1. ¿Chúriká nakí Onorúami japi pirélima echi pagótami?

ONORÚAMI ko nakí japi echi pagótami kanílika pirélima jenaʼí Wichimóbachi. Echi isiili niwayá Adán alí Eva, echi ko we baʼóachi piréili jenaʼí Wichimóbachi. Jéaneli japi wiká kuúchima, japi tibuma suwaba namuti japi ikí nirú jenaʼí Wichimóbachi (Génesis 1:28; 2:8, 9, 15; iné jubá chukúami nota 6).

2. a) ¿Chúriká mi machimea japi né echi riká isima Onorúami jenaʼí Wichimóbachi? b) ¿Jépuká ko a sinibí pirélima?

² ¿Ami ko mayé japi siné rawé we baʼóachi pirélipo? Jeobá jériká aní: “Japi ni anili né echi riká ni isima” (Isaías 46:9-11; 55:11). Ayena echi riká isima japi anili, tasi wesi omérima chewia. Onorúami niwali echi Wichimoba jiti echi pagótami pirélima (Isaías 45:18). ¿Chu nokáami pagótami nakili Onorúami japi pirélima jenaʼí Wichimóbachi? ¿Chu ikí bamíali? Echi Biblia aní: “Echi japi aʼlá nokáami ju ko kawí iyárami nima, alí sinibí pirélima echoná” (Salmo 37:29; Apocalipsis 21:3, 4).

3. ¿Chúsiá echi pagótami risoa ikí?

³ Echi pagótami nayuka suwí, alí nirú nakówami, anakupi nakóaka suwí. Onorúami ko ke nakí japi echi riká ikimea. ¿Chúsiá che echi riká ikili ba? Echi Biblia bi aní chúsiá echi riká ikí.

4, 5. a) ¿Jépuká nili japi Eva yúa raʼíchili néeka echi sinowi? b) ¿Chúsiá chikórami najítili echi rijoi?

⁴ Echi Biblia ko aní japi Onorúami sayela ju echi Diablo,  ayénachó Satanás aniliwa. Echi ko néeli bilé sinowi jiti Eva yúa raʼichama echoná Edén piréachi (Apocalipsis 12:9; Génesis 3:1). Echi ko isili jiti Eva mayema japi echi sinowi ju japi yúa raʼichi (iné jubá chukúami nota 7).

⁵ ¿A Onorúami niwali echi Satanás? ¡Ke tasi! ­Japalí Onorúami niwayé echi Wichimoba japoná pirélima Adán alí Eva, echoná ripá rewegachi ma cho niruili wiká ángeles. Bilé echi ángel Diablo najítili (Job 38:4, 7). ¿Chúriká najítili? Japi riká bilé rijoi japi ke sineti chikórami ju. Koruli japi ke echi níwali ju. Echi bi nata ­iyénili. Ma ke wesi itéachi ko ayó bakí chikosia. Tasi chikórami ochérili, binoy chikórami najítili (leeri Santiago 1:13-15; iné jubá chukúami nota 8).

6. ¿Chúriká isili bilé ángel jiti Onorúami sayela najítima?

⁶ Echi riká isili echi ángel. Ma niwálachi Jeobá Adán alí Eva, aneli japi kuúchima jiti “wiká pirélima” (Génesis 1:27, 28). Echi ángel jériká nátili: ‘¡Sinéami echi pagótami tamí nalí nijéwisaré, Jeobá ko ke!ʼ. Echi ángel ko koruli japi Jeobá níwala ju, echi ko nakili japi echi pagótami echi nalí nijéwima. Echi ko mayérili Eva japi Onorúami ikaléami ju (leeri Génesis 3:4, 5). * Echi riká isiika Satanás alí Diablo najítili, Onorúami sayela ayénili.

7. a) ¿Chúsiá suwili Adán alí Eva? b) ¿Chúsiá ta wiláami ayénisimi alí ochérami alí suwí ma?

