CAPÍTULO 8
¿Piri isima echi Silíami japi Onorúami wilali?
1. ¿Chu aníami oración inéporé jenaʼí?
WIKÁ pagótami ko ma machí echi oración Padrenuestro. Jesucristo ko binérili echi japi yúa éenili japi piri anema Onorúami yúa raʼicha. ¿Piri aneli Jesús japi nokimea? ¿Chúsiá we natéami ju japi ta machiboa jipi rawé echi oración japi anili Jesús?
2. Jesús ko binérili japi bikiá namuti tánipo Onorúami, ¿ami machí piri tánili?
2 Jesús jéaneli: “Tamujé Onolá japi mi ripá riwigachi atí, kiti riwé japi echi pagótami cha riká raʼichama mujé riwalá jitra. Wilá bilé Silíami jiti nulama jenaʼí” (leeri Mateo 6:9, 10, TNM). * ¿Chúsiá echi anili Jesús? (Iné jubá chukúami nota 20).
3. ¿Piri binéporé jena capítulo?
3 Ma ti bineli japi Onorúami riwalá ko Jeobá ju. Ayénachó mi ma bineli japi chúriká nakili Onorúami japi pirélima echi pagótami. ¿Chúsiá jéanili Jesús: “Wilá bilé Silíami jiti nulama jenaʼí”? Jenaʼí binéporé piri ka isima echi gobierno, o echi Silíami japi Onorúami wilali. Ayénachó binepo piri isima echi Silíami jiti echi pagótami ma ke cha riká raʼichama echi Onorúami riwalá jitra.
ONORÚAMI WILALI BILÉ SILÍAMI JITI NULAMA
4. ¿Jépuká ju echi Silíami japi Onorúami wilali?
4 Jeobá ko wilali bilé Silíami, o gobierno, ripá riwigachi. Echi Silíami ko Jesús ju. Echi Biblia ko aní japi Onorúami chapili jiti nuláami nima “mapujiti Binói ne Walubela ju siʼnéami echi auché jaré oʼwéala yuwa, ayénachó ne Walubela Silíami ju siʼnéami echi auché jaré silíami yuwa” (Apocalipsis 17:14). Jesús ko we aʼlá nuláami nima, tasi japi riká echi isélikami nima japi nulá jipi. Jesús bineli walúala silíami nima.
5. ¿Kumi jonsa nulama echi Silíami japi Jeobá wilali? ¿Jépuká nulema?
5 Japalí Jesús ku owínili mukusaa, 40 rawé iyénisa, ku ripá simili. Pe aminana ko Jeobá wilali jiti silíami nima (Hechos 2:33). Echi Silíami ripá riwigachi asaká nulama. Echi ko nulema echi pagótami jenaʼí Wichimóbachi piréami (Apocalipsis 11:15). Jéaní echi Biblia japi echi Silíami “nulá mapurigá Walubela niráa” (2 Timoteo 4:18).
6, 7. ¿Chúsiá Jesús bi ju japi aʼlá nuláami nima?
6 Echi Biblia ko jéaní japi Jesús nalí ne walúala nuláami ju, echi isélikami japi nirú jenaʼí ko ke, jiti Jesús ko ke “siné mukumea” (Romanos 6:9). Sinéami isélikami japi nirú jipi siné rawé ma ke itélima. Jesús ko ma ke siné mukumea. Jesús ko a omérima nijía namuti japi ta newalé, ke siné suwibama.
7 Echi Biblia ko jéaní japi Jesús ko we aʼlá silíami nima jiti echi ko a nitimama echi pagótami: “Jeobá iyama espíritu [o binoy jiwérala]. Jiti bela, echi ko we aʼlá machíami nima, we aʼlá nátami. Sinibí aʼlá busuré nijima. We jiwérami nima. Echi ko machimea japi aʼlá ju alí riwíwika nijéwima Jeobá”. Ayénachó echi Biblia ko jéaní: “Echi ko aʼlá oyérima jiti machimea japi ne bichíwali ju. Alí wachía oyérima japi risoa nílika piré” (Isaías 11:2-4). ¿Ami kanílisa nili olayá bilé silíami japi riká Jesús?
8. ¿Chúriká ta machí japi ke bineli nulama Jesús?
