WABÉ chabénala bamíali kaachi japalí kecho moʼiá echi Israel echoná Canaanchi, Jeobá ko aneli Abrahán japi iyama riweili echi weʼé echi kúchuwala. Jipi ko, japalí Josué nuláami nili, echi israelitas ko ma moʼimea riké echi Weʼé japi aneiru japi iyaba riweili.

Onorúami ko nakili kiti echi cananeos suwimea, kiti echi ko né wabé nakówami nili alí né sinibí nokayé alí nátali wabé chati namuti. Kiti bela, Onorúami aneli echi israelitas kiti suwábima sinéami japi echoná Canaanchi piréami nili.

Chabénala japalí kecho moʼili, Josué ko júali okuá pagótami kiti inema echi país. Echi ko moʼili echoná pueblo japi Jericó anilíachi nili alí echi ko ripili echoná bilé mukí bitélachi japi Rahab rewéami nili. Tako echi ko ma machili japi israelitas nili, echi ko a nakili japi echoná ripima binói bitélachi alí kiti echoná ichípima. ¿Chúsiá? Kiti echi ko a kipuli japalí raʼichairu echi namuti japi Jeobá niwali kiti niyuma echi binói puéblowala alí jipi ko ma a bichíwili cho Onorúami. Echi Rahab isiili bilé katúwiliami echi yúa, alí nakili japi echi okuá pagótami kiti anema, kiti echi binói, alí echi téemala a niyuma riweili japalí echi pueblo koʼwirúami niisa.

Pe aminana, echi israelitas ko moʼili echoná Canaanchi alí nakoli echoná Jericó. Jeobá isiili japi echi tikola pachókirami najuma, alí echi Josué sontársiwala suwábili echi pueblo, we nalí be Rahab alí echi téemala niyúbiliru. Echi riká chotásili usani bamíali echi nakóliami, alí né nokí niyúrili kiti echi níwala nima echi Weʼé japi Onorúami aneli japi iyama riweili. Alí kuwachimi ko, ma nachútali echi weʼé alí iyali uchíi niraa ibili niraa echi makoy okuá pueblos Israel.

Siné rawé, japalí Josué ma mulipi mukuyá, napabuli sinéami echi israelitas. Echi ko a newalárili japi Jeobá isiili bachánalaká kiti kuʼíroma binói téemala alí aneli japi ke siné riwema Jeobá. We nalí be, japalí Josué alí echi compañérowala suwili, echi israelitas riweli Jeobá alí olali jarecho onorúami japi ke tasi japi riká Jeobá nili, ke nijéwali echi Onorúami nuláala, 300 bamíali echi riká nokali. Alí japalí echi riká nokayé, Jeobá ko riweli japi echi filisteos alí jarecho sayérala kiti nakoma echi yúa. We nalí be echi israelitas sinibí tánili Jeobá nikúurala alí echi ko a iyali bilé niyúbiami. Niruili makoy okuá niyúbiami, jepuná ko rewarairu jueces.

Echi oselí Jueces raʼicha jepuná namuti kitra alí chotasi raʼicha echi juez Otniel alí suwéena raʼíchaka echi rejoy wabé jiwérami japi biteili: echi juez Sansón. Alí echoná ta bineriwa namuti rikamti wabé natéami: ata nijéwami nísaká Jeobá, we ta kanílika pirélipalé, alí ke ta nijéwisaká, chati namuti ikibóalé.

(Jepuná uchúi echoná Josué, Jueces alí Levítico 18:24, 25.)