirú jaré japi tamujé sayela ju, echi ko we jiwérami ju alí we cha nokáami. ¿Chu riwéwami ju? ¿Kumi jonsa sili? ¿Chúriká cha olá echi pagótami? Jiti mi che machimea, bachá binepo japi nokali Adán alí Eva.

7. ¿Piri nakí echi Diablo japi nokimea echi pagótami?

⁷ Ma ti binékirú capítulo 3 japi bilé ángel ke nijéwili Onorúami, echi ángel ko nakili japi echi pagótami echi nalí nijéwima. Echi Biblia ko aní japi echi ángel Satanás alí Diablo riwewi (Apocalipsis 12:9). Satanás ko nakili japi echi pagótami ke cho nijéwima Onorúami. Echi isili jiti Eva ke  nijéwima, echalí jonsa isili japi wiká pagótami ke nijéwima. We nalí a niruili jaré japi a nijéwami nili Onorúami echi ko riwéwami nili Abel, Enoc alí Noé (Hebreos 11:4, 5, 7).

8. a) ¿Piri nokali jaré ángeles jiti demonios riwewi? b) ¿Chu nokali echi demonios japalí waʼlú ukuli?

⁸ Japalí Noé biteili, jaré ángel ko tasi nijéwami nili alí jenaʼí Wichimóbachi tikili japi riká ralámili niraa, ¿chúsiá tikili? Echi Biblia ko aní, jiti mukí yúa niwili (leeri Génesis 6:2). * Tasi aʼlá nili japi nokali echi ángeles (Judas 6). Japi riká nokali echi cheti chati ángeles, echi iyiri cho nili echi pagótami we obátami we nakówami. Jeobá ko jéanili japi suwábima echi pagótami, echi ko silika suwili jiti waʼlú baʼwí póoli omáana Wichimóbachi. Jeobá ko tibuli echi japi aʼlá nijéwami nili (Génesis 7:17, 23). Echi ángeles chati ko ke suwinalia ku ripá simíali. Echi Biblia ko aní japi echi chati ángeles, demonios ju. Echi demonios Satanás yúa napawili ke nijéwili Jeobá; echi Satanás ju japi nulé echi demonios (Mateo 9:34, TNM).

9. a) ¿Chu aneri echi demonios japalí ripá ku simíali? b) ¿Piri mi binema?

⁹ Japalí echi demonios ke nijéwami nili Jeobá, echalí jona tasi ku Jeobá téemala niraa nima (2 Pedro 2:4). Jipi ko echi demonios ma ke tasi japi riká rijowi ripokala ju (japi riká nili chabé japalí biteili Noé) we nalí “sinibí wabé ʼyékiami ju jenaʼí wichimóbachi piréami pagótami” (Apocalipsis 12:9; 1 Juan 5:19). Ami machimea, chu nokáami ju echi demonios ekia echi pagótami (leeri 2 Corintios 2:11).

10. ¿Piri néeka misú echi demonios echi pagótami?

¹⁰ Echi demonios ko we ikalea ané echi pagótami. Jaré  pagótami ko echi demonios yúa raʼichi, jarecho ko echi sukurúami yúa simía, jarecho ko echi owirúami yúa, nalí japi noká ko pe demonios yúa raʼichi. Japi echi riká noká ko espiritismo ju. Echi Biblia aní japi mi ke yúa simea japi echi iyiri noká, ke mi yúa raʼichama (Gálatas 5:19-21, TNM). ¿Chúsiá ke? Jiti echi demonios wiká namuti noká jiti misuma echi pagótami; japi riká olowawi misua echi chikuli echi riká cho olowá echi pagótami jiti misútima (iné jubá chukúami nota 26).

11. a) ¿Piri noká echi pagótami jiti machimea japi ikimea pe aminánami? b) ¿Chúsiá mi ke yúa simisare echi yiri nóchami?

