JAPALÍ asali Jesús echoná kawírili Olivo anelíachi, naó najátami ko aneiru kiti ruyeba awénili niraa japi echi anili. Echoná jona a omérosa riké we aʼlá machiná inenia Jerusalén alí echi Jeobá kalila. Jesús ko anili japi echi Jeobá kalila kajunárami nima riweili, alí pe chabénalaká a aneli japi ikimea riweili “kuwachimi” (Mateo 13:40, 49, NM). Alí biché náriliru: “¿Chu kabú ikimea jepuná namuti, alí chúriká ta aʼlá machiboa japalí mi ma nuláami niisa alí japalí ke me ayó nima echi kuwachimi?” (Mateo 24:3, NM).

Jesús ko aneli piri ikimea riweili pe chabénala kaachi japalí kecho suwábiliru Jerusalenchi alí echi Jeobá kalila. We nalí be, japi echi anili, ayénachó ikimea riweili pe aminana mi omáana kawírili. Kiti machiboa chu kabú iyena chotásima riweili nulayá Jesús, a buwesa riweili bilé namuti, bilé bawelá, jepuná bawelá ko ju wiká ikiwáami japi ikimea riké omáana Wichimóbachi, alí echalí bamíali bi cho. Jepuná bawelá ko binérima riweili kiti Jeobá ko ma wilali Jesús japi riká Silíami, echi Silíami Onorúami Gobiérnowala kitra, alí jepuná Silíami ko we sapú suwábima riweili echi chati namuti alí pama riweili kilii níliwami omáana Wichimóbachi. Echi ikiwáami japi anili Jesús japi ikimea riweili, binérima riweili jepunani: japi echi pagótami chati, echi isélikami japi nirú jenaʼí Wichimóbachi alí echi bichíwiliami japi ke bichíwali ju suwibama riké alí ma chotásima riweili bilé kulíwami piréliwami.

Japalí echi chotama riweili nulayá ripá siyónachi, omáana Wichimóbachi nirúlima riweili weli nakówami, lochéwami, nawilí alí echi weʼé nokomea riweili. Echi nulalíwami ko kilipi kilipi niraa ma ke riwiipa. Ayénachó, echi japi né bichíwali najátami ju ko raʼichama riweili omáana Wichimóbachi echi namuti kalabé echi Onorúami Gobiérnowala kitra. Echi ikiwáami wabé natéami ko nima riweili echi “walubé risoa níliwami” japi ke cho siné ikí (Mateo 24:21, NM).

¿Chúriká machimea riké echi najátami japi ma mulipi nawama jepuná chati ikiwáami? Jesús ko aneli kipi najátami: “Binesi echi chuná kitra” (Mateo 24:32, NM). Japalí echi chuná chotasi sawarasia, machiwaa japi ma mulipi ju balá. Echi riká cho, japalí ikimea riké suwaba jepuná namuti, machiboa japi ma nawama riweili echi kuwachimi. Jesús ko anili japi pe echi bineli bi Onolá machili echi rawé alí chírikó chotásima riweili echi walubé risoa níliwami. Kiti bela, anili: “Busureka nokiisi, kiti ta mi ke machí chu kabú nima echalí rawemti” (Marcos 13:33, NM).

(Jepuná ko uchúi echoná Mateo capítulos 24 alí 25, Marcos capítulo 13 alí Lucas capítulo 21.)