8 Onorúami ju japi jáwili jaré pagótami jiti Jesús yúa nulama ripá jonsa. Echi Pablo ko jéaneli Timoteo: “Ayénachóta Binói yuwa jawárami níibo mapurigá oʼwéala niráa” (2 Timoteo 2:12). ¿Acha wiká pagótami si nulama Jesús yúa?
9. a) ¿Chu ikí pagótami nima japi Jesús yúa nulama? b) ¿Chu kabú jonsa napabúsimi Jeobá?
9 Ma ti binékirú capítulo 7 japi Juan riwali Jesús ma silíami kaachi ripá, 144.000 pagótami yúa (leeri Apocalipsis 14:1). ¿Jépuká ju echi 144.000? Juan ko jéanili: “Echi ko ju japi echi Méchuli yúa eena japomí simí. Echi pagótami ko ralirúami nili jenaʼí Wichimóbachi jonsa” (Apocalipsis 14:4, TNM). Echi Méchuli ko Jesús ju. Onorúami chapili echi 144.000 pagótami aʼlá nijéwami jiti pirélima ripá riwigachi, Jesús yúa. Echi ko nulama jenaʼí Wichimóbachi. Japalí ma suwisaa, echi ko ku ripá pirélima (Apocalipsis 5:10). Bachá siglo jonsa, Jeobá ko isili napabúa echi pagótami aʼlá nijéwami. Echi ko 144.000 ju japi nulama Jesús yúa.
10. ¿Chúsiá Jeobá chapili 144.000 pagótami jiti Jesús yúa nulama?
10 Jeobá ko risoa nili tamujé nitimaa, jiti la jáwili echi pagótami jiti si isélikami nima Jesús yúa. Jesús ko we aʼlá nuláami nima jiti machiyampa chu nilia rijowi echi pagótami. Echi ko a machili piri nokiká rijowi echi pagótami, ayénachó japalí we risoa nilia piré. Pablo ko jéanili japi Jesús risoa cho nili japalí ta risoa ikí. Jéanili japi Jesús “galá omero tamujé tamí natimaya máputa ketasi me jiwérami ju, mapujiti Binói ayénachó chati sitíi oláratami níili” (Hebreos 4:15; 5:8). 144.000 pagótami ayénachó machí jiti echi ayénachó ikí chati namuti japi ke kaníliti, jiti ayénachó nayuli. Jesús alí echi 144.000 pagótami, japi si nuláami nima, a machí japi ta risoa ikí.
¿PIRI ISIMA ECHI SILÍAMI JAPI ONORÚAMI WILALI?
11. ¿Chúsiá binérili Jesús echi apóstoles japi tánima Onorúami japi isima japi Binoy nakí ripá riwigachi?
11 Jesús ko binérili echi apóstoles japi tánima Onorúami japi isima japi Binoy nakí ripá riwigachi alí jenaʼí Wichimóbachi, ¿chúsiá? Ma ti binékirú capítulo 3 japi echi Satanás ke nijéwili Jeobá. Ke nijéwami nílachi, Jeobá ko a bijí riweli japi pirélima echi Satanás alí demonios echoná ripá riwigachi. Tasi ne suwaba japi ikí pireili echoná ripá nijéwami nili. Capítulo 10 che binepo piri nokáami nila Satanás alí echi demonios.
12. ¿Piri aní Apocalipsis 12:10 japi ikimea riweili?
12 Echi Biblia aní japalí ma Silíami nimia Jesús, japi bachá nikoma echi Satanás yúa (leeri Apocalipsis 12:7-10). Versículo 10 aní japi ikimea riweili: 1) Jesús alí echi isélikami japi Onorúami jáwili chotásili nulayá, 2) ayénachó aní japi Satanás ko machí pátami nili ripá riwigachi jonsa. Ata binéporé japi ma echi riká ikili.
13. ¿Chúriká piré ripá ma ke itéachi echi Satanás alí demonios?
13 Echi Biblia aní japi echi ángeles japi nijéwami ju, we kanili jiti ma machí pátami nili ripá riwigachi jonsa echi Satanás alí demonios. Echi Biblia aní: “Kanílisi japi timí ripá piréami ju” (Apocalipsis 12:12, TNM). Echi japi ripá piréami ju we kanili jiti sinéami ka napawika a nijewi Jeobá.
Japalí jenaʼí Wichimóbachi awátami nili echi Satanás alí demonios, echalí jona we risoa nilia rijowi echi pagótami. Pe aminana ma ke risoa nilia rijólima.
