1. ¿Jépuká tamujé iwítili?

JEOBÁ “sinibí niraa bitéami ju” (Jeremías 10:10). Jeobá tamujé niwali echi isili tamujé iwitia jiti bela ta pirea ko. Echoná Biblia aní: “Mujemi niwáli ne suwaba namuti. Ayénachó Mujemi abijí oméligá olá mapurigá suwaba namuti abijí nirúlasama. Aʼlí kiʼyá chokichí ne suwaba namuti niwárami níili mapujiti Mujemi nakili echirigá niwánala” (Apocalipsis 4:11). Ata piré jiti Jeobá echi riká nakili. Jiti bela we natéami ju (leeri Hechos 17:24, 25).

2. ¿Piri ta nokiboa ata kanilia pirénalaká?

² Jeobá ko nijili sébali namuti japi ta newalé japi riká ta pirélipa, echi ko nijí koʼwáami alí baʼwí (Hechos 17:28). Echi ko nakí japi ta we kanílika pirélipa (Hechos 14:15-17). Ata nijéwisaká Onorúami, aʼlá kanílika pirélipa (Isaías 48:17, 18).

3. ¿Piri isili Jeobá japalí Caín miʼali Abel?

³ Echoná Biblia aní japi Jeobá we natéami niraa ineni sinéami echi pagótami. Ma ineba chu isila Caín riwéami, echi bacháwala Adán alí Eva ranala. Caín ko we iyoli binoy bonilá yúa Abel. Jiti bela Jeobá ko aneli Caín japi ke iyóami nima. Nalí ke námili raʼámisiwa. Jiti we iyóami nili sayérili binoy bonilá Abel alí miʼali (Génesis 4:3-8). Jeobá ko castigo iyali Caín jiti miʼali echi Abel (Génesis 4:9-13). Jenaʼí ta biné japi ke aʼlá ju we aparúami niwa, jiti ta echi  iyiri nísaká we ti cho chati nípalé. Japi echi isíami ju ko ke bitélima echoná Wichimóbachi baʼóachi (leeri 1 Juan 3:15). Jiti ta nijéwiami nipo Jeobá, ke tasi ta kichísaré echi pagótami (1 Juan 3:11, 12).

4. ¿Piri ka ta biné echi Ley jitra japi Jeobá iyali Moisés?

⁴ Ma wiká bamíali simírisa, Jeobá ko iyali Moisés echi Makoy Leyes. Echoná Ley ko oserúami nili: “Ke mi miʼásaré” (Deuteronomio 5:17). Echi pagótami japi miʼá bilecho, echi ko miʼárami nili. Echi Ley leérika ata biné japi Jeobá ko we natéami niraa iné jiti ta piré.

5. ¿Piri ka nata Jeobá japalí bilé mukí echi taa miʼlinálisa?

⁵ ¿Piri ka nata Jeobá japalí bilé mukí echi taa miʼlinálisa? Jeobá ko we natéami niraa iné echi kuuchi japi bijí ropálachi muchuwi. Echi Ley japi iyari echi israelitas echoná aneli: bilé okótisaká bilé mukí ropéami alí echi ranala ko mukusaa, japi echi isili echi ko mukusaa riweili (leeri Éxodo 21:22, 23; * Salmo 127:3). Jenaʼí ko aní japi Jeobá ke nakí japi echi mukí miʼlimea echi taa (iné jubá chukúami nota 28).

6, 7. ¿Piri ka mi isima jiti mi we natéami niraa japi Onorúami isili mi iwitia?

⁶ ¿Piri ka mi isima jiti mi we natéami niraa japi Onorúami isili mi iwitia? Ke mi isísaré namuti japi chati ju jiti mi ke chati ikimea, jiti mi ke cho cha olama jarecho pagótami. Jiti bela ke mi pewásaré péwili, drogas, marihuana alí jarecho si namuti japi ke tasi aʼlá ju, jiti mi echi riká isísaká pewia ami nayuka mukuméeré.

⁷ Jiti Onorúami isili tamó iwitia alí jiti echi tamó  niwali, ata nokisare japi echi nakí. Jiti bela ata aʼlá pirélisaré. Ke ti echi riká nokisáaká, Onorúami ke tasi kanílima (Romanos 6:19; 12:1; 2 Corintios 7:1). Tasi ta oméripa nijewia Onorúami ke ti tibúsaká tamujé ripokala, jiti Onorúami tamó niwali. A bichíwali ju japi we jilí ju riwelia echi namuti chati japi ta nokayé chabé japi riká pewia alí jarecho si namuti. Nalí be Jeobá tamó kuʼírima ata riwésaká nokayá echi namuti.

8. ¿Chúriká ta aʼlá tibuka nokiboa?