¹¹ Echi demonios ayénachó ikalea ané echi pagótami néeka adivinación. Jaré pagótami ko yúa simía: sipabúami, leériami sikala, sukurúami, owirúami, japi aní rimuka japi ikiméaré, leeri cartas tarot aniwá o iné bola de cristal; japi echi yúa simiba ko machinali japi chu ikimea pe aminana. Echi iyiri nóchami ko noká jiti echi demonios iʼwiri. Wiká pagótami ko jéaní japi ke wesi risoa olá, nalí a risoa olá echi pagótami. Ma inepo japi ikili bilé tiwé, echi Biblia ko aní japi echi demonios alí adivinos napawika nocha. Hechos 16:16-18 (TNM) aní japi bilé demonio ko iʼwírili bilé tiwé jiti machimea piri ikimea. Japalí echi Pablo ku machí pali echi demonio echi japi olali echi tiwé, echalí jonsa ma ke che machili japi ikimea pe aminánami.

12. a) ¿Chúsiá mi ke yúa raʼichásaré japi ma suwili? b) ¿Chúsiá echi testigo Jeobá ke niwiwi omáwili echi suwíami?

¹² Echi demonios wiká namuti noká jiti misuma echi pagótami. Echi ko mayeri echi pagótami japi ma suwili a raʼicha; ayénachó mayeri japi mukuli aliwala a bijí bité biléana alí risoa tamó olá. Bilé téemala mukusaa jaré ko yúa simía médium espiritista, jiti yúa raʼichama echi japi ma mukuli yúa. Echi médium espiritista ko mayeri echi pagótami japi yúa raʼíchili echi mukúami, jiti ku nami japi riká raʼíchami nili japi mukuli (1 Samuel 28:3-19). Echi  pagótami omawi bilé téemala mukusaa, jiti mayé japi a bité. Jériká noká, koʼwáami maniwi, jaré pagótami ko mayé japalí bilé mukusaa echi Diablo ku too echi aliwala jiti bela sinibí rokó tibú, omawa 2 inárachi noviembre echi riká noká jiti mayé japi ku iyena echi aliwala. Echi testigo Jeobá ko tasi omawi, jiti bela naʼawa ko echi téemala, ke yúa raʼichi, tasi galewi, ke cho nakí japi binéripa. Echi testigo ko machí japi ke iyiri noká japi ma suwili. Tasi raʼíchami ju, tasi tamó cha olama (Salmo 115:17). Kiti riwé japi echi demonios mi misuma. Kiti siné yúa raʼicha echi suwíkami ni bilé demonios yúa; jiti echi demonios ko kanili japi nirúlima echi omáwili (leeri Deuteronomio 18:10, 11; * Isaías 8:19).

13. ¿Chu nili jipi echi pagótami echi demonios jitra?

¹³ Echi demonios ju japi majari echi pagótami. Satanás alí demonios aboni a machí “jiti teeli bi inama chati isiá”, jiti ma machí japi ma ke che nirúlima jenaʼí Wichimóbachi; we naʼawi, jiti bela we risoa oloyá ko echi pagótami (Apocalipsis 12:12, 17, TNM). Wiká pagótami we majáami nili echi demonios, jipi ko ma ke majá japi riká chabé. ¿Piri nokali jiti ke majama?

14. Japi riká nokali echi cristianos chabé piréami, ¿piri mi cho isima ami olásaká japi demonios uchúwami ju?

¹⁴ Echoná Biblia aʼlá aní chu nokáami ju echi demonios jiti ke echi riká nokibóampá. Echi pagótami japi Éfeso  piréami nili chabé, kecho binea japi aní echi Biblia, echi pagótami ko demonios yúa raʼíchami nili. ¿Chu nokali jiti ma ke che yúa raʼichama echi demonios? Echi Biblia aní japi “wabé olali mapurigá sukurúami niráa, [...] ketasi waminabi olánali mapurigá sukurúami niráa; ayénachó aboni pali aboni níwala oselí, mapoʼná aboni bineli sukurúami niráa. Aʼlí suwaba waminá ikósali echoʼná bacháami siʼnéami echi auché jaré pagótami yuwa” (Hechos 19:19). Jiti nijéwinili Onorúami, jiti bela ikósilakó suwaba echi libros de magia. Ami nijéwinalakó Jeobá ayénachó mi suwaba ikósaré oselí japi echi demonios uchúwami ju. Japi riká echi libros, revistas, horóscopos, películas, canciones, juegos alí fotos, japi uchuwi echi demonios, magia ma japi riká ko simá nokáami ka. Ke mi néesaré echi iyiri namuti, kecho mi oloká inama namuti japi demonios mi mulíwima.