14. Japalí machí pátami nili echi Diablo ripá jona, ¿piri ikísimi jenaʼí Wichimóbachi?
14 Japi jenaʼí Wichimóbachi piré ko tasi kanilia piré, tasi japi riká ripá piréami ju. We risoa nilia piré sinéami pagótami “jiti echi Diablo we iyoka iyena”. Echi riká isimí “jiti teeli bi inama chati isiá” (Apocalipsis 12:12, TNM). Satanás ko we aparúami ju, jiti machí pátami nili ripá jonsa alí machí japi mukumea. We isimí jiti we risoa nilia pirélima echi pagótami.
15. ¿Chúriká nakiyé Onorúami japi pirélima echi pagótami jenaʼí Wichimóbachi?
15 Jeobá checho ku we baʼóami niwama echi kawí japi riká nili chabé. Jeobá ko nakí japi echi pagótami we kanílika pirélima sinibí jenaʼí Wichimóbachi we baʼóachi (Salmo 37:29). Echi Silíami japi Onorúami wilali echi riká isima. ¿Piri mi ko isima mayé?
16, 17. ¿Piri ka ti biné japi aní Daniel 2:44?
16 Daniel 2:44 jéaní: “Japalí jepuná isélikami a bijí piréachi, echi Onorúami ripá riwigachi bitéami wilama bilé silíami japi ke sineti miʼlirúami nima. Onorúami ke wilama jarecho isélikami. Echi silíami mojonama alí suwábima suwaba jepuná isélikami echalí rawé. Alí echi silíami japi Onorúami wilama sinibí bitélima”. ¿Piri ka ti biné japi aní echi Biblia?
17 Bachá: echi Silíami japi Onorúami wilali ma chotásima réachi nulayá ripá riwigachi “japalí jepuná isélikami a bijí piréachi”. A bijí nirúlima riweili nuláami jenaʼí Wichimoba, ripá ko ma nirúachi nuláami. Osá: echi Silíami ke sineti mukumea; Onorúami ke wilama jarecho isélikami. Bikiá: echi Silíami japi Onorúami wilali nakoma echi isélikami yúa japi jenaʼí Wichimóbachi nuláami ju. Echi Silíami nayúrima nakowa, echi bi nima japi nulama jenaʼí Wichimóbachi. Sinéami echi pagótami we aʼlá Silíami olama.
18. ¿Chu riwéami ju japalí nakoma echi isélikami alí echi Silíami japi Onorúami wilali?
18 ¿Piri ikiméalé japalí kecho nakówachi echi isélikami alí echi Silíami japi Onorúami wilali? Echi demonios ko ékima alí echi riká nokaká napabuma “ne suníami jenaʼí wichimóbachi nuláami oʼwéala silíami, [...] mapurigá ne siʼnéami ne wabé nakoma echalí ne jubá rawé”. Japi isélikami ju jenaʼí Wichimóbachi yúa nakoma echi japi Onorúami jáwili. Nalí echi Silíami japi Onorúami wilali nayúrima nakowa. Echalí rawé ko Armagedón ju (Apocalipsis 16:14, 16; iné jubá chukúami nota 10).
19, 20. ¿Chúsiá ta nakí japi ma nulama echi Silíami japi Onorúami wilali?
19 ¿Chúsiá ta ma nakí japi nulama echi Silíami japi Onorúami wilali? Jenaʼí mi inema bikiá namuti. 1) Jiti ta ke sinibí aʼlá sébali oláami ju, ata nayuka piré alí ata suwí. Nalí be, echi Biblia ko aní japalí ma nuláachi echi Silíami ata sinibí pirélipo. Echoná Juan 3:16, TNM, jéaní: “Onorúami ko wabé galeli echi pagótami. Jiti bela nijila ko binoy nolá, jiti ta ke suwiboa. Ata bichíwisakó a ti sinibí pirélipo”.
