1. ¿Jépuká bi ju japi aní chúriká nijéwipo?

NOKÍ sinéami echi religiones aní japi ne bichíwali bineri Onorúami jitra. Nalí ke bichíwali ju, jiti echoná ko bineri sinucho niraa alí ke chopi riká nokáami ju. ¿Chúriká machiboa chu iyiri ju echi religión japi ne bichíwali bineri? Pe Jeobá bi ju japi aní chúriká nijéwipo.

2. ¿Chúriká mi machimea japi Onorúami nakí?

² Jeobá ko nijili echi Biblia jiti ta machiboa chúriká nakí japi nijéwipo, jiti bela we natéami ju japi mi binema echi Biblia. Onorúami ko we mi galé jiti bela mi iʼwírima jiti mi bineka machimea japi aní echoná (Isaías 48:17).

3. ¿Piri nakí Onorúami japi ta nokiboa?

³ Jaré pagótami aní japi Onorúami ko a galé suwaba echi religiones, nalí Jesús ko ke echi riká binérili. Echi ko anili japi jaré pagótami animea japi a bichíwiami ju, nalí be echi ko ke noká japi riká Onorúami nulá; Jeobá alí Jesús ke galé echi riká nokáachi. Onorúami ko nakí japi ta binepa japi echi nulá alí ne echi riká nokiboa. Jepuná ko we natéami ju, jiti Jesús ko anili japi ke nijéwami ju ko Onorúami “chati oláami pagótami” ju (Mateo 7:21-23, TNM).

4. ¿Piri anili Jesús japi nokimea japi a nijéwinali ko Onorúami?

⁴ Jesús ko anili japi mi isini a jilima isiá japi aní Onorúami, ata iʼwérika nokisare nijewia. Jesús ko anili: “Moʼisí echoná taa iyéwichi, jiti walubé ju echi buwé japi mukuwáami too alí wikabé ju japi moʼí echoná, we be nalí taa ju echi iyéwichi alí pe taa echi buwé japi bitéliami too alí okuáabi ju japi ritiwá ko” (Mateo 7:13, 14, TNM). Echi pe  taa buwé ko ju echi religión japi bineri japi a bichíwali ju, echi pagótami ko sinibí pirélima. Echi walubé buwé ko ju echi religión japi ke tasi bineri japi bichíwali ju, echi ko ke sinibí pirélima. Nalí Jeobá ko ke nakí japi echi pagótami suwimea, jiti la nakí japi echi pagótami binema echi jitra (2 Pedro 3:9, TNM).

5. ¿Chúriká mi machimea jépuká ju japi olá echi religión ne bichíwali?

⁵ Jesús ko anili japi ta a machiboa jépuká ju japi olá echi religión japi ne bichíwali bineri, ¿chúriká ta machiboa? Ata inésaré piri ka noká alí piri ju japi bichiwi. Echi ko anili: “ʼYémitamo galá machiboa aboni, acha ne bichíwali galabé oláami pagótami ju”. Jesús ko ruyeli jiti echi religión ne bichíwali ju japi riká bilé rakéami namuti, alí anili: “Echijiti suwaba galabé rakéami namuti, ne bichíwali rakema echi galabé rakala” (Mateo 7:16, 17). Echi ko ke aniwáami ju japi nijewi ko Onorúami ne sébali aʼlá nokáami ju. Nalí be japi nijéwami ju ko Onorúami, iʼwera noká nokayá japi aʼlá ju. Ma ineba chúriká machiboa chu noká japi olá echi religión ne bichíwali.

6, 7. a) ¿Chúsiá echi religión ne bichíwali Biblia leérika bineri? b) ¿Piri ka jitra binérili Jesús alí tamujé ru?

