¿CHÚSIÁ nawali Jesús jenaʼí Wichimóbachi? Echi binói anili: “Ayénachó ni raʼíchisaré jaréanacho puéblochi piréami echi alabé kulíwami Onorúami gobiérnowala kitra kiti ni julárami nili kiti ni echi riká isiima” (Lucas 4:43, NM). Ma ta bineba naó bichíwali japi Jesús binérili jepuná Gobierno kitra, echi namuti né wabé natéami japi echi raʼíchali.

1. Jesús ko Silíami nima riweili. Echi binói anili kiti echi nili echi Mesías (Juan 4:25, 26). Ayénachó, anili kiti echi ko nili echi Silíami japi Daniel riwali. Echi ko jéaneli kipi julárami (japi we nakili) kiti echi binói siné rawemti rikáachi asimea riké biléana “osibélachi rewegachi nirúami” alí kiti echi nima riweili japi a si cho a nulama echi yúa, na jónalí jepuná ko pe okuaa nima riké (Mateo 19:28, NM). Jepuná ko rewaliwa “pe okuaa bowá”. Ayénachó a anili kiti a nirúlima “jarecho bowá” we nalí jepuná ko tasi nulama riweili echi yúa (Lucas 12:32, NM; Juan 10:16, NM).

2. Echi Onorúami Gobiérnowala ko a isiima riweili echi najórowami. Jesús ko anili kiti echi Gobierno ko kariwema riweili echi né wabé chati namuti; japalí Satanás choliwéami niwali echi Onorúami rewalá. ¿Chúriká isiima riweili? Né biʼwiika isiima binói riwalá echi ikaléwami kitra japi ma anili japalí jona Adán alí Eva ke nijéwili Jeobá (Mateo 6:9, 10). Cristo ayénachó a néwariwélitili kiti japalí echi Silíami nima, sinéami pagótami, rejoy alí umukí, wiká oláami winomí alí risóati, pe anáripi nima, ayénachó natéami nima riweili kiti echi binérilampá sinéami pagótami. Tako echi ko julárami nili larú kiti raʼíchima pe echi israelitas bi, pe ariká be suwaba a isiili japi ikí oméroli isiá kiti kuʼíroma echi samaritanos alí jarecho pagótami japi jaréana cho pireili. Echi ko ke tasi japi iyiri nili japi riká nili echi cheti pali japi niruili japalí echi biteili, kiti echi ko sinibí namuti chati nátami nili echi pagótami kitra alí echi ko nakíami nili echi we winomíwiami bi.

3. Echi Onorúami Gobiérnowala ko ke tasi ju japi riká echi gobiernos japi nirú jenaʼí Wichimóbachi. Jesús ko biteili echi rawemti japalí echi judíos we jilika pireili kiti echi ko nulérami nili echi wéala jáwami kitra jaréana paísichi piréami. We nalí, Jesús ko ke siné nakili japi wilárami nima silíami niraa jenaʼí Wichimóbachi (Juan 6:14, 15). Japalí raʼíchali bilé silíami yúa jéanili: “Nijé Gobiérnowala ko tasi japi iyiri ju japi nirú jenaʼí Wichimóbachi” (Juan 18:36, NM). Alí kipi najátowala ko jéaneli: “Emi ko ke ju japi riká echi pagótami japi noká echi chati namuti jenaʼí Wichimóbachi” (Juan 15:19, NM). Ke bilé riweli japi néema espadas kiti tibútami nima riweili echi (Mateo 26:51, 52).

4. Cristo ko nulama riké né aʼlá kami nílika riká alí né aʼlá nakiká. Jesús ko aneli kipi najátowala kiti nikúuroma japalí olasa echi namuti chati we jilírami (Mateo 11:28-30). Alí né a echi riká isiili. A iyali we alabé busuréliami japi kuʼíroli kiti ke tasi me natama echi namuti japi ke aʼlá nili, kiti ke nakíami nima echi winomí alí kiti sinéami pagótami yúa aʼlá kanílika pirélima (Mateo, capítulos 5-7). Jesús ko we nakíami nili alí sinéami a oméroli raʼicha echi yúa. Ayénachó echi pagótami risóati a oméroma riké simiba inebia alí a machili kiti a riwíitami nima riweili alí a machili cho kiti ke siné risoa olárami nima riweili. ¿Jépuká ke olánalami nímalé bilé silíami echi iyiri?

Jesús ayénachó niwali weli namuti kiti a machiboa japi isiima japalí echi Silíami nima. ¿Piri bineri jepuná weli namuti japi echi isiili? Ma ineba.

(Jepuná ko uchúi echoná oselichi Mateo, Marcos, Lucas alí Juan.)