1, 2. ¿Chu riwéami nili japi Jeobá amígowala nili?

¿JEPI mi kanílisa nili japi mujé amígowala nima? Japi we simá aníami ju, japi we simá isíami ju, japi we kanili mi yúa.

² Jeobá ko olali jaré amigos. Bilé echi ko nili, Abrahán riwéami, echi ko Jeobá amígowala nili (Isaías 41:8; Santiago 2:23). Bilé silíami David riwéami ayénachó Jeobá amígowala nili. Jeobá ko we galeli David jiti we simá isíami nili (Hechos 13:22). Jeobá ayénachó we aʼlá amigo nili echi profeta Daniel yúa, jéaneli “we ni mi galé” alí mi we natéami ju (Daniel 9:23).

3. ¿Chúsiá Jeobá amígowala nili Abrahán, David alí Daniel?

³ ¿Chúsiá Jeobá amígowala nili Abrahán, David alí Daniel? Jeobá ko jéaneli Abrahán: “Jiti mi tamí nijéwili” (Génesis 22:18). Jeobá ko we galé japi a nijéwami ju ko, tasi galé japi niráami ju ko. Sinéami echi pagótami a omeri Jeobá amígowala niya. Echi ko jéaneli echi pagótami Israel piréami: “Ami tamí nijéwisaká japi ni mi ané; nijé ko mulipi mi yúa inama, alí ni mi tibuma, jiti ti mi nijé puéblowala nima” (Jeremías 7:23). Ami ne bichíwali Jeobá amígowala nínalaká ami nijéwisaré.

4, 5. ¿Chu nili echi Jeobá amígowala?

⁴ Echi Biblia aní japi Jeobá ko aami “japi ikí ne sulachí jonsa nijéwami ju” (2 Crónicas 16:9). Echoná Salmo 32:8 aní japi Jeobá ko iʼwírima japi echi amígowala ju.

 ⁵ Satanás ko ke nakí japi ta Onorúami nijéwipo. Jeobá ko tamujé iʼwírinili jiti ta nijéwami nipo (leeri Salmo 55:22). * Jiti ta echi amígowala ju, ata ne sulachí jonsa nijéwami ju, ayénachó ta nijéwami ju japalí karúa ikisaa tamujé téemala. Ata bichiwi japi riká bichíwili echi David riwéami. Echi ko jéanili Jeobá jitra: “Echi ko tamí yúa atí alí ke sineti ni majama” (Salmo 16:8; 63:8). ¿Piri ka isimí Satanás jiti ta ke nijéwiami nipo Jeobá?

6. ¿Chu aní Satanás echi pagótami jitra?

⁶ Echi capítulo 11 ko ata bineli japi Satanás ko ikaleka raʼíchika anili japi Jeobá ko ikaléami ju. Ayénachó anili japi ke aʼlá isimí, echi riká anili jiti echi Adán alí Eva nokimea japi chati ju. Echi libro japi Job aníami ju, echoná aní japi Satanás ayénachó jéané echi pagótami japi Onorúami amígowala nínali, japi ke omérima nijewia Onorúami. Satanás ko aní japi echi pagótami a nijewi Onorúami, jiti olá japi newalé japi echi bi jitra nijewa, japi ta ke bichíwali nijéwami ju Onorúami. Ayénachó jéaní echi Satanás japi chúriká isima jiti echi pagótami ke nijéwima Onorúami. Ma inepo piri ka ti biné japi isili Job, alí chúriká iʼwírili Jeobá.

7, 8. a) ¿Chu anili Jeobá Job jitra? b) ¿Chu anili Satanás Job jitra?

⁷ Bilé rijoi japi Job riwéami nili chabé biteili, ma simírili 3.600 bamíali japalí jonsa biteili. Jeobá ko anili japi echalí bamíali echi bilepi Job bi nili we aʼlá nijéwami, japi biteili jenaʼí Wichimóbachi. Job ko Jeobá bi nijéwami nili jiti ke siné chati isili (Job 1:8). Alí Jeobá ko jéaneli Job japi echi amígowala nili.