⁶ Echi religión japi ne bichíwali ju Biblia leérika bineri. Echi Biblia aní: “Echijiti ne suwaba Riosi Raʼíchala osirúami wabé galá ju tamujé tamí ne wabé galabé niráa binériya. Ayénachó Riosi Raʼíchala tamujé tamí oyérami ju mapalita ketasi galá bichíi. Ayénachó Riosi Raʼíchala tamujé tamí galá ruyé mapurigata ketasi waminabi chati sitíi olabo” (2 Timoteo 3:16, 17). Echi apóstol Pablo oseli echi cristianos chabé piréami: “Echalítamo ne galá bichíili tamujé nawésawala mapurigá ne bichíwali Riosi Raʼíchala niráa. Echalítamo ketasi mayeli mapu bilé rijói raʼíchala  chopi níili. Aʼlí tamujé nawésawala ne bichíwali Riosi Raʼíchala niráa níili” (1 Tesalonicenses 2:13). Echi religión japi ne bichíwali ju ko bineri néeka echi Biblia, jiti bichiwi japi Onorúami Raʼicháala ju. Ke bineri japi riká nata echi pagótami o japi riká nokáami ju echi.

⁷ Jesús binérili echi pagótami echi Onorúami Raʼicháala jitra (leeri Juan 17:17). Wisabé niraa anili japi ma oserúa chukú (Mateo 4:4, 7, 10). Japi Onorúami nijéwami ju ko ayénachó noká japi riká isili Jesús, jiti bela japalí ta bineri echi pagótami echi Biblia leérika ta bineri.

8. ¿Piri anili Jesús japi nokimea echi religión ne bichíwali?

⁸ Jeobá bi nijéwami ju. Salmo 83:18 aní: “Jiti echi pagótami machimea japi mujé, japi mi Jeobá riwewi, pe mujé bineli bi ju echi ne wabé Walubéala omáana Wichimóbachi”. Jesús ko nakili japi echi pagótami ne aʼlá machimea jepi ju Onorúami. Jiti bela binérila ko echi pagótami jiti machimea Onorúami riwalá (leeri Juan 17:6, TNM). * Jesús ko anili: “We aʼlá bichiwi Jeobá. Echi ko bilepi bi ju japi mi nijéwisaré” (Mateo 4:10, TNM). Japi Onorúami nijéwami ju ko ayénachó noká japi riká isili Jesús. Ata Jeobá bi nijéwami ju, ayénachó ti aní Onorúami riwalá Jeobá alí ta bineri sinéami echi pagótami jiti cho machimea echi riwalá. Ayénachó ta nawesi japi chu isímaré Onorúami.

9, 10. ¿Chu noká japi ne bichíwali galéami ju?

⁹ Ne bichíwali galé echi pagótami. Jesús ko binérili echi pagótami japi echi yúa iyénili japi galésaré anakupi niraa (leeri Juan 13:35). Ata galésaká jarecho ata napawika kaníliami nipo, kumi ko ti piréami ke, tákoré ti sinú raʼíchami ke, we winomíwami o we risóati ma (Colosenses 3:14). Jiti bela ta ke nakoa japalí nirúachi guerra, ke cho miʼabo.  Echi Biblia ko aní: “Ne galá machiwáwami ju mapu chigá ju echi jaré Riosi kúchuwala, ayénachó mapu chigá ju echi riablo kúchuwala, mapujiti siʼnéami mapu ikí ketasi galabé wachínaga olako, abóniko ketasi Riosi níwala ju. Ayénachó echi jaré mapu ikí ketasi galeko echi auché jaré aboni ritémawala, abóniko ketasi Riosi níwala ju”. Jéaní: “Máputa sinibí ne wabé galebo aʼnagupi”, ke nipo japi riká Caín, echi ko miʼali binoy bonilá Abel (1 Juan 3:10-12; 4:20, 21).

¹⁰ Ata nakúuri japalí bilé newalesa japi iʼwíripo, ayénachó ti iyá namuti tamujé níwala jiti echi riká sinéami kanílipo (Hebreos 10:24, 25). Echi Biblia aní: “Echirigá galá níima mapu tamujeta galabé olabo echi auché jaré pagótami ne sinibí mapalita echirigá omero” (Gálatas 6:10).