20 2) Jiti we chati nokáami rijowi, wiká pagótami ikaleka raʼíchami ju alí we chati namuti nokáami ju. Ke wesi omeri kariwea echi cha nokiwáami japi nirú jenaʼí Wichimóbachi. Jeobá ko a omérima suwabia jiti ke nirúlima echi chati nokáami. Echi japi cha nokáami ju suwábitami nima echoná Armagedón (leeri Salmo 37:10). * Alí, 3) echi isélikami japi jipi nulá cha nokáami ju alí ke nulá japi riká Onorúami, jiti bela risoa nilia piréako echi pagótami. Echi isélikami tasi kuʼírinali echi pagótami jiti machimea Onorúami jitra. Echi Biblia ko aní japi “echi pagótami risoa nili japalí echi rijoi silíami nisa” (Eclesiastés 8:9).
21. ¿Chu isima echi Silíami japi Onorúami wilali?
21 Ma simírisa Armagedón, echi Silíami japi Onorúami wilali we baʼóami niwama jenaʼí Wichimóbachi jiti we kanílika pirélima echi pagótami, japi riká nakili Onorúami ne chokichí jonsa. Ayénachó értami nima echi Satanás alí echi demonios (Apocalipsis 20:1-3). Echi riká ikisaa tasi wesi nayuma ni bilé wesi suwimea. Echi riká ikimea jiti Jesús mukúlampá. Japi a nijéwami ju ko Jeobá, we kanílika pirélima, we baʼóachi (Apocalipsis 22:1-3). Ma ke cha riká raʼichama echi pagótami Jeobá riwalá jitra. ¿Chu kabú nima? Japalí ma nuláachi echi Silíami japi Onorúami wilali jenaʼí Wichimóbachi. Sinéami japi echoná si pirélima we simá riká raʼichama Onorúami riwalá jitra (iné jubá chukúami nota 21).
¿CHU KABÚ CHOTÁSILI JESÚS NULAYÁ?
22. ¿Chúriká ti machí japi Jesús buweli jiti Silíami nima?
22 Jesús ko binérili echi pagótami japi yúa éenili japi jériká anema Onorúami: “Wilá bilé Silíami jiti nulama jenaʼí”. Echi ko anili japi pe aminana nulama echi Silíami. Jeobá bachá jawama riweili echi Jesús alí japi echi yúa nulama ripá riwigachi. ¿Acha sapú Silíami niraa wilaari Jesús japalí ku owínili ma ripá ku simisaa? Ke. Bilé profecía echoná Salmo 110:1 anili japi Jesús ko buwema. Pe aminana, Pedro alí Pablo osali japi echi riká ikimea: “Asagá jenaʼí keni watonachi, mapuyénasí Nijeni suwaba omérama ne siʼnéami echi jaré mapu ikí mi asayera” (Hechos 2:32-35; Hebreos 10:12, 13). ¿Chu kilipi buweli Jesús jiti Jeobá Silíami wilama?
Echi Silíami japi Jeobá wilali ayénachó ma nulama jenaʼí Wichimóbachi.
23. a) ¿Piri bamíali chotásili Jesús nulayá? b) Biléala capítulo, ¿piri binepo?
23 Kecho sébachi bamíali 1914, echi Biblia binéami ko ma machiyé japi 1914 jona ikísima riweili japi anili echi Biblia. Ma cha ikíachi omáana Wichimóbachi. A ne bichíwali echi riká ikili: 1914 jonsa chotásili Jesús nulayá (Salmo 110:2). Echalí jonsa jenaʼí Wichimóbachi pátami nili echi Satanás. Echi ko “machí japi teeli bi” iyénama jenaʼí Wichimóbachi (Apocalipsis 12:12, TNM). Jiti bela, echi Biblia ko aní japi ta ma “ne jubá rawé” piré, ¿chúriká ti machí? Che biléala capítulo che binepo. Ayénachó inepo japi ma mulipi nima japalí nulama echi Silíami japi Onorúami wilali alí japi ne echi riká isima japi Onorúami nakí (iné jubá chukúami nota 22).
^ parr. 2 Mateo 6:9, 10, TNM: “Emi jériká timí raʼichabo Onorúami yúa: ‘Tamujé Onolá japi mi ripá riwigachi atí, kiti riwé japi echi pagótami cha riká raʼichama mujé riwalá jitra. Wilá bilé Silíami jiti nulama jenaʼí. Isí japi mi binoy nakí jenaʼí Wichimóbachi, japi riká mi isimí ripá riwigachiʼ”.
^ parr. 20 Salmo 37:10: “Ma keʼayó, echi japi chati nokáami ju ko ma ke pirélima. Alí mujé ko ku aama alí tasi mi ku riwimea”.