⁸ Satanás ko aneli Onorúami japi Job ko we aʼla  nijéwami ju jiti olá wiká namuti japi newalé. Satanás ko jéaneli Jeobá: “¿Wecha mi ke tibú echi, alí echi téemala alí suwaba namuti japi ikí olá we mi ke tibú japi riká ko mi ireka muchúala? Mujé ko mi wiká namuti iyá, japi echi nocha mujé isimí japi muwésima, alí jipi ko wiká namuti buké. Tamí risensia iyá jiti ni iyema suwaba namuti japi olá, wecha ko ke cha riká raʼichárali mi jitra” (Job 1:10, 11).

9. ¿Piri ka nakíwili Jeobá japi isima echi Satanás?

⁹ Satanás ko cha riká raʼíchali Job jitra, jéaneli japi nijewi Jeobá jiti wiká namuti níwili. Jéanili echi Satanás japi binoy isima cha olaria Job jiti riwema nijewia. Jeobá ko tasi nakili japi echi Satanás chati olama Job, nalí a riweli. Jiti echi riká machimea achi ne bichíwali nijéwami ka Job.

10. a) ¿Chúriká risoa olali Satanás echi Job? b) ¿Piri isili Job?

¹⁰ Ne bachá ko echi Satanás isili japi echi namuti Job bukula chikónitami nima, ayénachó isili japi ripili ko kárika suwimea. Ayénachó isili japi Job yúa nóchami nili suwimea. Job ko iyiri ripili ke bilé bukea namuti. Ayénachó echi Satanás isili japi 10 Job kúchuwala suwimea japalí wabé iʼwéami ikali. We risoa ikili echi Job, we nalí ke siné riweli Jeobá nijewia. Echi Biblia ko aní japi “suwaba japi ikili Job, tasi sineti isili chati namuti alí tasi siné ichéwili Jeobá japi ikili” (Job 1:12-19, 22).

11. a) ¿Piri olali echi Satanás Job? b) ¿Chu anili Job?

¹¹ Satanás ko aminabi a risoa olali Job. Satanás ko jéaneli Onorúami: “To risoa olabo wecha ko ke cha riká raʼichárali mi jitra”. Alí Satanás ko risoa olali Job, echi ko we nayútili (Job 2:5, 7). Job ko sinibí nijéwili Jeobá. Anili japi nijéwami nima Onorúami chúkuré mukuyepa (Job 27:5).

12. ¿Chu isili Job jiti echi Satanás machimea japi we ikaléami ju?

¹² Job ko ke machili japi Satanás iyiri nili japi we risoa  nílima. Job ko nátili japi Jeobá risoa olárili, nátili achi ne bichíwali nijéwami ka (Job 6:4; 16:11-14). Tákoré risoa nilia biteili ke riweli nijewia Jeobá. Ke binoy bi nátili. Onorúami amígowala nili jiti we nakili. Japi anili Satanás Job jitra ke bichíwali nili.

13. ¿Piri ka ku nareli Job jiti we aʼlá nijéwami nili?

¹³ Job ko ke machili piri ikili ripá riwigachi, nalí nijéwami nili Onorúami, néwariwélitili japi Satanás ko we chati isíami ju. Jeobá ko wiká namuti ku iyali jiti echi amígowala nili (Job 42:12-17).

14, 15. ¿Chu aní Satanás echi pagótami jitra?

