1, 2. ¿Jépuká ko a tamujé tibuma?

TO NATABO japi mi ubuchimi inari alí we chona wilí nolea. We niwía wilí alí we riʼóchini, miná ko ma we iʼwéami ukísimi. Mujé ko mi sapú amí kumi mi simea jiti mi ke sampama. Alí mi we kanili japalí ma riwisaa.

² Echi riká cho ju jipi, jiti aminabi we cha riká ikísimi. Ami machináliré: “¿Jépuká ko a tamujé tibuma?”. Echi Biblia ko aní: “Alí nijé ko jéanema Jeobá: ‘Mujé ju japi mi tamí tibuma alí japi tamí niyúbima, [...] ni mi bichiwi japi tamí iʼwírimaʼ” (Salmo 91:2). Jeobá tamó iʼwírima jiti ta anachabo japalí ta risoa nílisa jipi, alí tamó ané japi ta we simá rikáachi pirélipo pe aminánami.

3. ¿Piri nokiboa jiti Jeobá tamó iʼwírima?

³ ¿Chúriká isimí Jeobá tamó tibúa? Echi ko tamó iʼwiri jiti ta anachabo japalí ta risoa nili. Echi ko wabé omérami ju echi pagótami yúa japi tamó cha olánili. A tamó cha ikisaa jipi rawé, ata machí japi Jeobá pe aminánami isima jiti ta ku kanílika pirélipo. Echi Biblia aní piri ta nokiboa: “Sinibí galá bichíisi mapurigá Riosi echijiti galá omérama ʼyemi mi waminabi galée” (Judas 21). Jiti Jeobá tamó iʼwírima jiti ta anachabo japalí ta risoa nílisa, ata echi amígowala nísaré. ¿Piri nokiboa jiti echi amígowala nipo?

4, 5. ¿Chúriká ta machí japi Jeobá we tamó nakí?

⁴ Jiti ta Jeobá bi amígowala nílisipo, ata machisare japi echi ko we tamó nakí. Natá suwaba namuti japi tamó iyali Jeobá. Japi riká echi Wichimóbachi japi we baʼóami ju,  nirú wikanamti siwáami alí wikanamti animales. We raʼíami koʼwáami nirú, ayénachó baʼwí. Ayénachó Jeobá tamó ané echoná Bíbliachi chu riwéwami ju alí chu isíami ju. Nalí be Jeobá isili bilé namuti we natéami jiti newa isimí japi we tamó nakí, echi ko ju japi júali binoy Nolá Jesús jenaʼí Wichimóbachi jiti mukumea sinéami tamujé jitra (Juan 3:16, TNM). Jiti echi riká isili ata oméripo sinibí pirea jenaʼí Wichimóbachi pe aminánami.

⁵ Jeobá ko ma wilali echi Mesías silíami ka echoná ripá riwigachi. Japalí silíami nisa jenaʼí Wichimóbachi we simá riwélima alí ke wesi risoa nílima, sinéami sinibí kilí pirélima we kanílika (Salmo 37:29). Jeobá ayénachó newa isimí jiti we tamó nakí jiti tamujé bineri chúriká kilí pirélipo jipi. Ayénachó nakí japi ta echi yúa raʼichabo alí sinibí tamó ipuma. Echi riká ta machí japi Jeobá ko we nakí sinéami tamujé.

6. ¿Chúriká mi newa isimí japi mi matétara iyá Jeobá?

⁶ ¿Chúriká mi newa isimí japi mi matétara iyá Jeobá jiti we mi nakí? We natéami niraa iné suwaba namuti japi mi iyá. Nalí be nirú wiká pagótami japi ke matétara nijíami ju. Japalí Jesús biteili echi riká cho nili echi pagótami. Siné kaachi ko, Jesús saʼweli 10 pagótami cha nayúami, nalí pe bilepi bi matétara nijisa ku simili (Lucas 17:12-17). Tamujé ko nísaré japi riká isili echi rijoi japi a matétara nijíami nili alí sinibí rawé matétara iyabo Jeobá.

7. ¿Chúriká mi nakisare Jeobá?

⁷ Ayénachó newa isí japi we mi nakí Jeobá. Jesús ko aneli echi discípulos japi we nakimea Jeobá ne sulachí jonsa, japi nata, japi nili alí japi isimí (leeri Mateo 22:37, TNM). * ¿Chúsiá echi riká anili?

8, 9. ¿Chúriká mi newa isimí japi mi we nakí Jeobá?

 ⁸ ¿Chúsiá ke bi anisare japi ta nakí Jeobá? Japi a nakí ko Jeobá ne sulachí jonsa, japi nata alí japi nili, a isima suwaba namuti japi Jeobá nulá (Mateo 7:16-20). Echi Biblia ko aní ata ne bichíwali nakiyaka Onorúami ata nijéwisaré suwaba namuti japi echi nulá. ¿A jilí ju nijewa? Ke. Japi Jeobá nulá ke jilírami ju nijewa (leeri 1 Juan 5:3).