⁸ Ma ta bineli japi Jeobá tamó niwali, jiti bela Jeobá ko nakí jiti ta aʼlá tibuka nokiboa alí ayénachó tibupa jarecho pagótami japalí ta melasa bilé troca. Ata kilí melásaré bilé troca, moto, jarecho si ma. Ke cho riʼepo deportes japi ke aʼlá ju jiti mi ke karú ikimea; ke cho nokiboa japi riká echi pagótami japi nakoa riʼé (Salmo 11:5). Ayénachó ata aʼlá atewásaré echi kalí japoná ta piré jiti ke karú ikimea jarecho. Jeobá ko aneli echi israelitas chabé piréami: “Ami niwásaká bilé kalí, niwá bilé taa tikora echoná ripá kalírili. Echi riká mi isísaká alí bilé wichisaa echoná mujé kalírili, ke mujé iyiri nima echi riká ikisaa ko” (Deuteronomio 22:8).

9. ¿Chúriká nakí Jeobá japi ta nokiboa echi animales yúa?

⁹ Ayénachó Jeobá ko we natéami niraa iné echi animales, echi ko nakí japi ta ke cha olabo. Jeobá ko a riwé japi ta miʼabo jiti ta kopoa, ayénachó japalí aparúami nisa alí tamó cha olasa ata omero miʼayá (Génesis 3:21; 9:3; Éxodo 21:28). Ke tasi ta risoa olásaré echi animales, ke miʼabo pe chuwé jitra alí kecho riʼeka nakóripo (Proverbios 12:10).

10. ¿Chúsiá we natéami ju echi la?

¹⁰ Echi la we natéami ju, echi ineka ta machí japi Jeobá tamujé iwítili jiti bela ta piréako jenaʼí. Jeobá ko jéaneli  Caín: “Mujé bonilá lalá japi rulili, echi la japi riká ko tamí jéanea tamí nimiki” (Génesis 4:10). Jeobá ko echi riká aneli Caín jiti echi ko miʼali Abel, jiti bela Jeobá ko castigo iyali. Japalí Noé biteili, Jeobá ko ruyeli japi echi la we natéami ju, jiti echi la ineka ata machí japi Jeobá tamujé iwítili. Jeobá riweli japi Noé alí echi kúchuwala miʼaká koʼmea echi animales, jéaneli: “A ti mi kopoa suwaba namuti sapala japi ti mi konali, japi riká ni mi iyali japi rakéami ju jiti ti mi kopoa”. Nalí be Jeobá ko aneli: “Ke tasi ti mi kopoa echi namuti lalá, jiti echi la jitra piré, pe echi sapá bi” (Génesis 1:29; 9:3, 4).

11. ¿Piri nuleli Jeobá echi israelitas?

¹¹ Jeobá nulali Noé japi ke koʼmea echi la, 800 bamíali simírili japalí Jeobá ayénachó echi riká aneli echi israelitas: “Chuwé rijoi Israel bitéami o bilecho rijoi japi nawali biléanachó pueblo, sirúsaká bilé namuti aparúami o bilé chulukí ma, japi koʼwáami ju, echi ko ruʼlúwika echi la sateti pólima”. Ayénachó aneli: “Kiti kosí echi la ko” (Levítico 17:13, 14). Jeobá ko nakiyé japi echi israelitas we natéami niraa inema echi la, jiti bela echi ko a nakili japi koʼmea sapá, echi la ko ke. Japalí miʼasa bilé namuti echi ko ruluwasa riké echi la.

12. Japi nijéwami ju, ¿chúriká iné echi la?

¹² Japalí Jesús mukuli jaré bamíali simírili, echi apóstoles alí echi ancianos si echoná congregación echomí Jerusalén, napawili jiti machimea chu yiri echi Ley japi Moisés aneli echi israelitas, a bijí nijéwima echi japi Cristo bichíyami nili (leeri Hechos 15:28, 29; 21:25). Jeobá ko ruyeli jiti machimea japi binoy ko we natéami niraa iné echi la, ayénachó echi japi nijéwami nili we natéami niraa ineli echi la. Bachá siglo echi pagótami japi nijéwami nili ke koʼali echi la, ke cho bajili. Ke cho koʼali echi sapá japi léami  nili. A koʼsáaká echi la we chati nili, japi riká ko jarecho dioses nijewia o isena ma yúa boʼiyá. Jiti bela jipi rawé echi japi Jeobá nijéwiami ju ke tasi koʼá echi la, ke cho bají. Jeobá ko a bijí nakí japi ta we natéami niraa inepa echi la.

13. ¿Chúsiá echi japi nijéwami ju ke tasi soka roʼé echi la japalí nayusa?

¹³ Echi japi nijéwami ju, ¿achi soka roʼema echi la japalí nayusa? Ke tasi. Jeobá ko aní japi ta ke kopoa echi la, ke cho bajibo. Natá jepuná: echi doctor ke mi nakíwisa japi mi bajima echi alcohol, ¿ami soka roʼema echi alcohol? Ke tasi. Echi riká cho ju japi Onorúami nulá japi ta ke kopoa echi la, ke cho bajibo, ayénachó japi ta ke soka roʼebo echi la japalí ta nayusa (iné jubá chukúami nota 29).