¹⁴ Japi ikili Job tamujé binepo jaré namuti. Jipi echi Satanás aní japi echi pagótami nijewi Onorúami jiti olá wiká namuti japi newalé. Jéanili: “Echi ko suwaba namuti anachi jiti mi ke nayunti, mi ku riwema ami nayútisaká” (Job 2:4). Echi Satanás ko jéaní japi sinéami echi pagótami pe korúa bi namuti nijewi Onorúami, echi riká aneli Job. Jipi ayénachó echi ané sinéami pagótami japi korúa bi namuti nijewi Onorúami. Wiká bamíali simárili japalí mukuli Job, Satanás a bijí we nakawélika raʼicha japi Jeobá amígowala ju, ayénachó Jeobá jitra. Proverbios 27:11 aní: “We aʼlá machiká isí japi mi isímaré, jiti mi tamí sulala kanílitima, jiti ni omérima nimia japi cha riká raʼicha tamí jitra”, jiti ke nakawelia raʼichama.

¹⁵ Mujé binoy mi machimea achi mi nijéwima Jeobá, achi mi echi amígowala nima, Jeobá nalí mi nijéwisaká echi riká mi néwariwélitima japi Satanás ko we ikaléami ju. Ami ma riwésaká chati namuti isiá jiti mi jipi ko Onorúami amígowala nima, ami echi riká isísaká japi riká aní Jeobá we aʼlá nima. Satanás ko aní japi mujé ke nijéwami nima Jeobá japalí mi risoa nílisa, jiti bela bachá natásaré  piri mi nalí isima. Echi Satanás ko isimí japi ta ke nijéwami nipo Onorúami. ¿Chúriká isimí?

16. a) ¿Chúriká isimí Satanás ékia echi pagótami jiti ke nijéwima Jeobá? b) Mujé ru, ¿chumi riká mayé japi mi ékima echi Diablo jiti mi riwema nijewia Jeobá?

¹⁶ Satanás ko ékika raʼichi echi pagótami jiti ke nijéwami nima Jeobá. Echi Satanás ko iyena japi riká isimí bilé mauyá we aparúami (1 Pedro 5:8). Jiti bela mi ke chibi lama, japalí mujé téemala o amigo mi anesa japi ke binema echi Biblia, echi ko nakí japi mi ke nijéwami nima Onorúami. Isini kaachi mi nílima japi riká ko mi risoa anewa (Juan 15:19, 20). * Ayénachó echi Satanás “yékaka olá mapurigá echi pagótami mayema mapu binói ne bichíwali bilé wabé ratábami walula Riosi kapitánawala ju”. Jiti bela isiá ko japi ta ke nijéwami nipo Jeobá (2 Corintios 11:14). Satanás mi mayeri japi ke siné aʼlá nokiboa japi Jeobá nulá, japi ta natabo japi ke oméribo aʼláala niya, japi Jeobá ke natéami niraa iné ibili niraa tamujé (Proverbios 24:10).

17. ¿Chúsiá ta nijewi Jeobá?

¹⁷ Japalí ta Jeobá nijewi, ata néwariwéliti japi echi Satanás ko ikaléami ju. ¿Piri ta nokisare jiti ta nijéwiami nipo? Echi Biblia aní: “Ne sulachí jonsa galé Jeobá, japi mi iwí jonsa, ne japi iyeni mi omeri” (Deuteronomio 6:5). Ata nijewi Jeobá jiti ta we galé. Jiti bela japalí ta aminabi binésimi Jeobá jitra, ata nokinali suwaba japi echi nulá. Echi apóstol Juan osali: “Mapujiti mapuyíripi pagótami  galá galeko Riosi, abóniko ayénachó galá nijéwaga olá mapurigá Riosi nulá. Alí ketasi wabé nóchali ju echirigá nijéwaga oluwawa”, a mi omerima nijewia (1 Juan 5:3).

18, 19. a) ¿Chu iyiri chati ju japi Jeobá ke nakí japi mi isima? b) ¿Chúriká mi machí japi a omérima aʼlá isiá?

