JESÚS ma bikiá bamíbali aminá nasipa isiili predicaria alí a machili kiti ma mulipi ke bitélima jenaʼí Wichimóbachi. Jaré pali japi judíos nili, miʼlinaili Jesús, we nalí ami majaa nili miʼayá kiti wiká pagótami mayeli japi Jesús ko bilé nawésami nili. Alí biché, Satanás ko néeli echi julárami Judas, alí isiili kiti echi ralinéwima kipi binói binériami. Echi pali ko natétili Judas 30 winomí plata kitra niwárami.

Echi rokó ko nili japalí néwalalíwa echi Pascua, echalí rokó Jesús ko napawili echi julárami yúa kiti néwalaká nokimea echi Pascua. Pe alínala japalí ma anesa Judas kiti aminá simea, Jesús ko isiili bilé kulíwami néwalalíwami: echi Walubé Rejoy Koʼáala. Bilé taa pani chapili, Onorúami yúa raʼíchali alí ma sinéami iyali pani echi makoy bilé julárami. Alí biché ma ruyeli jeriká: “Jepuná ko nijé ripokala aniwáami ju japi nijírami nímalé emi kitra. Sinibí bijí nokiisi jepuná kiti ta mi newalaba tamí kitra”. Alí biché ma siméroli bilé vaso uva baʼwila maníami alí jéanili: “Jepuná vaso uva baʼwila maníami ko aniwáami ju echi kulíwami katúwiliami echi nijé lalá kitra” (Lucas 22:19, 20, NM).

Echi kuwachimi rokó, Jesús ko wiká namuti binérili echi julárami. Ayénachó nijili bilé kulíwami nulalíwami, echi ko jéaneli kiti we nakiká nokisaa riweili abói niraa chíkoré wiká namuti ikiyé. Alí jéaneli: “Jenaʼí wichimóbachi piréami pagótami aʼlá machimea mapu Nijé ni yemi mi binérari, átamo echi riká anakupi karésagá” (Juan 13:34, 35). Jéaneli kiti ke me wabé omonama echi kitra japi ikimea riweili echi, alí raʼíchali Onorúami yúa né wabé jiwérika kiti kuʼírima kipi najátowala. Alí sinéami echi wikaránili Onorúami alí simíali echi mi jardinchi Jetsemaní.

Echoná Jesús ko chokóbaka wilíali alí né sulachí jona raʼíchali Jeobá yúa. We nalí, wiká sontarsi siili, pagótami japi kusí aká siili alí pali kiti chapinaili Jesús. Kiti echi sontarsi ko ke machili Jesús, kiti bela Judas ko jéanili: echi japi nijé chumimea echi ju Jesús. Alí echi sontarsi ko ma tóoli Cristo, alí echi julárami ko ma pe júmisili.

Japalí Jesús nawali echi judíos yúa japi wéala jáwami nili, echi ko anili kiti echi ko Onorúami Nolá nili. Echi jueces ko mayeli japi echi anili né wabé walubé ikaléwami alí kiti bela a mayeli kiti a oméroma miʼayá. Alí tóoiru Poncio Pilato yúa, bilé silíami romano. Echi ko a machili larú kiti Jesús ke bilé namuti chati isíiami nili, tako a echi riká mayeli larú, echi ko pe ariká be isiili japi riká tali echi pagótami ba; echi pagótami ko né sinaka tali kiti miʼliboa Jesús.

Cristo ko tóoiru biléana japoná Gólgota anilíachi, alí echoná echi sontarsi romanos ko usírili michoka uchali. Alí biché, echi Rayénali ko pe mi rukawa ikili alí chíkoré rawé nili, rokó najítili. Echalí alii, japalí Jesús mukuli, né wabé jiwérika nokali echi Wichimoba. Echi ripokala ma mukúami tóoiru biléana risochí ayé alí, baʼalínala, echi pali né wabé aʼlá érili japi mi moʼiwái alí nulali kiti aʼlá tibútami nima echoná risochí. ¿Echi nímilialé kipi kuwachimi kalila? Ke tasi, kiti ikimea riweili bilé namuti wabé walubé japi riwiiri.

(Jepuná ko uchúi echoná Mateo capítulos 26 alí 27, Marcos capítulos 14 alí 15, Lucas capítulos 22 alí 23 alí Juan capítulos 12-19.)