1. Ma binesa na libro, ¿piri mi nárika isima?

NA LIBRO, mujé ma bineli wiká namuti japi aní echi Biblia, japi riká Onorúami ko isima jiti ta sinibí pirélipo, chu ikí japalí bilé mukusaa, alí japi checho ku pirélima japi ma suwili (Eclesiastés 9:5; Lucas 23:43, TNM; Juan 5:28, 29, TNM; Apocalipsis 21:3, 4). Ama mi simiyéeré japoná napawí echi testigo Jeobá alí mi ma mayé japi echi ko ne bichíwali bineri japi Onorúami aní (Juan 13:35). Ayénachó ma mi aminabi amigo nílimiré Jeobá yúa alí ma nijéwinali echi. Alí mi nárika  isíeré: “¿Piri ni aminá isima jiti ni aminabi nóchilima Jeobá?”.

2. ¿Chúsiá pakónili bilé rijoi Etiopía bitéami?

² Bachá siglo bilé rijoi Etiopía bitéami echi riká cho anili. Japalí Jesús ku wilásitami nili, bilé discípulo Felipe riwéami, binérili echi rijoi alí ruyeli japi Jesús nili echi Mesías. Echi rijoi etíope we galeli japi bineli, jiti bela anili: “Nibira, jenaʼí walú baʼwé ¿Kecha galá níima mapurigá nijé baʼwí jiti [pakótami] níisa?” (Hechos 8:26-36).

3. a) ¿Piri aneli Jesús echi discípulos? b) ¿Chúriká pakóliwa japi a nijéwinali ko Jeobá?

³ Echi Biblia ko mi ané japi mi a nijéwinalaká Jeobá, ami pakósaré. Jesús ko aneli echi discípulos: “Echijiti ku simíbaga ʼyemi, galá bichíiraga binérasi ne siʼnéami echi jaré pagótami, ne suníami jenaʼí wichimóbachi piréami. Aʼlí mapalí aboni galá bichíiko, echalítamo ne siʼnéami pagopo” (Mateo 28:19). Alí Jesús echi riká cho isili, pakoa. Ke bi roʼweri baʼwí echoná moʼoli, nalí suwaba nutúwili echoná baʼwírali (Mateo 3:16). Jipi ayénachó, japalí bilé pakó, suwaba nutúwila echoná baʼwírali.

4. ¿Chúsiá pakóliwa?

⁴ Japalí bilé pakola ko ju néwariwélitia japi Onorúami amígowala nínali alí sinibí nijéwima (Salmo 40:7, 8). Jiti bela mi nárika isíeré: “¿Piri ka ni isísaré jiti ni pakoma?”.

5. a) ¿Piri mi isísaré kecho pakomia? b) ¿Chúsiá we natéami ju japi mi simea echoná napawíliwachi?

⁵ Ke mi cho pakomia mujé ko ma machisare Jeobá  alí Jesús si. Ma mi echi riká isimí jiti mi ma biné echi Biblia (leeri Juan 17:3). Nalí be mi isísaré jaré namuti. Echi Biblia ko aní japi mujé “ne galá machíami” nísaré japi aní Onorúami (Colosenses 1:9). Japalí mi napawí japoná biné echi testigo Jeobá, aminabi mi Jeobá amígowala nima. Jiti la we natéami ju japi mi sinibí simea napawíliwachi (Hebreos 10:24, 25, TNM).

6. ¿Achi mi we machisare suwaba namuti japi aní echi Biblia jiti mi pakoma?

⁶ A bichíwali ju japi Jeobá ko ke buwé japi mujé machimea suwaba japi aní echi Biblia jiti mi omérima pakoa, nalí ke siné sunibo binea Jeobá jitra (Eclesiastés 3:11). Echi rijoi etíope ke cho suwaba machili japalí pakoli (Hechos 8:30, 31). Jiti mi omérima pakoa, ami machisare jaré namuti ne bichíwali japi aní echi Biblia japi we natéami ju (Hebreos 5:12).

7. ¿Chúriká mi kuʼiro japi mi biné echoná Bíbliachi?

