1, 2. a) ¿Chu iyiri namuti mi we natéami nareli, chúsiá mi we natéami niraa? b) ¿Chu iyiri ne wabé simérika natéami ju japi Onorúami mi chiliweli?

¿AMI chiliwéeri bilé namuti? ¿Chu iyiri mi namuti we natéami nirali? Mujé ko we natéami niraa ineni japi mi iyáari. Mujé ko we kanili japi mi chiliweri alí mi jéaní: “Na ju japi ni newalé”, matétara mi iyá japi mi chiliweli.

² Suwaba namuti japi ikí ta olá Jeobá nijíala ju; bilepi bi nirú japi ta ne wabé simérika newalé; echi ko ju japi Jeobá júali Jesús jenaʼí Wichimóbachi, echi ju japi Onorúami iyali echi pagótami. Jenaʼí mi che binema japi Jeobá júali Jesucristo, jiti ta sinibí pirélipo (leeri Mateo 20:28). Echi riká isili jiti nakiyé echi pagótami.

3. ¿Chúsiá suwí echi pagótami?

³ Jeobá nijili Jesús jiti mukumea, echi riká ralaká natétili echi pagótami jiti ma ke che suwimea, ayénachó jiti ta ke che chati nokáami nipo (Efesios 1:7). ¿Chúsiá ralaká natétili Jeobá echi pagótami? Binepo chu ikili ma chabé bamíali echomí Edén, echoná ko pireili Adán alí Eva; echi ko ke nijéwami nili, ayénachó chati nokali, jiti bela suwila ko. Echi pagótami ke aʼlá  sébali oláami ju jiti Adán alí Eva echi iyiri nili alí ta suwí (iné jubá chukúami nota 9).

4. ¿Jépuká nili Adán alí chúriká biteili ne chokichí?

⁴ Adán ko bachá niwárami nili Jeobá jitra. Niwáari japi ke chati namuti nátiami nima, ke nayuma, ke ochérami nima, ke cho mukumea; aʼlá sébali oláami nili. Adán ko “Riosi jiti niwárami níili”. Jeobá ko japi riká nolá niraa inénili Adán (Lucas 3:38). Jeobá ko sinibí Adán yúa raʼíchili. Echi ko ruyeli piri isísaré alí chúriká nochama jiti kanílima nocha (Génesis 1:28-30; 2:16, 17).

5. ¿Chúsiá jéaní echi Biblia japi Jeobá niwali Adán japi riká binoy?

⁵ Jeobá ko niwali Adán japi riká binoy isíami ju (Génesis 1:27). Nakíami, aʼlá nátami, aʼlá isíami ayénachó jiwérami. Onorúami ko niwali Adán jiti isima japi binoy nakí, Adán ko tasi japi riká robot nili japi bi noká japi riká bilé rijoi nulé. Echi Adán a Onorúami nalí nijéwami nísaká, a omérimili sinibí bitea Wichimóbachi we baʼóachi.

6. ¿Piri namuti ma ke che olali Adán japalí ma ke nijéwili Jeobá?

⁶ Adán ko mukuli jiti ke nijéwili Onorúami. ¿Piri namuti ma ke che olali? Ma ke Jeobá amígowala nili, ma ke aʼlá sébali oláami nili alí ke cho biteili Wichimóbachi we baʼóachi (Génesis 3:17-19). Adán alí Eva aboni ke nijéwili Onorúami, echalí jonsa machili japi ma ke iyiri namuti narema.

7, 8. Jiti Adán iyiri nili, ¿chu ikí?

⁷ Echi Adán iyiri ju japi “bachá niráa chati olali. Echijiti pe wakinana echi Arani ma mukuli. [...] Aʼlí echalí jonsa ne siʼnéami pagótami arigá suwísimi mapujiti ne siʼnéami chati olali” (Romanos 5:12). Adán ke  nijéwili, echi iyiri nili japi tamujé ma ke aʼlá sébali oláami nipo alí japi suwimea echi pagótami (Romanos 7:14, TNM). ¿Achi ta simá rikáachi pirélipiré pe aminánami? Ayena.

⁸ Tasi wesi pagótami omeri natetia japi isili Adán. Echi pagótami ke aʼlá sébali oláami ju alí suwí jiti Adán iyiri nili. Jeobá ko natétili jiti ma ke che suwimea echi pagótami. Binepo piri ju japi Jeobá natétili alí chúriká tamó iʼwírima japi echi isili.

9. ¿Chúriká isili Jeobá natetia?