⁷ Jeobá ko aneli Adán alí Eva japi ke ukuma bilé rakala, jiti ke suwimea. Echi ko ke nijéwili Jeobá alí a ukuli echi rakéami (Génesis 2:17; 3:6). Japi riká aneli Jeobá japi ke ukuma, ke nijéwili alí suwili (Génesis 3:17-19). Adán alí Eva kúchuwala chati cho nokáami nili, ayénachó suwili  ­(leeri Romanos 5:12). Jiti machiboa japi chúriká chati nokáami ayenli echi kúchuwala, inepo chúriká ju. Japi riká bilé adobera chikónami niisa echi yiri cho buyánima chikónami. Echi riká cho ju japalí Adán ke nijéwili Onorúami, echalí jonsa chati isíami ayenli. Ata Adán jona síkami ju, jiti bela ta “chati nokáami” kao ni alí ochérami cho nílisi echi pagótami japi riká ikili Adán jiti bela suwisia ko echi pagótami (Romanos 3:23; iné jubá chukúami nota 9).

8, 9. a) ¿Piri isili Satanás jiti Adán alí Eva ke bichíwima Onorúami? b) ¿Chúsiá Jeobá ke oyali echi ke nijéwiami?

⁸ Satanás bachá isili ke nijewia Jeobá, jéaneli Adán alí Eva japi kecho nijéwima Onorúami. Echi ko nakili japi Adán alí Eva mayema japi Jeobá ikaleka raʼíchami ju, anili japi ke aʼlá nuláami nima japi ke iyama japi newalé. Ayénachó Satanás aneli japi echi pagótami ke newalema Onorúami jiti machimea piri aʼlá ju alí piri ke aʼlá ju. Alí ru, ¿piri isisaa riweli Jeobá? Echi ko sapú miʼasa riweli echi Satanás alí echi ke nijéwami si. We be nalí, a echi riká isísaká, ¿achi machibólialé japi Satanás ikaléami ju? Pe ke.

⁹ Jeobá ko tasi oyali echalí rawé japalí ke nijéwili. Nalí risensi iyali echi pagótami jiti aboni nuláami nima. Echi riká newaré japi echi Satanás we ikaléami ju, japi Jeobá bi bineli machí japi aʼlá ju. Echoná capítulo 11 mi che machimea. ¿A aʼlá nili japi nokali Adán alí Eva? ¿A bichíwisa riweli Satanás, wechi ko nijéwisa riweli Onorúami? Jeobá ko suwaba namuti iyali Adán alí Eva japi newalé, iyali japi we baʼóachi pirélima, japi ke nayúa pirélima alí we kanílika nochama. Nalí echi Satanás isili japi ma ke baʼóachi pirélima. Mujé echoná bitéami nísaká, ¿jepi mi nijéwimili?

10. ¿Jépuká mi nalí nijéwima?

¹⁰ Jipi rawé, tamujé aboi aniboa piri ta nokinalia. A nijéwipo Jeobá japi riká walúala nuláami niraa, echi riká nokiká néwariwélitipo japi echi Satanás we ikaléami ju.  Wechi ko mi Satanás nalí nijéwima japi riká walúala nuláami (Salmo 73:28; leeri Proverbios 27:11). * Kuaabi pagótami nirú japi a nijéwami ju Onorúami. Tasi Onorú­ami ju japi nulá jenaʼí Wichimóbachi. ¿Jépuká nalí ju japi nulá jenaʼí Wichimóbachi?

11, 12. a) ¿Piri aneli echi Satanás, Jesús? b) ¿Chu yiri textos aní japi Satanás ju japi nulá jenaʼí Wichimóbachi?

¹¹ Jesús ko ma machiyé jepi nulá jenaʼí Wichimóbachi. Satanás ko aneli Jesús: “‘Nijé nimí ʼyama suwaba jeʼná walubélawalaʼ nijé mi wilama jiti mi silíami nima ‘arigá tamí yuwa bacháami chokoba wilisáagáʼ” (Mateo 4:8, 9; Lucas 4:5, 6). ¿Chúsiá echi riká anili Satanás? Jiti echi binoy nuláami ju jenaʼí Wichimóbachi, echi ju japi nulé echi isélikami japi jipi nirú.