⁷ Echi Biblia ko ruyé: “Ketasi chirigá omero olayá mapurigá Riosi nakí, mapalí aboni ketasi bichíi Riosi” (Hebreos 11:6). Jiti mi pakoma we natéami ju japi mi bichíwima Onorúami. Echi Biblia ayénachó aní japi jaré pagótami ciudad Corinto piréami, we aʼlá ipuli japi binérili echi discípulos alí “ne galá bichíili; ayénachó aboni baʼwí jiti [pakótami] níili” (Hechos 18:8). Echi riká cho ju, japalí mi bineli echi Biblia mi kuʼiro jiti mi aminabi we bichíwisima japi Onorúami isima japi riká anili, alí ayénachó echi Jesús mukúala jitra ata niyúbitami ju jiti ma ke cha nokiboa alí jiti ma ke suwiboa (Josué 23:14; Hechos 4:12; 2 Timoteo 3:16, 17).

8. ¿Chúsiá mi ruyénilima si jarecho japi mi ma bineli?

⁸ We mi aʼlá bichíwiami nima japalí mi aminabi binesa japi aní echi Biblia alí mi inema japi mi a iʼwiri jiti mi kaníliami nima. Jiti la ami ruyénilima si jarecho japi mi ma bineli (Jeremías 20:9; 2 Corintios 4:13). ¿Jepi mi ruyema?

9, 10. a) ¿Jépuká yúa mi raʼichama japi mi ma bineli? b) ¿Piri mi isísaré ami si simináliaká nawesasia echi hermanos yúa?

⁹ Ami raʼichámiré japi mi ma bineli mujé téemala yúa, amigos, japi mulipi piré japoná mujé bité, japi mi yúa simí escuélachi o japi mi yúa simí nochasia. We aʼlá ju echi riká ko. Nalí echi riká isí we simá aniká alí riwiika. Aminá ko ami omérima cho simiyá nawesasia echi hermanos yúa. Ma mi si simináliaká, ruyé japi mi bineri japi mi ma simínali nawesasia echi hermanos yúa echoná congregación. Echi japi mi bineri ma machiyá ko japi mi ma aʼlá isimí japi aní echi Biblia, mujé alí japi mi bineri si raʼichama okuá ancianos yúa echoná congregación.

¹⁰ Ma mi napawísaká echi ancianos, echi ko raʼichama mi yúa acha mi aʼlá machiyá japi aní echi Biblia, alí acha mi isiá japi aní echi Biblia. Echi ko machinali acha mi testigo Jeobá nínala. Newalá japi echi ancianos ju japi tibú sinéami japi si echoná congregación, alí mujé si nima. Kiti majásaré raʼicha echi ancianos yúa, echi mi iʼwírima (Hechos 20:28; 1 Pedro 5:2, 3). Japalí ma napawísakó echi anciano mi anema acha mi si omérima simiyá nawesasia echi hermanos yúa echoná congregación.

11. ¿Chúsiá we natéami ju japi mi riwema isiá chati namuti kecho simiyá nawesasia echi hermanos yúa?

 ¹¹ Echi ancianos mi anémiré japi mi riwema isiá jaré namuti kecho simiyá nawesasia echi hermanos yúa echoná congregación. ¿Chúsiá we natéami ju japi mi riwema isiá chati namuti? Jiti Jeobá tamujé júali nawesasia, jiti bela ta ke cha nokáami nísaré (1 Corintios 6:9, 10, TNM; Gálatas 5:19-21, TNM).

12. ¿Chúsiá ta sinéami wikáwili tánisaré Jeobá?

¹² Jenaʼí mi machimea jarecho namuti japi mi isísaré kecho pakomia. Echi apóstol Pedro anili: “Sinú galabé niráa ʼnátaga ku roʼwisi [...] mapurigá ʼyémitamo ku wikáwarami níibo mapurigátamo chati olali” (Hechos 3:19). Echi ko ju japi ta we aʼmona nílisaré jiti ta chati namuti nokáami nili chabé. ¿Ami cha isili japi riká echi japi napawika ochí kecho niwisa, pecados sexuales aniwá? We mi aʼmona nílisaré alí ma ke echi riká isísaré. ¿Alí ami sinibí iʼwérali isimí aʼlá chopi namuti isiá? Ariká mi aʼmona nílisaré, jiti ke wesi ne sébali aʼlá nokáami ju. Jiti bela wikáwili tánisaré Jeobá (Romanos 3:23; 5:12).