⁹ Ke bilé pagótami ku omérima natetia japi isili Adán. Tamujé ko ke omero natetia, ¿chúsiá ke? Jiti ta ke sébali aʼlá nokáami ju (Salmo 49:7, 8). Jipi ru, ¿jépuká ju japi ku natétima japi isili Adán? Bilecho rijoi japi iyiri Adán, ke chati namuti isíami. Echi Biblia ko jéaní japi bilé rijoi “Binói niráa nijali mapurigá Binói miʼlirúami níima” (1 Timoteo 2:6). Jepuná rijoi ko ke sineti chati isíami nili, japi riká Adán ne kulii.

10. ¿Jépuká nijili Jeobá jiti ku omérima natetia?

¹⁰ ¿Chu isili Jeobá jiti ku omérima natetia? Jeobá júuli binoy nolá Jesús jenaʼí Wichimóbachi, japi we galeli (1 Juan 4:9, 10). Jesús ko a nijéwami nili nulewa japi ripá jona jenaʼí Wichimóbachi nawama (Filipenses 2:7). Jeobá achali Jesús María ropálachi jiti echi riká ochérima Jesús jenaʼí, rijoi niraa. Echi riká ochérili Jesús jenaʼí Wichimóbachi, jiti bela ke chati oláami nili, ke cho sineti chati isili (Lucas 1:35).

11. ¿Chu isili Jesús jiti ma ke che suwimea echi pagótami?

¹¹ Japi riká ta ma bineli, ne bachá bitéami rijoi ke  nijéwili Jeobá, echi isili japi tamujé ma ke sinibí pirélipo. ¿A nirúiré bilecho rijoi jiti omérima isiá jiti echi pagótami ma ke che suwimea? Ayena (leeri Romanos 5:19). Jesús ko ke chati isíami nili; echi ko mukuká natétili (1 Corintios 15:45). Tamujé ko suwí jiti ta Adán kúchuwala ju, nalí be Jesús ko mukuli jiti echi pagótami ma ke che suwimea (1 Corintios 15:21, 22).

12. ¿Chúsiá risoa olárami nili Jesús?

¹² Echi Biblia ko aní japi Jesús we risoa oloká miʼari. Risoa olari wipisoa, sikali michoka uchali tonchi; echi riká okótika miʼari (Juan 19:1, 16-18, 30, TNM; iné jubá chukúami nota 15). ¿Chúsiá risoa olari Jesús? Jiti Satanás jéaníami ju japi risoa olásiwa ko echi pagótami ke nijéwima Jeobá. Jesús ko néwariwélitili japi a nijéwami ju Jeobá chúkuré risoa ikili. ¡Jeobá ko we kanili jiti Jesús we aʼlá nijéwami nílampá japi iyenko mukuli! (Proverbios 27:11).

13. ¿Chúriká isili Jeobá ku natetia?

¹³ ¿Piri isika ku natétili Jeobá? 14 inárachi michá judíos nisán nili, bamíali 33, echalí bamíali nili japi Jeobá riweli jiti echi pagótami risoa olaká miʼama Jesús (Hebreos 10:10). Ma bikiá rawé chilesa, Jeobá ko ku owíntili Jesús jiti che ku bitélima; ma ke ku biteili japi riká rijoi niraa, nalí japi riká ángel ku ju. Jaré rawé ku simirsa, Jesús simili ripá Onolá yúa, echi riká sunili natetia (Hebreos 9:24). Jeobá we kanili Jesús echi isílachi mukuyá tamujé jitra. Jesús ko ma natétili, jiti ma ke suwimea echi pagótami, ma ke chati nokáami pirélima (leeri Romanos 3:23, 24).

14, 15. ¿Piri ta nokisare jiti Jeobá ku tamujé wikáwima?

¹⁴ We natéami ju japi Jeobá tamujé chiliweli, jiti júali Jesús jenaʼí Wichimóbachi, jiti mukumea tamujé jitra. ¿Chúsiá we natéami ju japi isili Jesús alí piri ta narepo pe aminánami? Ma binepo.

¹⁵ Wikawi chati namuti japi ta nokali. Jiti ta ke sinibí aʼlá nokáami ju, isini kaachi ata cha riká raʼíchami ju alí ta aʼmonáriti jarecho (Colosenses 1:13, 14). ¿Chúriká be tamujé ku wikáwima ba? Ata ne bichíwika aniboa japi ta ke kanila echi riká nokisaa, jéanepo Jeobá japi ku wikáwima japi ta chati namuti nokali. Echi riká ti anésaká, Jeobá a ku wikáwima (1 Juan 1:8, 9).

16. ¿Chuti nokisare jiti ta ke siwepo echi chati namuti jitra japi ta nokali?