¹² ¿Chúsiá Satanás ju japi nulá jenaʼí Wichimóbachi? ¿Wechi ke Jeobá isili suwaba namuti niwayá japi ikí nirú, jiti omériami ju niwayá? (Apocalipsis 4:11). Ayena a, we nalí Jesús anili japi Satanás “walula nuláami ju jenaʼí wichimóbachi” (Juan 12:31; 14:30; 16:11). Echi Pablo ayénachó anili japi Satanás, echi Diablo, “walula nuláami ju [...] jenaʼí wichimóbachi” (2 Corintios 4:3, 4). Ayénachó echi Juan osali japi “jenaʼí wichimóbachi piréami [...] abóniko arigá waminá omératami ju echi riablo jiti” (1 Juan 5:19).

13. ¿Chúsiá ta ma nakí japi ma we baʼólima jenaʼí Wichimóbachi?

¹³ Aminabi we chati noká echi pagótami. We nirú sontarsi nakówami, silíami ke aʼlá nuláami, jarecho ko ikaleka bineri echi pagótami, jarecho ko we obátami ju, jarecho ko miʼami ju. Echi pagótami ko we iʼwérika noká kariwea jiti ke nirúlima chati nokiwáami we nalí tasi omeri kariwea. Echi Biblia ko aní japi Onorúami ko a omérima kariwea; Armagedón simírisa we simá riwélima jenaʼí Wichimóbachi (Apocalipsis 16:14-16; iné jubá chukúami nota 10).

14. ¿Jépuká wilali Onorúami japi Silíami nima? ¿Piri isima silíami nisa?

¹⁴ Jeobá ko wilali Jesús jiti nulama japi riká silíami ­niraa. Echi ko nulama ripá riwigachi jonsa. Chabé jona echi Biblia ko anili japi echi pagótami kanílika pirélima japalí Jesús silíami nisa, sinibí rojorama alí baʼoa wilimea (Isaías 9:6, 7). Jesús ko binérili echi japi yúa iyénili jiti raʼichama Onorúami yúa alí jéanema: “Riwé japi mujé gobiérnowala nawama. Isí japi mi binoy nakí ripá riwigachi echi riká cho isí jenaʼí Wichimóbachi” (Mateo 6:10, TNM). Capítulo 8 mi che machimea. Echi Biblia aní: “Japalí jepuná isélikami a bijí piréachi echi ­Onorúami, ripá siyónachi bitéami, wilama bilé gobierno japi ke sineti suwábitami nima. Alí echi binói gobiérnowala ke simértami nima bilecho pueblo. Mojonama alí suwábima suwaba jepuná isélikami, alí echi binoy né sinibimti bitélima” (Daniel 2:44). We baʼóami niwama jenaʼí Wichimóbachi (iné jubá chukúami nota 11).

15. ¿Piri aniwáami ju echi “bukulíwami wichimoba”?

¹⁵ Echi Biblia aní japi nirúlima “bukulíwami riwigachi; alí bukulíwami wichimoba, mapoʼná chopi nirúlama echi wabé galabé wachínaga oluwáwami, mapurigá Riosi bachá niráa bichíwaga anili mapu nirúlama” (2 Pedro 3:13; Isaías 65:17). Japalí echi Biblia anisaa “wichimoba”, echi ko aniyaru japi echi pagótami ju (Génesis 11:1). Japi a nijéwami ju ko japi riká “bukulíwami wichimoba” ju; echi ko pirélima echoná Wichimóbachi we baʼóachi.

16. ¿Piri mi chiliwema Onorúami ami nijéwami nísaká? ¿Piri mi isima ami narénalaká?

