1. ¿Jépuká bi machí japi ikiméaré pe aminánami?

¿AMI ko iné echi noticias japi buyaní televisión o radio ma? ¿Minabi we cha riwélimiré? We chati namuti nirú, risoa nilia piré echi pagótami, echi riká ikíachi echi pagótami jéaní ma jubá rawé piré, ¿a bichíwali keʼré japi aní? ¿Ata machibóaré japi ikiméaré pe aminánami? Ayena ta machiboa. Echi pagótami ko ke machí japi chu ikimea, Jeobá ko a machí. Echi riká aní echi Biblia japi chu ikimea pe aminánami (Isaías 46:10; Santiago 4:14).

2, 3. a) ¿Echi apóstoles piri nárili Jesús? b) ¿Piri ku aneli Jesús?

² Japalí ta leeri echi Biblia, japi aní echoná ata machí japi ma jubá rawé piré, echi kawí ko tasi sineti najuma, nalí suwimea japi we chati nokáami ju. Jesús ko bineri echi pagótami japi raʼíchika tánima Onorúami japi ma nulama echi silíami japi echi wilali jenaʼí Wichimóbachi (Lucas 4:43). Echi apóstoles ko machinali piri rawé nawama echi silíami, alí jéanili: “¿Chu kabú ikimea jepuná namuti, alí chúriká ta aʼlá machiboa japalí mi ma nuláami nisa alí japalí ke me ayó nima echi jubá rawé?” (Mateo 24:3, TNM). Jesús ko tasi aneli piri rawé nima, pe ruyeli bi chu riwélima riweili jenaʼí Wichimóbachi. Japi anili Jesús ma echi riká ikí jipi rawé (iné jubá chukúami nota 24)

³ Jenaʼí capítulo binepo japi ma ikí jipi rawé japi newaré japi ta ma jubá rawé piré. Ami machimea jépuká nakówili ripá riwigachi; alí machimea chúsiá we nirú chati namuti jenaʼí Wichimóbachi.

4, 5. a) ¿Piri ikili ripá japalí Jesús chotásili nulayá? b) Japi aní Apocalipsis 12:12 (TNM), ¿piri isima riweili echi Diablo jenaʼí Wichimóbachi?

⁴ Ma ti bineli capítulo 8 japi 1914 Jesús chotásili nulayá echoná ripá riwigachi (Daniel 7:13, 14). Echi libro Apocalipsis binepo piri ikila: “Nakóali ripá riwigachi, Miguel [japi Jesús ju] * alí wiká ángeles si, sayérili echi dragón [japi Satanás ju] alí echi ángeles”. Ke nayúrili Satanás alí echi demonios, alí jenaʼí Wichimóbachi aʼwátami nili. We kanili echi ángeles ripá riwigachi. Nalí be, ¿piri ikísimi jenaʼí Wichimóbachi? Echi Biblia aní japi nirúlima risoa níliwami. ¿Chúsiá? Jiti echi Diablo we aparúami nima riweili, “jiti teeli bi inama chati isiá” (Apocalipsis 12:7, 9, 12, TNM).

⁵ Echi Diablo we isimí jiti echi pagótami we risoa nilia pirélima. We iyoa iyena jiti teeli bi rawé bitélima jiti Onorúami ko ma ke riwema japi nulama echi Diablo. Jipi ko machiboa japi Jesús anili chu ikimea jubá rawé.

6, 7. ¿Chu nilia pireili echi pagótami nirúachi guerra alí lochéwami?

⁶ Guerras. Jesús jéanili: “Aʼlí jaré oʼwéala silíami pagótamawala ne wabé nakoma auché jaré oʼwéala silíami pagótamawala sayéraga” (Mateo 24:7). Wiká pagótami suwí japalí nirúachi guerra; jipi ko wiká suwí ke me echi riká nílachi chabé ko. Bilé organización japi machí chu ikí echi pagótami omáana piréami, echi ko jéanili japi ne chokichí jonsa alí 1.900 bamíali chéami, 30 millones pagótami suwili japalí niruili guerra, echi bamíali 1914  jonsa suwili pagótami 100 millones japalí nirúachi guerra, wiká pagótami suwili. ¡We aʼmona pireili téemala suwílachi!

⁷ Japi ke olá japi koʼmea. Jesús jéanili: “Ayena cho wikabé pagótami ne wabé ʼlochema” (Mateo 24:7). Jipi tákoré a we raké ichawa echi koʼwáami, a riká be ke olaba japi piri koʼmea, isini kaachi ke olá winomí japi jitra ralimea koʼwáami. Millones pagótami ju japi ke winomiwi, jiti bela ke olá koʼwáami japi koʼmea. Echi Organización Mundial de la Salud, echi nóchami, jéaní japi millones kuuchi ju japi suwí lochea bamíali niraa jiti nayuni ke aʼlá koʼyá.