¹⁶ Ke siwepo nata echi chati japi ta nokali. Japalí ta natasa echi chati namuti japi ta nokali, ata nili japi ta ke iyiri narepo, jiti ta ke kanili japi ta nokali. Ke siwepo nalí iʼwérili anepo Jeobá japi tamó iʼwírima, jiti echi ko a wikáwima japi ta nokali; echi ko nami raʼíchiwa ayénachó ke ku natama echi chati japi ta nokali (Hebreos 9:13, 14). Jeobá ko nakí japi ta yúa raʼichabo risoa nilia pirélisa (Hebreos 4:14-16). Ata echi riká nokisáaká tamujé machiboa japi Jeobá ko we kanílima tamó yúa.

17. Jiti Jesús mukúlampá, ¿chúriká pirélipo?

¹⁷ Ata sinibí pirélipa. Echi Biblia ko aní: “Echi chati nokáami mukuká ku nateti, nalí Jeobá ko isimí japi ta sinibí pirélipo, japi isili Jesús jitra” (Romanos 6:23, TNM). Jesús ko mukuli tamujé jitra; ata sinibí pirélipo ke sineti nayuka (Apocalipsis 21:4). ¿Piri ta nokisare jiti ta echi rikáachi pirélipo?

18. ¿Chúriká ti machí japi Jeobá alí Jesús we tamó nakí?

¹⁸ ¿Ami we kanili chiliwésiwa bilé namuti? Jeobá ko tamujé chiliweli bilé namuti we natéami; Juan 3:16 (TNM), jéaní: “Onorúami ko wabé galeli echi pagótami. Jiti bela nijila ko binoy nolá”. Waʼlú matétara iyabo japi isili Jeobá. A echi riká isili, jiti Jeobá ko we nakí sinéami pagótami. Ayénachó ta machí japi Jesús a nakí sinéami pagótami, jiti nakili japi miʼlirúami nima tamujé jitra (Juan 15:13). Japi ta chiliweri echi riká newaré japi Jeobá alí Jesús we tamó nakí (Gálatas 2:20, TNM).

19, 20. a) ¿Piri mi isima ami Onorúami amígowala nínalaká? b) Ami bichíwaká japi Jesús mukuli tamujé jitra, ¿piri mi isima?

¹⁹ Ma mi binélampá japi Jeobá mi nakí, mujé ayénachó mi we nakimea. Echi ko ju japi riká mi olasa bilé amigo: ami we galé jiti mi a machiyampa piri isíami ju. Juan 17:3 echoná aní japi machiboa Jeobá. We mi binésaká, aminabi mi we nakimea Jeobá; ayénachó mi we nijéwami nima, we mi aʼlá amigo nima Jeobá yúa. Ke riwé binea echi Biblia jiti mi we machimea Jeobá (1 Juan 5:3).

²⁰ Bichiwi japi Jesús natétili mukuká. Echi Biblia jéaní: “Ne siʼnéami mapu ikí galá bichíiko echi Riosi Ranala jiti, échiko ma sinibí piréami ju” (Juan 3:36). ¿Jépuká ju echi japi “galá bichíiko”? Echi ko ju japi nijewi japi Jesús binérili (Juan 13:15). Ke mi jéanimea bi japi mi bichiwi Jesús. Ami bichíwisaká japi Jesús mukuli tamujé jitra, ami isísaré japi Jesús binérili. Echoná Santiago 2:26, jéaní: “Ayénachó bilé rijói bichíilawala ma mukúami niráa achó ju mapalí echi rijói wepi  echirigá aníami ju mapu binói galá bichíyami ju Riosi, chopi ketasi galabé ologá bité”.

21, 22. a) ¿Chúsiá mi simisare newalasia japalí Jesús mukuli? b) ¿Piri mi binema capítulo 6 alí 7?

²¹ Sinibí bamíali simí japalí newalabo réachi japalí Jesús mukuli. Echalí rokó japalí kecho mukumeya, Jesús ko nulali japi napawipo newalasia japalí echi mukusaa. Sinibí bamíali niraa ta napawí newalasia japalí Jesús mukuli (Mateo 26:26-28). Jesús ko a bijí nakí japi ta newalabo japalí echi mukuli, jiti echi isílampá natetia jiti ta sinibí pirélipa. Echi ko jéanili: “Sinibí jeʼná jerigá olasi mapurigátamo galá ʼnatabo tamí jiti” (leeri Lucas 22:19). Ami simisáaká echalí, ami we natéami niraa japi nokali Jesús alí Jeobá (iné jubá chukúami nota 16).

²² Japi Jesús natétili mukuká echi bi ju ne wabé simérika natéami japi Jeobá chiliweli echi pagótami (2 Corintios 9:14, 15). Echoná capítulos 6 alí 7 ami binema japi echi pagótami japi ma suwili checho ku pirélima jiti Jesús ma mukuli tamujé jitra.