¹⁸ Jeobá ko aní japi nirú jaré namuti chati japi ta ke nokisare. Ami riwimea echoná recuadro japoná aní “ Japi Jeobá kichí”. Ne kulí ko ami natámalé japi ke me chati ju. Japalí mi leeria echi textos japi aní echi Biblia ami natama chúsiá echi riká aníami osaari, alí mi machimea japi we natéami ju nijewa japi Onorúami nulá. Ayénachó mi machimea piri namuti mi ma ke chati isiá bitélima, ami jilima ne kulí ko aʼlá isiá. Ami we aʼlá namuti isísakó, ami we kanílika bitélima japi riká piré Jeobá amígowala (Isaías 48:17, 18). ¿Chúriká ta machí japi ta a oméripa ke chati namuti nokayá?

 ¹⁹ Jeobá ko tasi siné tamujé tánima japi ta ke oméripo nokayá (Deuteronomio 30:11-14). Jeobá ko we aʼlá amigo ju tamujé yúa, echi ko we aʼlá tamó machí. Ayénachó machí chuti iyiri ju alí piri ta nokáami ju (Salmo 103:14). Echi apóstol Pablo ko jéanili: “Chopi echi Walubela Riosi sinibí ʼyemi mi kuʼwírama. Aʼlí Riosi ketasi ariwema mapurigá echi riablo ʼyemi mi ne wabé simírami chati sitíi olánalama [...]. Echalí ʼyémitamo galá omérabo echirigá niʼyúriya mapurigátamo ketasi echirigá chati sitíi olabo” (1 Corintios 10:13). Ata machí japi Jeobá sinibí tamujé iʼwírima jiti ta nokiboa japi aʼlá ju. Echi ju japi “tamujé tamí omérata” jiti mi anachama risoa nilia bitélisaká (2 Corintios 4:7). Japalí Pablo risoa nílika biteili, Jeobá ko iʼwírili. Jiti bela, echi apóstol Pablo anili: “Ayénachó Binói sinibí ʼyemi mi kuʼwira mapurigátamo echirigá galabé olabo” (Filipenses 2:13).

20. Echi Jeobá amígowala, ¿chu nokáami nísaré alí chúsiá echi riká noká?

²⁰ Ami Onorúami amígowala nínalaká, ke mi isísaré japi chati ju japi Jeobá ke galé, nalí ke echi bi ju ayénachó si ju jarecho namuti (Romanos 12:9). Echi japi Onorúami amígowala ju ko a noká japi echi galé. A nokinali japi riká isimí Jeobá, japi riká anakupi galé, kaníliami ju, kilí oloká piré, kilí buwé, we natimáami ju, aʼlá nokáami alí bichíyami ju Onorúami (Gálatas 5:22, 23). Ami machimea chu nokáami ju echi Onorúami amígowala, leeri Salmo 15:1-3. *

21. Ami isínalaká japi riká isimí Onorúami, ¿piri mi isísaré?

²¹ ¿Chúriká mi isima jiti simá cho isíami nima? Ne sinibí nijéwika japi Jeobá nakí japi mi isima. Sinibí leeri echi Biblia alí biné piri namuti ke nakí Jeobá (Isaías 30:20, 21). Echi riká mi isísaká we mi nakimea Jeobá, aminabi binénilima, alí mi we kanílika nijéwima.

22. ¿Piri mi néwariwélitima ami nijéwisaká Jeobá?

²² Echi Biblia aní ke “yékaka raʼichási aʼnagupi, mapujítitamo ma bukulíwami nakulíwarami ju” nalí ti mi “mátamo auché siʼnú bukulíwami galabé oláami niwárami ju” (Colosenses 3:9, 10). Chúkuré we jilí ju ke nokiwaa japi Onorúami kichí japi ta chabé nokali, nalí echi ko aní japi tamó iʼwírima alí iyama namuti kalabé ata nijéwisaká (Salmo 19:11). Ke bi nijéwipo Jeobá jiti ta wiká namuti narepo pe aminánami. Ami néwariwélitima japi echi Satanás we ikaléami ju alí japi mi Jeobá bi amígowala ju.