8, 9. ¿Chúriká ta machí japi anili Jesús ne bichíwali ju?

⁸ Nokomea na kawí. Jesús jéanili: “Echalí wikanáami wabé nokomea jeʼná kawí” (Lucas 21:11). Sinibí bamíali we noká na kawí mayewa japi che we simérika nokomea. Echalí bamíali 1900 jonsa we nokali na kawí alí suwili 2 millones. Echi pagótami ko a niwá máquinas jiti machimea nokáachi kawí, tákoré nirú echi máquinas a riká wiká suwí.

 ⁹ Nawilí. Jesús jéanili: “Ayena cho wikabé pagótami wabé nayúkama”, nirú nawilí japi wiká nachú alí wiká suwí nayúnika (Lucas 21:11). Echi doctores a machí japi chúriká ku sawimea, we nalí nirú nawilí japi ke ku sawiwáami ju. Wiká suwí nayuka tuberculosis, malaria o cólera. Jéaní echi doctor japi nirú sinú nawilí, 30 ju, japi jaré ko ke ku sawiwáami ju.

10. Japi aní 2 Timoteo 3:1-5, ¿chu iyiri nima echi pagótami jubá rawé kaachi?

¹⁰ Echoná 2 Timoteo 3:1-5, echi Biblia jéaní: “Machimea mapu echalí wabé waminánomí rawé siʼnéami mapu ikí galá bichíiko Riosi ne wabé risúu olárami níima”. Japi riká anili echi Pablo, ¿chu nokimea riweili echi pagótami?

• Binoy bi galé.

• We korú winomí.

• Ke nijewi aboni wénwala.

• Ke aní matétarabá.

• Ke nakí aboni téemala.

• We chati raꞌicha.

•   We nakowa alí we obati.

• Noká japi aboni nakí alí ke bichiwi Onorúami.

• A nakí Onorúami, we nalí ke nijéwami ju japi echi nulá.

11. Japi aní Salmo 92:7, ¿chu ikimea japi chati nokáami ju?

¹¹ ¿A bichíwali ju japi echi riká noká echi pagótami jipi? Ayena, suníami nirú pagótami echi iyiri. Onorúami ko suwábima, jéaní: “Japalí echi chati nokáami wiká muwésiachi japi riká riyawi ma siwasaa ko sikirewi, echi riká cho nima echi chati nokáami yúa, ma suwimea” (Salmo 92:7).

12, 13. ¿Piri ka machí tamujé japi Jeobá anili?

¹² Echi Biblia ma echi riká anili japi risoa nilia pirélima echi pagótami ma jubá rawé, nalí achó aní raʼíchali kalabé.

 ¹³ Japi aʼlá moʼama echi Biblia. Echi profeta Daniel osali japi jériká ikimea: “Aminabi we machísima japi ne bichíwali ju” (Daniel 12:4). Japi aʼlá machirúami nima echi Biblia jubá rawé, japi Onorúami binérima riweili jiti aʼlá machimea echi Biblia, chabé piréami ko ke me machili echi Biblia. Jipi ko echi pagótami aʼlá moʼá echi Biblia jiti Jeobá aʼlá machírali bamíali 1914 jona. Echalí jona, aʼlá ruyeri japi we natéami ju machiwaa echi Onorúami riwalá ayénachó binéritami ju japi baʼórima jenaʼí Wichimóbachi, chúsiá mukuli Jesús, chu ikí bilé mukusaa, japi checho ku pirélima japi ma suwili. Ma bineli japi Onorúami wilali bilé silíami, echi isima jiti ma ke che risoa nilia pirélipo. Ayénachó mi bineli chúriká mi kanilia bitélima alí chumi isísaré jiti mi kanílitima Onorúami. Jeobá isili jiti suwaba machísima echi testigos, ¿piri nokimea riweili echi testigo ma machisaa? Echi Biblia anili piri nokimea riweili (iné jubá chukúami notas 21 alí 25).

14. ¿Kumi nawisárami nima echi raʼíchali kalabé alí jépuká ju japi simía binérisia?

¹⁴ Nawisárami nima suníami jenaʼí Wichimóbachi. Jesús jéanili: “Aʼlí jeʼná Galabé Riosi Raʼíchala galá nawisárami níima ne suníami jenaʼí wichimóbachi” (Mateo 24:3, 14). Echi testigo Jeobá bineri echi pagótami 240 países piréami, ayénachó binériwa pagótami isena raʼíchami 1.000 simírikami omáana Wichimóbachi piréami. Echi ko omáana Wichimoba piré alí bineri pagótami jépuká ju echi Silíami japi Onorúami wilali, japi baʼóami niwama jenaʼí Wichimóbachi (Apocalipsis 7:9). Ke bilé nipaká bineri, aʼláala ke laró nalí  kichíliwami ju, tákoré echi riká ikiyé tasi sineti riwema bineria jarecho; Jesús ko jéanili japi kichírami nima (Lucas 21:17).