⁹ Japalí ta nijéwisa Jeobá ata machí chúriká kanilia pirélipa (Isaías 48:17, 18). Nalí, ¿piri ta nokiboa jiti echi amígowala nipo? Ma inepo.

10. ¿Chúsiá mi aminabi binésaré Jeobá jitra?

¹⁰ ¿Chúriká mi isili jiti mi Jeobá amígowala nima? Japalí mi bineli japi aní echi Biblia, ami machili chu isíami ju Jeobá alí mi aʼlá amigo ka nili echi yúa. Japi riká echi naʼí aminabi rajina wilimea ami ku roʼésaré jiti ke choʼimea, echi riká cho ju Jeobá amígowala niwa. Ke mi riwésaré binea jiti mi ke riwema echi amígowala niya (Proverbios 2:1-5).

11. ¿Chu mi nílima japalí mi binesa echi Biblia?

¹¹ Ami aminabi binésaká echi Biblia, ami machimea namuti japi we simá aní echoná alí ne sulachí jonsa mi moʼama. Inepo chu nili okuá discípulos japi Jesús binérili, japalí Jesús ruyeli chu aniwáami ka jaré profecías. Echi rijoi ko anili: “¿Kéchata ne bichíwali wabé simírami kaníili mapalí Binói tamujé tamí yuwa raʼíchaga inárali echoʼná buwichí, ayena cho mapalí Binói tamujé tamí raʼíchaga ruyeli mapurigá osirúami ju echoʼná Riosi Raʼíchala oselíwalachi?” (Lucas 24:32).

12, 13. a) ¿Piri ikiméalé japalí mi ma ke binesa Onorúami jitra? b) ¿Piri ta nokiboa jiti ta aminabi we nakiboa Jeobá?

¹² Japi Jesús binérili ne sulachí moʼali echi okuá rijoi japi  ipuli. Mujé ayénachó we mi kaníliré japalí mi chotásili binea echi Biblia. Echi riká mi machili Jeobá alí mi chotásili nakiyá echi. Jipi ko ke mi riwésaré nakiyá Onorúami (Mateo 24:12).

¹³ Jipi ko mi ma Onorúami amígowala ju, alí we iʼwera isísaré jiti mi ke riwema echi amígowala niya. Jiti bela ke mi riwésaré binea Jeobá jitra alí Jesús si. Ayénachó mi natásaré japi mi binésimi alí mi natásaré chúriká mi isima japi mi ma bineli (Juan 17:3). Japalí mi leeri echi Biblia natá: “¿Piri tamí bineri jepuná Jeobá jitra? ¿Chúsiá ni we nakisare Jeobá ne sulachí jonsa?” (1 Timoteo 4:15).

14. ¿Chúsiá we natéami ju raʼichawa Jeobá yúa?

¹⁴ Japalí mujé olá bilé amigo, ¿kechi mi we yúa raʼicha ni? Echi riká aminabi we aʼlá amigo nísimi. Echi riká cho ju Jeobá yúa, ata raʼíchika echi yúa sinibí rawé aminabi we nakiboa echi (leeri 1 Tesalonicenses 5:17). Raʼíchiwa  Onorúami yúa japi riká bilé chiliwéliami we natéami ju. Nalí tamujé raʼichásaré ne sulachí jonsa (Salmo 62:8). Ke echi bi aniboa japalí ta raʼicha Onorúami yúa, nalí raʼichabo japi ta nili. Ata aminabi binésaká echi Biblia alí ta raʼichasa Onorúami yúa ne sulachí jonsa, sinibí ti we nakiboa Jeobá.

15, 16. ¿Chúsiá we natéami ju japi mi nawisama?

¹⁵ Jiti ta Jeobá amígowala nílisipo ruyepo jarecho pagótami japi ta ma bineli. Japalí mi raʼicha jarecho Jeobá jitra ne wabé natéami ju (Lucas 1:74). Jesús nuleli japi echi riká nokimea echi japi a nijéwami ju. Jiti bela sinéami tamujé nawisásaré japi isima echi Silíami japi Onorúami wilali. ¿Ami ma echi riká isimí? (Mateo 24:14; 28:19, 20).

¹⁶ Echi apóstol Pablo ko we natéami niraa ineli bineria echi pagótami Onorúami jitra (2 Corintios 4:7). Raʼíchiwa Jeobá jitra jarecho pagótami ne wabé natéami niraa ju japi mi isimí. Japalí mi nawesa Onorúami jitra bilé nóchali ju japi mi iyá, alí Jeobá ko we kanili echi riká mi isíachi (Hebreos 6:10). Japalí mi bineria iyena jarecho pagótami ami iʼwiri jiti Jeobá amígowala nima alí aminabi cho mi Onorúami amígowala nima. Jiti mujé bineri echi pagótami Onorúami jitra, ami omérima sinibí bitea, ayénachó echi pagótami japi mi ipú (leeri 1 Timoteo 4:16). ¿Achi nirúiré bilecho nóchili japi mujé we kanilia nochama?

17. ¿Chúsiá we jiyáwika nawisásaré?