11. ¿Chúsiá ta nijéwisaré Jesús?

¹¹ Nijewi japi Jesús nulá, jiti Onorúami júali Jesús jiti ta niyúbitami nipo. Echi Biblia aní: “Aʼlí ke wesi auché bilé rijói galá omero tamujé tamí ku wikáwiya mapurigata chati olali. Aʼlí Riosi chopi júuli echi Walubela Jesucristo jenaʼí wichimóbachi mapurigá Binói tamujé tamí ku wikáwama” (Hechos 4:12). Jena libro echoná capítulo 5, ata bineki japi Jeobá júuli Jesús jiti mukumea, jiti echi riká ku natétima japi a nijéwami ju ko (Mateo 20:28). Jeobá ko wilali Jesús jiti nuláami nima pe aminana jenaʼí kawichí. Jiti bela echi Biblia ko aní japi ta nijéwipo Jesús ata sinibí pirénalaká (leeri Juan 3:36).

12. ¿Chúsiá ta ke noká japi política ju?

¹² Ke noká japi política ju. Jesús ko ke echi riká isili japi política ju. Japalí oyéritami nili, Jesús ko jéaneli echi silíami Pilato: “Chópini ketasi achigórigá ʼwérali nulama mapurigá echi auché jaré oʼwéala silíami we nulá” (leeri Juan 18:36). Tamujé ko nakí japi bi nulama echi Silíami japi Onorúami wilali, Jesús. Jiti la ti ke noká japi política ju, japi riká votaria, o japi riká noká echi japi silíami nínali. Nalí be  echoná Biblia aní japi nijéwipo echi leyes japi nirú japoná ta piré (Romanos 13:1). We be nalí japalí echi ley anisaa japi ta ke nijéwipo japi Onorúami nulá, ata noká japi riká nokali echi apóstoles. Echi ko jéanili: “Arigá ʼwérali ju mapu tamujé bachá niráa galá nijéwabo mapurigá Riosi tamujé tamí nulé, chopi ketasi arigá ʼwérali ju máputa nijéwaga olabo mapurigá ʼyemi pagótami tamujé tamí siʼwinárigá nulé” (Hechos 5:29; Marcos 12:17).

13. ¿Piri ka nawesa echi religión japi ne bichíwali ju?

¹³ Nawesa japi echi Silíami japi Onorúami wilali echi bi isima jiti sinéami pagótami kanílika pirélima. Jesús ko anili: “Aʼlí jeʼná Galabé Riosi Raʼíchala galá nawisárami níima ne suníami jenaʼí Wichimóbachi” (leeri Mateo 24:14). Ke wesi echi pagótami japi isélikami ju omérima isiá japi riká echi Silíami japi Onorúami wilali (Salmo 146:3). Jesús ko tamó binérili japi ta raʼíchika tánipo Onorúami, jéaniká: “Wilá bilé Silíami jiti nulama jenaʼí. Isí japi mi binoy nakí jenaʼí Wichimóbachi, japi riká mi isimí ripá riwigachi” (Mateo 6:10, TNM). Echi Biblia ko aní japi echi Silíami suwábima sinéami echi isélikami japi nirú jenaʼí Wichimóbachi, echi bi nulama sinibí (Daniel 2:44).

14. ¿Chu yiri ju echi religión japi ne echi riká noká japi aní echi Biblia?

¹⁴ Japi ta ma bineli, nátika isí: “¿Jépuká a ne Biblia leérika bineri? ¿Jépuká ko a nawesa echi Onorúami riwalá? ¿Jépuká ko a ne bichíwali galé jarecho? ¿Jépuká a mayé japi Onorúami júali Jesús jiti ta sinibí pirélipo? ¿Jépuká ko ke noká japi política ju? ¿Jépuká bi a nawesa japi isima echi Silíami japi Onorúami wilali?”. Pe echi testigo Jeobá bi ju japi echi riká noká (Isaías 43:10-12).

15. ¿Piri ta nokisare jiti kanílitipa Onorúami?