13. ¿Piri aniwáami ju “ku roʼwisi”?

¹³ ¿Ata aʼmona bi nílipo japi ta nokali? Ke. Echi apóstol Pedro ko anili: “Ku roʼwisi”. Echi ko aniwáami ju japi ma ke che chati namuti nokiyá pirélipo, alí iʼwérika isí aʼláala isiá. To natabo japi mi biléanamí simí japomí ke mi machí. Ma wiliká ko mi machí japi bileánachó simili japoná ke mi simináliyé. ¿Piri mi isima? ¿Kechi ko mi ku roʼwímani? Echi riká cho ju mi binesa echi Biblia, ami machíliré japi mi riwésaré jaré  namuti chati japi mi isíami nili chabé alí jipi ko mi aʼlá chopi isísaré.

14. ¿Piri mi isísaré kecho pakomia?

¹⁴ Kecho mi pakomia bilecho namuti we natéami mi isísaré: ami katúwika raʼichama Onorúami yúa; jiti we natéami niraa iné sinibí echi bi nijewia. Echi ko aniwáami ju japi mujé raʼichama Onorúami yúa, jéaneka japi we natéami ju sinibí nijewia pe echi bi alí japi mujé nakí ko ke me (Deuteronomio 6:15).

15, 16. ¿Piri isimí bilé japi a katúwika raʼicha Onorúami yúa?

¹⁵ Japalí ta ané Jeobá japi ta echi bi nijéwipo, echi ko ju japi riká ko mi anea bilé japi mi we galé japi mi echi yúa biténili sinibí. Natá japi jari novios ka. Japalí echi rijoi aminabi we machísimi echi japi korula, we nakí alí echi yúa niwínili. Jepuná ko we natéami ju, nalí echi ko a echi riká isínili jiti we nakí echi tiwé.

¹⁶ Japalí mi aminabi machí Jeobá, we mi nakí echi alí che mi aminabi nochánili japi echi mi nulé. Echi riká mi isísaká ami katúwika raʼichama Onorúami yúa. Jesús ko aneli echi discípulos: “A jaré ʼyemi olánalasagá mapurigá Nijé nakí, ketasi waminabi olasi mapurigá ʼyemi aboni chopi nakí” (Marcos 8:34). Echi ko aniwáami ju japi we natéami niraa inema nijewia Jeobá alí japi mujé isínali ko ke me natéami nima (leeri 1 Pedro 4:2).

17. ¿Chúsiá jaré pagótami ke katúwika raʼicha Jeobá yúa?

¹⁷ Jaré pagótami ke tasi katúwika noká Onorúami yúa jiti majá nili ke isisa japi riká aní echi. Jarecho ko  mayé japi ke katúwika isisa Onorúami yúa ke iyoma echi yúa japalí chati isisa.

18. ¿Piri mi iʼwírima jiti mi nijéwima Jeobá?

¹⁸ Japalí mi we nakí Jeobá echi ko mi iʼwírima jiti mi ke majama. Ayénachó mi iʼwírima jiti mi isima japi riká mi katúwika aneli (Eclesiastés 5:4; Colosenses 1:10, TNM). Alí ke mi jilí niraa iné echi riká isiá japi riká Jeobá nulá. Echi apóstol Juan anili: “Mapujiti mapuyíripi pagótami galá galeko Riosi, abóniko ayénachó galá nijéwaga olá mapurigá Riosi nulá. Alí ketasi wabé nóchali ju echirigá nijéwaga oluwawa” (1 Juan 5:3).

19. ¿Chúsiá mi ke majásaré katúwika raʼichamia Jeobá yúa?

