“NÉ CHOKICHÍ jonsa Onorúami niwali echi ripá siyónami alí wichimoba.” (Génesis 1:1.) A aniwá kiti jepuná raʼíchali ju japi wabé niraa machiwaa omáana Wichimóbachi. Jepuná raʼíchali baʼóami kitra, echi Biblia ko chotásimi raʼicha bilé pagótami wabé natéami kitra: Jeobá, echi Onorúami japi né suwaba omérami ju, echi japi Niwáami ju suwaba japi ikí nirú ripá siyónachi alí Wichimóbachi. Pe aminana ko ma ruyeka isimí kiti wabé wilimna bamíali niraa, japi Onorúami rewá rawemti, echi ko niwali suwaba echi namuti baʼóami japi nirú echoná Wichimóbachi.

Echi wabé natéami japi Jeobá niwali jenaʼí Wichimóbachi echi ko nili echi pagótami. Echi rejoy bacháwala ko niwairu pe napisó kitra wichí ayé atíami. Onorúami ko niwali echi rejoy japi riká echi Binói ju, echi ko aniwáami ju, kiti echi rejoy a oméroma riweili aʼlá nakíami ka isiá, aʼlá nátami nima riweili, alí jarecho namuti. Adán rewárami nili echi rejoy alí Onorúami isiili kiti bitélima biléana weʼérili baʼóachi, alí Edén rewarali echi weʼé. Bilé weʼé baʼóami nili japi Jeobá binói niwali alí wiká niruili namuti rakéami we raʼíami.

Siné rawé, Onorúami ko nakili kiti echi rejoy a olama kipi compañera. Alí biché, néeli Adán wachíkala, niwali Eva, echi mukí bacháwala, alí ma iyairu Adán kiti echi upila nima riweili. Adán ko we kanili, kiti bela anili jepuná raʼíchali we baʼóami ba: “Jepuná kochilá ko ju japi riká nijé kochilá, alí echi sapala ko japi riká nijé sapala ju”. Alí echi Biblia ko jeriká ruyeka isimí: “Kiti bela echi rejoy ko riwema kipi onó alí kipi iyé, alí cheka isíisaré kipi upila, alí nísaré japi riká bilepi ripoká” (Génesis 2:22-24; 3:20).

Adán alí Eva nijewasa riweili okuá nulalíwami japi Onorúami iyali. Bachá, a ichisá riweili alí tibusa riweili echi Wichimoba, alí wiká olama riweili kúchuwala. Alí okuaná, a niruili pe bilepi namuti rakéami japi ke koʼmea riweili: echi “rakéami japi machiwáami ju alabéala alí ke alabéala” (Génesis 2:17). ¿Chu ikimea riweili ke nijewásaká? Pe suwimea riké. A néwariwélitisa riweili kiti a nakili kiti nulérami nima Onorúami kitra alí kiti we nakiká nokali Onorúami alí matétara iyali. Adán alí Eva ko a olali suwaba japi ikí newaleli kiti a oméroma né aʼlá nijewia kipi Silíamiwala. Tasi bilé nachúkami nili namuti chati, we aʼlá nátami nili, kiti bela echi Biblia jéaní: “Onorúami ko ineli suwaba japi niwali alí, ¡nibí!, né aʼlá nili” (Génesis 1:31).

(Jepuná ko uchúi echoná Génesis capítulos 1 alí 2.)