¹⁶ Jesús ko anili japi echi pagótami we baʼóachi “pirélama ne sinibí” (Marcos 10:30). ¿Piri mi isísaré jiti mi sinibí bitélima? Leeri Juan 3:16 (TNM) * alí Juan 17:3, echi  Biblia mi ruyé. Jipi ko inepo piri nirúlima jenaʼí Wichimóbachi.

17, 18. ¿Chúriká mi machí japi mi ke majaa bitélima jenaʼí Wichimóbachi?

¹⁷ Echi obátami ko ke si pirélima. Ma ke pirélima we obátami ko jenaʼí Wichimóbachi (Salmo 37:10, 11). Onorú­ami “suwábama echi nakówami” (Salmo 46:9; Isaías 2:4). Japi Onorúami bi nijéwami ju sinibí pirélima jenaʼí Wichimóbachi ma ke majaa pirélima (Salmo 72:7).

¹⁸ Ke majaa pirélima japi a nijéwami ju ko Jeobá. Japalí pireili echi israelitas a nijéwami nili Onorúami, ke majaa pireili (Levítico 25:18, 19). Ma we baʼóachi jenaʼí Wichimóbachi. ¡Tamujé ma kecho majaa pirélipo! (Leeri Isaías 32:18; * Miqueas 4:4) *.

19. ¿Chúriká mi machí japi ke wesi lochea pirélima?

¹⁹ Ma ke wesi lochea pirélima. “Nirúlima wabé koʼwá­ami jenaʼí Wichimóbachi” (Salmo 72:16). Jeobá tamujé iyama japi ta newalé ata nijéwami nísaká; ayénachó “echoná wasárili we rakema ichásuwa” (Salmo 67:6).

20. ¿Chúriká mi machí japi we baʼóami nima jenaʼí Wichimóbachi?

²⁰ We simá riwélima. Sinéami pirélima baʼóachi kalírili, simá riká jama wiká siwáchili (leeri Isaías 65:21, 22; * Apocalipsis 11:18). We baʼóachi nima japi rikáachi nili Jardín de Edén. Jeobá ko sinibí tamujé iyama japi ta  ­newalé. Echi Biblia ko aní japi Onorúami irápima binoy sikala jiti iyama echi pagótami japi aboi nakí (Salmo 145:16).

21. ¿A obátami nima echi namuti japi rabóayé nirú?

²¹ Ma ke obátami nima japi rabóayé nirúami ju. Japi rabóayé nirúami ju ma ke ikima echi pagótami. Echi kuuchi ma ke majama echi namuti japi jipi we obátami ju (leeri Isaías 11:6, 8; * 65:25).

22. Jesús silíami nisa, ¿piri isima?

²² Ke wesi nayuma. Japalí Jesús biteili jenaʼí Wichimóbachi wiká pagótami ku saʼweli (Mateo 9:35; Marcos 1:40-42; Juan 5:5-9). Onorúami wilali Jesús japi walúala silíami nima, echi ko sinéami saʼwema nayúami. Ma ke wesi jéanimea “nawiluni” (Isaías 33:24; 35:5, 6).

23. ¿Piri isima Onorúami?

²³ Japi ma suwili checho ku pirélima. Onorúami ko anili japi ku oʼwíntima wiká pagótami japi ma suwili. Echi riká nima, “ne siʼnéami echi jaré suwíami ku ʼowínama” (Juan 11:23, 24; leeri Hechos 24:15).

24. ¿Ami ko kanílisa nila bitea echoná Wichimóbachi we baʼóachi?

²⁴ Ibili niraa animea achi che binénala echi Biblia o ke ma. Ami Jeobá nalí nijéwinalaká, ami sinibí we kanílika bitélima jipi alí pe aminana si. Bilé rijoi ko nárili Jesús achi newalama echi ma mukúlachi, Jesús ko jéaneli: “tamí mi yúa asimea echoná Wichimóbachi we baʼóachi” (Lucas 23:43, TNM). Che binepo japi Jesús ayena a echi riká isima.