¿ACHA ta kuʼíriwa nijewia Jeobá? Ata machináliaká, a binésaré echi busuréliami japi ta aliwa echi binói Raʼicháala kitra. ¿A né bichíwali we aʼlá keʼré? ¿Acha ta kuʼíriwa we aʼlá pirea? Echi oselí Proverbios, echi silíami Salomón osali wiká busuréliami japi nikuuro suwaba namuti kitra japi ikí tamujé piréala. Ma ineba jaré namuti rikamti.

Bichíwipa Onorúami. Ata Jeobá amígowala nínalaká, a bichíwisaré echi. Salomón ko anili: “Bichiwi Jeobá né sulachí jonsa, alí ke japi riká mi nata. Suwaba japi ikí mi isimí nárika isí echi, alí echi binói isiima kiti mi we aʼlá wachía isiima” (Proverbios 3:5, 6). ¿Chúriká newaré japi ta a bichiwi Onorúami? Najátika alí nijéwika suwaba japi echi nulá. Ata nokisáaká echi, a nokibóalé japi tamujé piréala we aʼlá nima kiti ta aʼlá kanílitipa echi tamujé Onolá sulala alí néwariwélima japi echi Diablo ko we ikaléami ju alí we chati (Proverbios 27:11).

We aʼlá piréliwami jarecho yúa. Tasi me siné echi yena newaleli echi Onorúami nikúurala echi wénwala alí kúchuwala japi riká jipi. Onorúami busurewi echi kunala: “Kanílika isí mujé upila yúa japi mi né chokichí jona olá”, echi riká natáriwa japi ke nakulíwisaré bilecho yúa (Proverbios 5:18-20). Echi capítulo 31 Proverbios bineriwa echi upila piri isíisaré kiti riwítami nima echi kunala kitra alí kúchuwala alí kiti we aʼlá natéami niraa inérami nima. Alí echi kúchuwala ko tániwa kiti nijéwima kipi wénwala (Proverbios 6:20). Jepuná oselí ayénachó aní japi we natéami ju echi amigo, alí jéaní japi rusurúami níbalé ke ta napawínalami nísaká jarecho yúa (Proverbios 18:1). Chíkoré we natéami ke oliwá aʼláala amigos, a be ta we aʼlá machisáré jépuká yúa napawipo kiti ta ke éenapa echi pagótami yúa japi nokiiri chati namuti (Proverbios 13:20; 17:17).

We aʼláala pagótami níliwa. Echi oselí Proverbios we natéami busuréliami olá japi nikuuro kiti ta aʼlá pirélipa alí kiti ta ke nataba echi namuti japi ke aʼlá ju. Jarecho busuréliami ko nikuuro kiti ta ke rikupa alí kiti ta we nóchami niba (Proverbios 6:6; 14:30; 20:1). Ayénachó aní japi ta ikiboa karú ikiwáami ata nokisáaká namuti japi echi Onorúami nuláala aní japi ke aʼlá ju (Proverbios 14:12). Ayénachó ta a aliwa busuréliami kiti ta ke choliwéami niwaba tamujé sulala, “kiti echi kitra machiina japi isimí japi bitélima” (Proverbios 4:23).

Jepuná busuréliami ko ma a kuʼíroli wiká mili pagótami japi aʼlá pirélima, alí jipi ko jepuná pagótami ma machí kiti we aʼlá ju japi Jeobá nulé sinéami pagótami.

(Jepuná ko uchúi echoná oselichi Proverbios.)