15. a) ¿Ami ko mayé japi ta ma jubá rawé piré? Alí, ¿chúriká mi machí? b) ¿Chu ikimea japi ke nijewi Jeobá alí japi a nijewi ru?

¹⁵ ¿Ami ko mayé japi ta ma jubá rawé piré? Echi Biblia anili japi chu riwélima riweili jenaʼí Wichimóbachi, japalí ma jubá rawé kaachi nirúlima riweili chati namuti alí a bichíwali ju. Ma mulipi, Jeobá jéanimea japi ma ke che nawesa járipo echi Biblia jitra, ¿chúsiá? (Mateo 24:14). Jiti Jeobá ma suwábima echi chati nokáami. ¿Chúriká isímalé? Armagedón kaachi, echi ko aniwáami ju japalí Jeobá nulesa Jesús alí echi ángeles jiti koʼwimea japi ke nijéwiami nili Jeobá alí echi Jesús (2 Tesalonicenses 1:6-9). Ma ke che itélima Satanás japi ikalea bineri echi pagótami. Japi a nijewi ko Jeobá alí echi Silíami japi Jeobá wilali, echi bi kanilia pirélima (Apocalipsis 20:1-3; 21:3-5).

16. ¿Chumi isísaré ami Jeobá amígowala nínalaká?

¹⁶ Ata machí japi echi Satanás ma ke nulama jenaʼí Wichimóbachi. Alí jemi anisare: “¿Chu che ni isísaré liba?”, Jeobá ko nakí japi mi aminabi we binema echi Biblia. Echi ko nakí japi mi ne iʼwérika isima binea echi jitra (Juan 17:3). Echi testigo Jeobá sinibí tarali napawí jiti echi pagótami aʼlá moʼama japi aní echi Biblia. Iʼwera isí simía napawíliwachi (leeri Hebreos 10:24, 25). Chati mi isíami nísaká japi Jeobá ke galé, ma ke echi riká isí. Echi riká isísaká, Jeobá mi amígowala nima (Santiago 4:8).

17. ¿Chúsiá echi pagótami chati nokáami ke machimea piri rawé suwábitami nima?

 ¹⁷ Echi pagótami ke machimea echi rawé japalí Jeobá ma suwábisa echi pagótami japi ke nijewi, echi apóstol Pablo anili japi echi rawé chuwé nawama japi riká “bilé chikórami” sayiná nawá (1 Tesalonicenses 5:2, TNM). Jesús ayénachó anili japi nirúlima pagótami japi ke tamujé bichíwima ruyewa japi ma jubá rawé piré. Jéanili echi Jesús: “Chopi mapurigá níili chabé kiʼyá mapalí echi Noé riwéami rijói bitéali jenaʼí wichimóbachi, echirigá achigórigá níima echalí ne jubá rawé [...] echi jaré kiʼyá piréami pagótami chopi wabé koʼogá, bajiga muchili. Ayena cho jaré aboni we niwítiya muchili [...]. Aʼlí ne siʼnéami aboni miná siʼlili echoʼná baʼwírali. Aʼlí echirigá achigórigá ikimea mapalí Nijeni ke sayiná ku nolínama jenaʼí wichimóbachi” (Mateo 24:37-39).

18. ¿Piri anili Jesús japi ta nokiboa?

¹⁸ Jesús ko anili japi jaré pagótami ke busureka mochima riweili, ¿chúsiá echi anili? Jiti nata bi mochima riweili koʼwáami alí bajíwami jiti bela Jesús ko jéanili: “Galá ʼnagá muchisi; ayena cho sinibí tániga raʼichasi Riosi yuwa mapurigá ketasi ikimea ʼyemi yuwa mapurigá ne bichíwali ikimea echi auché jaré jenaʼí wichimóbachi piréami pagótami; ayena cho tansi mapurigá ʼyémitamo bacháami tamí yuwa jawárami níibo. Nijeni wilárami níili mapurigá Kuʼwíriami niráa” (Lucas 21:34-36). ¿Chúsiá we natéami ju nijéwami niwa japi aní Jesús? Jiti echi Diablo nulá jenaʼí Wichimoba echi ko ma mukumea. Jeobá alí Jesús jéanema japi ke nijewi: japi a nijéwami nili ko sinibí pirélima jenaʼí Wichimóbachi we baʼóachi (Juan 3:16, TNM; 2 Pedro 3:13).