¹⁹ Tasi ta ne suwaba aʼlá nokáami nísaré ata yúa katúwiniliaká Jeobá. Echi ko tasi mi nulema japi mi we jilí nóchali nochama japi mi ke omérima (Salmo 103:14). Ayénachó Jeobá mi iʼwírima jiti mi aʼlá isima (Isaías 41:10). Echi Biblia aní: “Echi binoy isima jiti mi we aʼlá wachía isima”. Jiti bela bichiwi Jeobá ne sulachí jonsa (Proverbios 3:5, 6).

20. ¿Piri mi isima ma mi katúwika raʼichásaká Jeobá yúa?

²⁰ ¿Achi mi mayé japi mi ma katúwika raʼichama Jeobá yúa? Ma mi echi riká isísaká jipi ko mi ma omérima pakoa.

21, 22. ¿Piri mi isima jiti jarecho machimea japi mi Jeobá bi nijéwinali?

²¹ Japi coordinador ju echoná congregación japomí mi simí, echi ju japi mi ruyema japi mi ma katúwika raʼíchili Jeobá yúa alí japi mi ma pakónili. Echi coordinador ju japi anema jaré ancianos japi mi yúa checho ku inema jaré namuti japi aní echi Biblia. Echi  hermanos ko ma machisáaká japi mi ma omeri pakoa, echi ko mi anema japi mi ma pakoma japalí asamblea nirúlisa japi olá echi testigo Jeobá. Echoná asamblea japi ma pakoma ipuma bilé nawésali we natéami japoná ruyema chúsiá pakowa. Echi hermano japi nawisama animea okuá preguntas echi japi pakómaré. Mujé nima japi mi animea japi mi nárili, echi  riká machimea jarecho japi mi a bichíwiami ju Jeobá alí japi echi bi mi nijéwima (Romanos 10:10).

²² Alí mi mujé ko ma pakoma. Suwaba ripokala mi nutuwima baʼwechi pe teeli bi. Echi riká machimea jarecho japi mi katúwili Jeobá yúa alí echalí jonsa ko ma mi testigo Jeobá ju.

23. ¿Chu aniwáami ju pakowa echi Onorúami rewalá jiti, echi Onorúami Nolá alí echi espíritu santo jiti?

²³ Jesús ko anili japi echi discípulos pakoma “Onorúami rewalá jiti, echi Onorúami Nolá alí echi espíritu santo jiti” (Mateo 28:19, TNM). ¿Chu aniwáami ju na raʼíchali? Japi ta machí japi Jeobá ju japi nulá, ayénachó japi isili Jesús alí japi isima pe aminánami alí japi chúriká nee Jeobá echi espíritu santo jiti echi riká isima japi binoy nakí (Salmo 83:18; Mateo 28:18; Gálatas 5:22, 23; 2 Pedro 1:21).

24, 25. a) ¿Chu aniwáami ju japalí bilé pakosa? b) ¿Piri ka ti binepo biléala capítulo?

²⁴ We natéami ju japi mi pakoma. Japalí mi suwaba ripokala nutuwí baʼwechi, echi ko ju japi riká ko ma mukuyá, alí echalí jonsa ma mi riwé isiá chati namuti japi mi isíami ke chabé, alí japalí mi machiina baʼwechi jonsa echi ko aniwáami ju japi ma mi chotásimi isiá japi riká Jeobá nakí. Echi riká mujé ko néwariwéliti japi Jeobá bi mi nijéwima. Newalá japi mi ke nijéwima bilé rijoi o jaré pagótami, nalí japi mi Jeobá bi nijéwima.

²⁵ Japalí mi katúwika raʼichi Jeobá yúa ami aminabi amigo nima echi yúa (Salmo 25:14). Nalí japalí mi pakosa ko echi ko ke ju japi mi ma sinibí bitélima. Nalí echi apóstol Pablo osali: “Nijéwisi japi riká ti mi a niyúbitami” nipo (Filipenses 2:12, TNM). Japalí mi pakosa echi ko ju japi mi kulí chotásimi nijewia Jeobá. ¿Piri mi isima jiti mi aminabi Jeobá amígowala nima? Biléala capítulo mi binema echi respuesta.