¹⁷ Ne wabé natéami niraa ju japi mi we sapú simea nawisasia. Echi Biblia ko aní: “Mapurigami galá nawisama echi Galabé Riosi Raʼíchala. Ne sinibí galá bichíiga nawesi” (2 Timoteo 4:2). Echi pagótami ko newalé ipúa japi isima echi Silíami japi Onorúami wilali. Ayénachó echi Biblia aní japi “ma mulipi nawama echi rawé japi Jeobá we  natéami niraa iné” alí ma mulipi nílisimi (Sofonías 1:14; Habacuc 2:3). Ma mulipi Jeobá suwábima echi cha nokáami, japi isimí echi Satanás. Kecho nawáachi echi rawé, ami ruyésaré echi pagótami japi Jeobá isima, jiti bela mi anésaré japi Jeobá nalí nijéwima.

18. ¿Chúsiá ta napawísaré?

¹⁸ Jeobá ko nakí japi simabo japoná napawíliwa binésia echi jitra. Echi Biblia aní: “Alí ne galá níima mapu tamujeta aʼnawita galá ʼnatasa, mapu churigata aʼnagupi nagúurabo mapurigata ibili niráa waminabi wabé galéami níibo, ayénachó mapurigata ibili niráa waminabi galabé oláami níibo. Alí ketasi galá níima máputa waminá ariwebo napawíi echi auché jaré bichíyami yuwa, ketasi mapurigá jaré ma ketasi napawí echi auché jaré yuwa. Chopi galá níima tamujeta aʼnagupi waminabi galá bichíiratasa. Jipi waminabi galá níima echirigá aʼnagupi bichíiratasa mapujítita galá machí mapu echi [...] rawéwala ma ne mulubé níilasimí” (Hebreos 10:24, 25). Ne jiwérika nokiboa simiba echoná napawíliwachi, jiti echoná sisaa we kanili anakupi niraa.

19. ¿Piri mi iʼwírima jiti mi galema echi hermanos?

¹⁹ Echoná napawíliwachi, mujé riwimea we aʼlá amigos. Echi mi iʼwírima jiti mi aminabi nóchima Jeobá. Ami machimea jarecho testigo Jeobá japi sinúrika raʼíchami ju alí sinúrika nátami, alí ayénachó japi iʼwérili noká nijewia Jeobá. Nalí japi riká mujé isini kaachi chati namuti isimí, echi ayénachó. Echi riká nísaká, ku wikawi japi noká (leeri Colosenses 3:13, TNM). * Nalí sinibí iné echi aʼláala namuti japi noká. Echi riká mi isísaká we mi  galema echi hermanos alí mi aminabi Jeobá amígowala nima.

20, 21. ¿Chúriká ta pirélipo pe aminánami?

²⁰ Jeobá ko nakí japi sinéami japi echi amígowala ju we kanílika pirélima. Echi Biblia aní japi pe aminánami we simá riwélima, ke ko japi riká ta piré jipi.

²¹ Pe aminánami ko we kanílika pirélipo sinibí, ke bi 70 bamíali pirélipo, 80 ma. Ata kanílika “sinibí pirélipo” jenaʼí Wichimóbachi japoná we simá riwélima, ma ke wesi nayuma, ke majá rijólipo alí we kaníliami nipo. Echi riká ju japi aní echi Biblia. Jeobá aní japi tamó iyama jepuná namuti, nalí be tamujé ko iʼwérika nokisare jipi jiti ta oméripo echoná pirea (1 Timoteo 6:12, 19, TNM).

22. a) ¿Piri mi isísaré jiti mi we kanílika bitélima pe aminana? b) ¿Chúsiá ta oméripa sinibí pirea?

²² ¿Piri ta nokisare jiti ta kanílika pirélipo pe aminana? “Ne wabé galabé olama” alí “ayénachó ne wabé níwami níima echi galabé oluwáwami ʼnalina” (1 Timoteo 6:18). Jiti bela we natéami ju japi ta binésimi echoná Bíbliachi echi riká nokiboa. Nalí be jiti ta sinibí pirélipa jenaʼí Wichimóbachi ke ju jiti tamujé aboi ne iʼwera nokali nijewia, nalí Jeobá ju japi aní japi ta pirélipo echoná Wichimóbachi we baʼóachi (Romanos 5:15, TNM). Jeobá ko iyama echi chiliwé japi a nijéwami ju.

23. ¿Chúsiá mi jipi isísaré japi riká Onorúami nakí?

²³ Mujé natá jepuná: “¿Achi ni nijewi Onorúami japi riká echi nakí?”. Ke echi riká nísakó iʼwérili isí nijewia japi riká Jeobá nakí. Japalí ta bichiwi Jeobá alí ta iʼwérili noká nijewia echi ko tamó iʼwírima. Jeobá ko tamó iʼwírima jiti ta anachaba jipi rawé echi namuti chati japi nirú. Alí pe aminana isima japi ta sinibí pirélipo echoná  Wichimóbachi we baʼóachi, jiti echi riká anili binoy. Ami isísaká suwaba namuti japi riká Jeobá nakí, ami omérima sinibí bitea echoná Wichimóbachi japoná we simá riwélima.