15. ¿Piri si mi isima jiti ke mi nawíima echi demonios alí Satanás?

¹⁵ Wiká bamíali simírili japalí echi cristianos Éfeso piréami suwaba ikósili echi libros de magia, Pablo ko anili japi bijí a sayéritami nima riweili echi hermanos, jiti bela osali jepuná: “Chópita sayera echi wabé chati sitíi oláami riablo” (Efesios 6:12). Ma suwaba ikosa echi libros, echi demonios ko bijí naʼáwika cha olali. ¿Ami machí piri nokali? Pablo ko jéaneli: “Chopi mapalítamo galá bichíi Riosi, echalítamo omero niyúriya echi Riablo sayériya, achigórigá mapurigá echi jaré pagótami waminá choʼwá echi naʼí rajáami mapu sontarsi aʼwali” (Efesios 6:16). Japi riká echi escudo chewi echi sontarsi rawili jiti ke chiwimea, echi riká cho ju ata bichíwisaká japi Jeobá tamujé tibuma, tasi mi nawíima echi demonios alí Satanás (Mateo 17:20).

16. ¿Piri mi isima jiti mi aʼlá bichíwima Jeobá?

¹⁶ ¿Piri mi isima jiti mi aminabi bichíwima Jeobá? Ami leérima sinibí rawé echi Biblia echi riká mi machimea japi  Jeobá mi iʼwírima. Aminabi mi bichíwisaká Jeobá echi Satanás alí demonios ko tasi mi mulíwima (1 Juan 5:5).

17. ¿Piri mi si isísaré jiti mi ke mulíwima echi demonios?

¹⁷ ¿Piri nokali echi cristianos Éfeso piréami? Echi ko pireili japoná echi pagótami ayénachó demonios yúa raʼíchami nili. Pablo ko jériká aneli: “Ke siné ariwesi echirigá Riosi yuwa raʼicha” (Efesios 6:18). Echi ko sinibí Jeobá tánili japi tibuma jiti ke cha olama echi demonios. Jipi ayénachó nirú demonios, echi pagótami noká wiká namuti japi noká echi demonios, niwi namuti demonios uchúwami. Ayénachó mujé Jeobá yúa ra’ichásaré jiti ke mi cha olama echi demonios; yúa raʼichá echi riwalá néeka Jeobá (leeri Proverbios 18:10). * Ata jeanésaká Jeobá japi tamujé tibuma miná másima echi Satanás, Jeobá ko a námima yúa raʼichawa (Salmo 145:19; Mateo 6:13).

18, 19. a) ¿Piri mi si isima jiti Jeobá mi tibuma jiti mi ke mulíwima Satanás alí demonios? b) ¿Piri mi binema biléala capítulo?

¹⁸ Ami miná aʼwásaká suwaba japi echi demonios uchúwami ju, alí machisáaká japi Jeobá mi tibuma, ma mi ke majama echi demonios alí Satanás (leeri Santiago 4:7, 8). Jeobá bi suwaba omérami ju, echi demonios ko ke. Japalí Noé biteili Jeobá ko castigo iyali echi demonios; pe aminánami ayénachó Jeobá suwaba oyama echi demonios (Judas 6). Jeobá ko tasi mi awénili riwema. Echi ko ángeles júuli jiti mi tibuma (2 Reyes 6:15-17). Ata machí japi Jeobá tamujé iʼwírima jiti miná júmisima Satanás alí demonios (1 Pedro 5:6, 7; 2 Pedro 2:9).

¹⁹ Echi Satanás alí demonios iyiri ju jiti risoa ikimea echi pagótami. ¿Chúsiá Jeobá kecho oyá echi demonios? Echi ko mi che machimea biléala capítulo.