¹⁵ Ke bi mi machisare japi Onorúami bité. Ayénachó echi  demonios machí japi a bité Onorúami, we nalí echi ko ke nijewi (Santiago 2:19). Jiti ta kanílitipa Onorúami we natéami ju japi ta nijéwipa, ne echi riká nokiboa japi echi nulá, ke bi jéaniboa japi ta ma machí, nalí ata nijéwisaré.

16. ¿Chúsiá ta riwésaré echi religión japi ke bichíwali bineri?

¹⁶ Ata riwésaré echi religión japi ke bichíwali ju jiti Onorúami a galema japi ta noká. Echi profeta Isaías osali: “Ku machínasi echoná jona [...] kiti nokisí echi namuti japi chati ju” (Isaías 52:11; 2 Corintios 6:17). Jiti bela ke nokisare chati namuti japi riká noká echi religiones japi ikaleka binériami ju.

17, 18. a) ¿Piri ju “Babilonia”? b) ¿Chúsiá we natéami ju japi mi ma ke che simea japoná ikaleka binériwa?

¹⁷ ¿Chu noká echi religión japi ke bichíwali ju? Echi ko sinucho riká bineri Onorúami jitra, ke bineri japi riká aní echi Biblia. Echi Biblia rewá “Babilonia” sinéami echi religiones japi ke bineri echi bichíwali (Apocalipsis 17:5). ¿Chúsiá? Japalí waʼlú ukuli, anilíwami diluvio, echalí jonsa chotásili ikaleka bineria echomí Babilonia. Omáana chijali echi raʼíchali japi ke bichíwali nili. Japi riká echoná Babilonia piréami ko néeli bikiá chuéami dioses ko ruyá. Jipi a nirú religiones japi bineri echi pagótami japi Jeobá, Jesús alí echi espíritu santo chopi iyiri ju, trinidad aniwáami ju, nalí be echi Biblia ko aní japi Jeobá bilepi bi ju alí Jesús ko echi nolá ju (Juan 17:3). Echomí Babilonia piréami ko ayénachó mayeli japi bilé mukusaa a bijí bité japi riká aliwá niraa, alí risoa ikí echoná naʼírali. Nalí echi ko ke bichíwali ju (iné jubá chukúami notas 14, 17 alí 18).

¹⁸ Onorúami anili japi kárika suwábima religiones japi ikalea binériami ju, ma mulipi echi riká isima (Apocalipsis 18:8). ¿Chúsiá we natéami ju japi mi ma ke che simea japoná ikaleka binériwa? Jeobá ko nakí japi mi sapuka ku machíinima echoná jonsa jiti mi ke si mukumea (Apocalipsis 18:4).

19. ¿Piri mi narema ami nijéwisaká Jeobá?

 ¹⁹ Ami riwénalaká echi religión japi ke bichíwali ju jiti mi Jeobá nalí nijéwinali, a bichíwali ju japi mujé téemala alí amigos si ke machí chúsiá mi echi riká isimí alí we naʼáwimiré mi yúa. Kiti siwé, Jeobá mi iʼwírima. Ayénachó mi olama amigos omáana Wichimóbachi piréami japi ayénachó nijéwami ju Jeobá alí mi si bitélima sinibí jenaʼí Wichimóbachi baʼóachi nisa (Marcos 10:28-30). Tákoré jipi mujé téemala alí amigos ke nakí japi mi binema echi Biblia, a binésimalé cho jiti mujé echi riká isimí binea echi Biblia.

20. ¿Chúsiá we natéami ju japi mi isima japi riká noká echi religión japi ne bichíwali bineri?

²⁰ Ma mulipi nima japi Onorúami suwábima chati nokáami, echi Silíami japi echi wilali omáana Wichimóbachi nulama (2 Pedro 3:9, 13, TNM). We simá riwélima. Sinéami a nokimea japi riká Jeobá galé. Jiti bela we natéami ju japi mujé isima japi noká echi religión japi ne bichíwali bineri.