14, 15. ¿Piri namuti ta ke nokiboa alí chúsiá?

¹⁴ ¿Piri mi isima bilé doctor mi anesa japi mi mukumea ke mi la jitra sósaká? Ibili niraa ta machiboa piri ta nokiboa, achi ta nijéwinila japi nulá Onorúami echi la jitra. Japi Jeobá nijewi we natéami niraa iné jiti Onorúami tamó niwali. Jiti la, aa jarecho ówami jiti ke mukumea, nalí ke soka roʼé echi la japalí nayusa.

¹⁵ Ata we aʼlá tibuka noká jiti ta ke nayupo. Onorúami ko aní japi we natéami ju echi la, jiti bela ti ke sóako la jitra japalí ta nayusa. Ke ti riwénili nijewia Jeobá tákoré jilí ke isini kaachi. Jesús ko anili: “Mapujiti mapuyíripi chopi nakisáagá mapu binói wabé kanílaga bitélama [...] chopi miná mukumea. Aʼlí mapuyíripi chopi nakisáagá olánala mapurigá Nijeni nakí mapu binói olama, échiko ne sinibí niráa bitélama” (Mateo 16:25). Ata nijéwinili Jeobá jiti ta we galé. Ayénachó echi ko a machí chúriká ta we kanílika pirélipa. Jiti bela ta we natéami niraa iné echi la jiti Onorúami tamó niwali (Hebreos 11:6).

16. ¿Chúsiá ta nijewi Onorúami?

¹⁶ Echi japi a bichíwiami ju we natéami niraa nijewia  japi aní Onorúami echi la jitra. Jiti bela tasi ta koʼá echi la, ke cho ta bají, tasi ta soka roʼé echi la japalí ta nayusa. * Nalí ata naré jarecho ówami, jiti ta ke mukunali. Onorúami tamó niwali alí echi la si, jiti bela Jeobá ko a machí chúriká ta we aʼlá pirélipa. ¿Ami echi riká cho nata?

17. Japi riká Jeobá anili, ¿chu olíali nili echi la?

¹⁷ Echi Ley japi Moisés olali, echoná ko Jeobá jéaneli echi israelitas: “Echi la jitra piréako sinéami alí ani mi iyali echi la jiti tamí ruluwama echoná altar, jiti ti mi echi riká nokaká ku wikáwitami nipo chati nokisaa” (Levítico 17:11). Echi israelitas japi chabé piréami nili, cha nokisáakó toyé bilé animal echomí témplochi jiti echi sacerdote miʼama, japi riká makawi, becerro alí boʼwaka, jiti roʼema echi namuti lalá echoná altar jiti ku wikawárami nima chati nokisaa. Echi riká bi néeli echi la echi israelitas.

18. ¿Chúsiá we natéami niraa inésaré japi isili Jesús?

¹⁸ Japalí Jesús bitéili jenaʼí Wichimóbachi, echi ko mukuli alí nijili binoy lalá jiti tamujé wikawárami nipo japalí ta chati nokisaa. Jiti bela ma ti ke che miʼá echi namuti japi riká nili chabé, japi riká anili echi Ley (Mateo 20:28; Hebreos 10:1). Japi isili Jesús we natéami nili. Jeobá júali Jesús jiti mukumea tamujé jiti, echi riká Jeobá ko isili japi sinibí pirélima echi pagótami japi a bichiwi ko (Juan 3:16, TNM; Hebreos 9:11, 12; 1 Pedro 1:18, 19).

19. Japi riká isili Pablo, ¿piri ta nokisare?

¹⁹ Ata matétara iyá Jeobá jiti echi isili tamó iwitia. Jiti  bela ta we galé echi pagótami ayénachó ta nakí japi sinibí pirélima. Jiti bela ata ne jiwérika noká simiba binérisia, jiti a nijéwisaká japi aní Jesús sinibí pirélima (Ezequiel 3:17-21). Jiti ta aniboa japi riká echi apóstol Pablo: “Nijeni ʼyemi mi ne bichíwaga ané mapu Riosi ketasi tamí wiʼnijima a bilé ʼyemi ketasi galá bichíisagá Riosi Raʼíchala. Mapujiti nijeni sinibí ʼyemi mi nawésaga ruyeli ne suwaba mapurigá Riosi nakí máputamo olabo. Sinibini suwaba galá nawésali Riosi Raʼíchala” (Hechos 20:26, 27). Ata we natéami niraa iné jiti Onorúami tamujé iwítili, jiti bela ata raʼicha Jeobá jitra japi echi ko we natéami niraa iné japi ta piré.